မြန်မာနိုင်ငံ ဝိဇ္ဇာနှင့်သိပ္ပံပညာရှင်အဖွဲ့၏ (၂၅) ကြိမ်မြောက် ငွေရတုသုတေသနညီလာခံနှင့် သိပ္ပံပွဲတော် (၂၀၂၆) ဆုချီးမြှင့်ပွဲ ကျင်းပ

မြန်မာနိုင်ငံ ဝိဇ္ဇာနှင့်သိပ္ပံပညာရှင်အဖွဲ့၏ (၂၅) ကြိမ်မြောက် ငွေရတုသုတေသနညီလာခံနှင့် သိပ္ပံပွဲတော် (၂၀၂၆) ဆုချီးမြှင့်ပွဲ ကျင်းပ

ရန်ကုန် ၂၀၂၆ ဖေဖော်ဝါရီ ၇

မြန်မာနိုင်ငံဝိဇ္ဇာနှင့် သိပ္ပံပညာရှင်အဖွဲ့၏ (၂၅) ကြိမ်မြောက် ငွေရတုသုတေသနညီလာခံနှင့် သိပ္ပံပွဲတော် (၂၀၂၆) ဆုချီးမြှင့်ပွဲကို ယနေ့မွန်းလွဲပိုင်းတွင် ရန်ကုန်တက္ကသိုလ်သုတေသနနှင့် ဆန်းသစ် တီထွင်မှုစင်တာ၌ ကျင်းပသည်။

ဆုချီးမြှင့်ပွဲသို့ ပညာရေးဝန်ကြီးဌာန ဒုတိယဝန်ကြီး ဒေါက်တာဇော်မြင့်၊ မြန်မာနိုင်ငံဝိဇ္ဇာနှင့် သိပ္ပံပညာရှင်အဖွဲ့ဥက္ကဋ္ဌ၊ ဒုတိယဥက္ကဋ္ဌနှင့် အမှုဆောင်အဖွဲ့ဝင်များ၊ ညွှန်ကြား ရေးမှူးချုပ်များ၊ ပါမောက္ခချုပ်များ၊ ဒုတိယညွှန်ကြားရေးမှူးချုပ်များ၊ ဒုတိယပါမောက္ခချုပ်များ၊ ပါမောက္ခများ၊ ပြည်တွင်းပြည်ပစာတမ်းရှင်များ၊ ဖိတ်ကြားထားသည့် ဧည့်သည်တော်များနှင့် တာဝန်ရှိသူများ တက်ရောက်ကြသည်။

အခမ်းအနားတွင် ဒုတိယဝန်ကြီးက ဂုဏ်ပြုအားပေးစကားပြောကြားပြီး ဒုတိယဝန်ကြီး၊ မြန်မာနိုင်ငံဝိဇ္ဇာနှင့် သိပ္ပံပညာရှင်အဖွဲ့ဥက္ကဋ္ဌနှင့် ဒုတိယဥက္ကဋ္ဌတို့က ပညာရှင်အဖွဲ့ဆု (Academy Award) ရရှိကြသူများကိုလည်းကောင်း၊ မြန်မာနိုင်ငံဝိဇ္ဇာနှင့်သိပ္ပံပညာရှင်အဖွဲ့ အမှုဆောင်အဖွဲ့ဝင် များ၊ ညွှန်ကြားရေးမှူးချုပ်များနှင့် တာဝန်ရှိသူများက အကောင်းဆုံးသုတေသနစာတမ်းဆု (Best Paper Award) တွင် ဘာသာရပ်အလိုက် ပထမဆု၊ ဒုတိယဆု၊ တတိယဆုနှင့် ဂုဏ်ပြုဆုရရှိခဲ့ကြသူ များအားလည်းကောင်း၊ ဒုတိယညွှန်ကြားရေးမှူးချုပ်များနှင့် ဒုတိယပါမောက္ခချုပ်များက သိပ္ပံပွဲတော် အကောင်းဆုံး Logo ဆု၊ အကောင်းဆုံးပိုစတာဆုနှင့် အကောင်းဆုံးသိပ္ပံပြခန်း ဆုရရှိခဲ့ကြသူ များအားလည်းကောင်း ဂုဏ်ပြုဆုများ ပေးအပ်ချီးမြှင့်ကြကာ တာဝန်ရှိသူများက နိုင်ငံခြားသား စာတမ်းရှင်များအား ဂုဏ်ပြုလွှာများပေးအပ်သည်။

မြန်မာနိုင်ငံ ဝိဇ္ဇာနှင့်သိပ္ပံပညာရှင်အဖွဲ့၏ (၂၅) ကြိမ်မြောက် ငွေရတုသုတေသနညီလာခံနှင့် သိပ္ပံပွဲတော် (၂၀၂၆) ကို ဖေဖော်ဝါရီ ၅ ရက်မှ ၇ ရက် အထိကျင်းပခဲ့ပြီး ပြည်တွင်း ပြည်ပတက္ကသိုလ် အသီးသီးမှ သုတေသနပညာရှင်များက လူမှုရေး၊ စီးပွားရေးနှင့် သဘာဝပတ်ဝန်းကျင်ကဏ္ဍများရှိ ဘာသာရပ် ၃၃ မျိုးတွင် သုတေသနစာတမ်း ၃၁၂ စောင်နှင့် နိုင်ငံခြားစာတမ်း ၁၅ စောင်ကို ဖတ်ကြားတင်သွင်းခဲ့ကြကာ ရွေးချယ်ခံရသောပညာရှင်အဖွဲ့ဆုများ၊ အကောင်းဆုံးသုတေသန စာတမ်းဆုများနှင့် ဘာသာရပ်အလိုက် သုတေသနစာတမ်းဆုများကို စုစည်းတည်းဖြတ်၍ သုတေသနဂျာနယ်အဖြစ် ထုတ်ဝေဖြန့်ချိသွားမည်ဖြစ်ကြောင်း သိရသည်။