ဒုတိယဝန်ကြီး ဦးအောင်ကျော်ထွန်း အိန္ဒိယရေကြောင်းဆိုင်ရာ ရက်သတ္တပတ်-၂၀၂၅ အခမ်းအနားတက်ရောက်

ဒုတိယဝန်ကြီး ဦးအောင်ကျော်ထွန်း အိန္ဒိယရေကြောင်းဆိုင်ရာ ရက်သတ္တပတ်-၂၀၂၅ အခမ်းအနားတက်ရောက်

နေပြည်တော် အောက်တိုဘာ ၂၉

အိန္ဒိယနိုင်ငံ၌ ရောက်ရှိနေသည့် ပို့ဆောင်ရေးနှင့်ဆက်သွယ်ရေးဝန်ကြီးဌာန ဒုတိယဝန်ကြီး ဦးအောင်ကျော်ထွန်းသည် ယမန်နေ့က အိန္ဒိယနိုင်ငံ၊ ပြည်နယ်၊ ဆိပ်ကမ်း၊ သင်္ဘောပို့ဆောင်ရေးနှင့် ရေကြောင်းဝန်ကြီး Shri Sahntanu Thakur နှင့်အတူ ဂျာဝါဟာနေဟူဆိပ်ကမ်း အာဏာပိုင်ကကျင်းပသည့် ကုန်ပစ္စည်းများ ဖြန့်ဝေမှုကွင်းဆက်ခိုင်မာအောင် တည်ဆောက်ခြင်း (Fortifying Global Supply Chains) အခမ်းအနားကို တက်ရောက်ကြသည်။

အဆိုပါအခမ်းအနားကို ကမ္ဘာလုံးဆိုင်ရာထောက်ပံ့ပို့ဆောင်ရေးနှင့် ထုတ်လုပ်မှုဗဟိုချက်အဖြစ် အိန္ဒိယနိုင်ငံ၏ မဟာဗျူဟာမြောက်ရပ်တည်ချက်တွင် ခိုင်မြဲစေရန်၊ ရေကြောင်းကုန်သွယ်မှုဆိုင်ရာ အခြေခံအဆောက်အုံများ အားကောင်းစေရန်၊ ဆောင်ရွက်ရမည့်လုပ်ငန်းစဉ်များ ချောမွေ့စေရန်နှင့် ဘက်စုံကဏ္ဍချိတ်ဆက်မှုကို မြှင့်တင်နိုင်ရန်ရည်ရွယ်၍ ကျင်းပခြင်းဖြစ်ပြီး အခမ်းအနားတွင် အိန္ဒိယရေကြောင်းဝန်ကြီးက အဖွင့်အမှာစကား ပြောကြားသည်။

ထို့နောက် ဒုတိယဝန်ကြီးက အမှာစကားပြောကြားရာတွင် အခမ်းအနား၏ ဆောင်ပုဒ်ဖြစ်သော "Logistics Reinvented" သည် ဆွေးနွေးရန်အတွက်သာမဟုတ်ဘဲ မရှိမဖြစ်လိုအပ်သည့် ကိစ္စရပ်ဖြစ်ပါကြောင်း၊ ခိုင်မာမှုရှိသော ထောက်ပံ့ရေးကွင်းဆက်များ တည်ဆောက်ခြင်းသည် သက်ဆိုင်ရာနိုင်ငံနှင့် ဒေသတွင်း စီးပွားရေးတိုးတက် သာယာဝပြောမှုအတွက် အခြေခံအုတ်မြစ် ဖြစ်ပါကြောင်း၊ မြန်မာနိုင်ငံသည် တောင်အာရှနိုင်ငံများနှင့် အရှေ့တောင်အာရှနိုင်ငံများအတွက် ဆက်သွယ်မှုဗဟိုချက်နေရာတွင်တည်ရှိနေပါကြောင်း၊ အနောက်ဘက်တွင် အိန္ဒိယ၏ ရှည်လျားသော ကမ်းရိုးတန်းတည်ရှိနေပြီး အရှေ့ဘက်အာဆီယံနိုင်ငံများအတွက် ရေကြောင်းကုန်သွယ်မှု တံခါးပေါက်အဖြစ် တည်ရှိနေပါကြောင်း၊ တောင်ဘက်တွင် ဘင်္ဂလားပင်လယ်အော်နှင့်ကပ္ပလီ ပင်လယ်တစ်လျှောက် ရှည်လျားသောကမ်းရိုးတန်းရှိနေခြင်းကြောင့် ဒေသဆိုင်ရာ ဆက်သွယ်မှုကွင်းဆက်တွင် အရေးကြီးသော ချိတ်ဆက်မှုတစ်ခုဖြစ်နေပါကြောင်း၊ အိန္ဒိယနိုင်ငံ၏ အရှေ့ဘက် ပင်လယ်ကမ်းရိုးတန်းနှင့် ASEAN နိုင်ငံများဖြစ်သည့် မြန်မာ၊ ထိုင်း၊ လာအို၊ ကမ္ဘောဒီးယားနှင့် ဗီယက်နမ်နိုင်ငံတို့ရှိ စျေးကွက်များကြားတွင် သယ်ယူပို့ဆောင်ရေးအတွက် အချိန်နှင့်ကုန်ကျ စရိတ်များကို သိသာစွာလျှော့ချ နိုင်မည်ဖြစ်ပါကြောင်း။

စီးပွားရေးစင်္ကြံအသစ်တစ်ခု

မြန်မာနှင့် အိန္ဒိယနှစ်နိုင်ငံ အကောင်အထည်ဖော်လျက်ရှိသော စစ်တွေဆိပ်ကမ်းနှင့် ကုလားတန်ဘက်စုံသယ်ယူပို့ဆောင်ရေးစီမံကိန်းသည် အိန္ဒိယနိုင်ငံ၏ အရှေ့ဘက်ဆိပ်ကမ်းများကို မြန်မာ နိုင်ငံမှတစ်ဆင့် အိန္ဒိယနိုင်ငံ၏ ကုန်းတွင်းပိတ် အရှေ့မြောက် ပြည်နယ်များနှင့် ချိတ်ဆက်ပေးသည့် လမ်းကြောင်းတစ်ခု ဖြစ်သည့်အပြင် စစ်တွေမြို့သည် အဓိကပင်လယ်ရေကြောင်း ဝင်ပေါက်အဖြစ် စီးပွားရေးစင်္ကြံ အသစ်တစ်ခုဖြစ်ပါကြောင်း၊ အိန္ဒိယ-မြန်မာ-ထိုင်း သုံးနိုင်ငံ အဝေးပြေးလမ်းမကြီး စီမံကိန်းသည် အိန္ဒိယမှ အာဆီယံဗဟို သို့ တိုက်ရိုက်ဆက်သွယ်နိုင်သော ကုန်းလမ်းကြောင်း တစ်ခုဖြစ်ပါကြောင်း၊ အနာဂတ်တွင် ပြည်တွင်း ထောက်ပံ့ပို့ဆောင်ရေး ခေတ်မီရေးနှင့် ဆိပ်ကမ်းများခေတ်မီရေးတို့ကို ဆောင်ရွက်ခြင်း၊ ဒစ်ဂျစ်တယ် အသွင်ကူးပြောင်းရေးအတွက် Single Window စနစ်များနှင့် ဒစ်ဂျစ်တယ် ပလက်ဖောင်းများကို အကောင်အထည်ဖော်ခြင်း၊ ထောက်ပံ့ပို့ဆောင်ရေးနှင့် အခြေခံ အဆောက်အအုံကဏ္ဍများတွင် ပုဂ္ဂလိကကဏ္ဍများပါဝင်စေရန် ဆွဲဆောင်ခြင်းတို့ကို ဆောင်ရွက် ရမည်ဖြစ်ပါကြောင်း၊ မိမိတို့နိုင်ငံကို ဖြတ်သန်းသွားရုံသာမကဘဲ ထိရောက်၍ ကုန်ကျစရိတ် သက်သာစေပြီး အကျိုးပြုသည့် ထောက်ပံ့ပို့ဆောင်ရေး ဂေဟစနစ်တစ်ခု ဖန်တီးရန် လူသားအရင်းအမြစ် ကျွမ်းကျင်ဖွံ့ဖြိုးတိုးတက်ရေးနှင့် နည်းပညာလွှဲပြောင်းမှုကဏ္ဍတွင် အတူတကွပူးပေါင်း ဆောင်ရွက်သွားရန် ရည်ရွယ်ပါကြောင်း ပြောကြားသည်။

ယင်းနောက် ဒုတိယဝန်ကြီးသည် အိန္ဒိယနိုင်ငံ ရေကြောင်းကဏ္ဍ ဖွံ့ဖြိုးတိုးတက်ရေးဆိုင်ရာ လုပ်ငန်းများအတွက် အိန္ဒိယနိုင်ငံ၊ ပြည်နယ်၊ ဆိပ်ကမ်း၊ သင်္ဘောပို့ဆောင်ရေးနှင့်ရေကြောင်း ဝန်ကြီးဌာနအောက်ရှိဌာန၊ အဖွဲ့အစည်းများနှင့် ပုဂ္ဂလိက ကုမ္ပဏီများ၏ MOU လက်မှတ်ရေးထိုး လဲလှယ်ခြင်း အခမ်းအနားသို့ တက်ရောက်သည်။

တွေ့ဆုံဆွေးနွေး

အခမ်းအနားအပြီးတွင် အိန္ဒိယနိုင်ငံ၊ ပြည်နယ်၊ ဆိပ်ကမ်း၊ သင်္ဘောပို့ဆောင်ရေးနှင့်ရေ ကြောင်းဝန်ကြီးဌာန၊ ဝန်ကြီး ဦးဆောင်သောအဖွဲ့နှင့်နှစ်နိုင်ငံ တွေ့ဆုံဆွေးနွေးပွဲ ကျင်းပပြီး နှစ်နိုင်ငံ ကမ်းရိုးတန်းသွားသင်္ဘောများဆိုင်ရာ သဘောတူစာချုပ်နှင့် အဆိုပါ သဘောတူစာချုပ်၏ စံပြု လုပ်ငန်းစဉ်များ၊ သင်္ဘောသားများ၏ လေ့ကျင့်ခြင်းနှင့် လက်မှတ်များကို အသိအမှတ်ပြုခြင်း နားလည်မှုစာချွန်လွှာ၊ သင်္ဘောသားများအတွက် သဏ္ဌာန်တူ သရုပ်ပြအခြေခံလေ့ကျင့်ခြင်း၊ အကဲဖြတ်ခြင်းနှင့် စာမေးပွဲစနစ်၊ သင်္ဘောများကို တာဝေးမှ ခြေရာခံ၍ ထောက်လှမ်းကြည့်ရှုခြင်းစနစ် နှင့် အိန္ဒိယနိုင်ငံသို့ဝင်ရောက်မည့် မြန်မာမှတ်ပုံတင် သင်္ဘောများ အတွက် အကာအကွယ်ပေးရေးနှင့် လျော်ကြေးဆိုင်ရာ အာမခံကိစ္စရပ်များနှင့်စပ်လျဉ်း၍ ဆွေးနွေးကြကြောင်းသိရသည်။

သတင်းစဉ်