မြန်မာနိုင်ငံရှိ သံသတ္တုရိုင်းထွက်ရှိရာဒေသများနှင့် အသုံးပြုနိုင်သည့် သံနှင့်သံမဏိထုတ်လုပ်သည့်နည်းစဉ်များ၊တိုင်းဒေသကြီးနှင့်ပြည်နယ်အလိုက် သစ်/ဝါးပေါက်ရောက်မှုများပေါ် မူတည်၍ပျော့ဖတ်စက်ရုံများတည်ထောင်နိုင်ရေးတို့နှင့်စပ်လျဉ်းသည့် ညှိနှိုင်းအစည်းအဝေး

မြန်မာနိုင်ငံရှိ သံသတ္တုရိုင်းထွက်ရှိရာဒေသများနှင့် အသုံးပြုနိုင်သည့် သံနှင့်သံမဏိထုတ်လုပ်သည့်နည်းစဉ်များ၊တိုင်းဒေသကြီးနှင့်ပြည်နယ်အလိုက် သစ်/ဝါးပေါက်ရောက်မှုများပေါ် မူတည်၍ပျော့ဖတ်စက်ရုံများတည်ထောင်နိုင်ရေးတို့နှင့်စပ်လျဉ်းသည့် ညှိနှိုင်းအစည်းအဝေး

နေပြည်တော်၊ မတ် (၁၆)
    မြန်မာနိုင်ငံရှိ သံသတ္တုရိုင်းထွက်ရှိရာဒေသများနှင့် အသုံးပြုနိုင်သည့် သံနှင့်သံမဏိထုတ်လုပ်သည့်နည်းစဉ်များ၊ ပြည်နယ်နှင့်တိုင်းဒေသကြီးအလိုက် သစ်/ဝါး ပေါက်ရောက်မှု အခြေအနေများပေါ်မူတည်၍ ပျော့ဖတ်စက်ရုံများ တည်ထောင်နိုင်ရေးတို့နှင့်စပ်လျဉ်းသည့် ညှိနှိုင်းအစည်းအဝေးကို မတ်လ(၁၆)ရက်နေ့ နံနက်ပိုင်းတွင် စက်မှုဝန်ကြီးဌာန၌ ကျင်းပပြုလုပ်ရာ သယံဇာတနှင့် သဘာဝပတ်ဝန်းကျင်ထိန်းသိမ်းရေးဝန်ကြီးဌာန၊ ပြည်ထောင်စုဝန်ကြီး ဦးခင်မောင်ရီ၊ စက်မှုဝန်ကြီးဌာန၊ ပြည်ထောင်စုဝန်ကြီး ဒေါက်တာချာလီသန်း၊ သယံဇာတနှင့် သဘာဝပတ်ဝန်းကျင်ထိန်းသိမ်းရေးဝန်ကြီးဌာနမှ ဒုတိယဝန်ကြီးများဖြစ်ကြသည့် ဦးထွန်းအုံနှင့် ဦးမင်းသူ၊ သယံဇာတနှင့် သဘာဝပတ်ဝန်းကျင်ထိန်းသိမ်းရေးဝန်ကြီးဌာနနှင့် စက်မှုဝန်ကြီးဌာနတို့မှ အမြဲတမ်းအတွင်းဝန်၊ ညွှန်ကြားရေးမှူးချုပ်များ၊ ဦးဆောင်ညွှန်ကြားရေးမှူးများ၊ ဒုတိယညွှန်ကြားရေးမှူးချုပ်များနှင့် တာဝန်ရှိသူများတက်ရောက်သည်။
    ရှေးဦးစွာ စက်မှုဝန်ကြီးဌာန၊ ပြည်ထောင်စုဝန်ကြီးက ပြည်တွင်း၌ ကုန်ကြမ်းရရှိမှုအခြေအနေအပေါ်မူတည်၍ သံ၊ သံမဏိစက်ရုံများ တည်ထောင်နိုင်ရေးနှင့်စပ်လျဉ်းသည့် ကိစ္စ၊ သစ်၊ ဝါး ရရှိမှုူအပေါ်မူတည်ပြီး ပျော့ဖတ်စက်ရုံများ တည်ထောင်နိုင်ရေးတို့နှင့်စပ်လျဉ်း သည့်ကိစ္စများကို ဆွေးနွေးသွားမည်ဖြစ်ကြောင်း၊ နိုင်ငံတော်စီမံအုပ်ချုပ်ရေးကောင်စီဥက္ကဋ္ဌက “ကုန်ကြမ်းရရှိနိုင်မည့်အခြေအနေပေါ်မူတည်ပြီး သံမဏိစက်ရုံများ တည်ဆောက်နိုင်ရေးအတွက် စက်မှုဝန်ကြီးဌာနနှင့် သယံဇာတနှင့်သဘာဝပတ်ဝန်းကျင်ထိန်းသိမ်းရေးဝန်ကြီးဌာနတို့ ပူးပေါင်း၍ အကောင်အထည်ဖော်နိုင်မည့် Plan ရေးဆွဲတင်ပြရန်” လမ်းညွှန်မှုပြုခဲ့ပါကြောင်း၊ ယခုအချိန်တွင် မြန်မာနိုင်ငံ၏ သံနှင့်သံမဏိထုတ်လုပ်မှုလုပ်ငန်းသည် နိုင်ငံပိုင်အနေဖြင့် ကာကွယ်ရေးဝန်ကြီးဌာနတွင် စက်ရုံ(၁)ရုံ၊  စက်မှုဝန်ကြီးဌာနတွင် စက်ရုံ(၂)ရုံနှင့် မြန်မာစီးပွားရေးကော်ပိုရေးရှင်းတွင် စက်ရုံ(၃)ရုံရှိကြောင်း၊ ပုဂ္ဂလိကအနေဖြင့် ပြည်ထောင်စုနယ်မြေအပါအဝင် တိုင်းဒေသကြီး/ပြည်နယ်တို့တွင် ပုဂ္ဂလိကစက်မှုလုပ်ငန်း မှတ်ပုံတင်ပြုလုပ်ထားသည့် သံရည်ကျိုလုပ်ငန်းပေါင်း (၃၆၂)ခုတို့ဖြင့် မြန်မာနိုင်ငံ၏ သံနှင့်သံမဏိ လိုအပ်ချက်ကို ဖြည့်ဆည်းဆောင်ရွက်ပေးလျက်ရှိပြီး သံနှင့်သံမဏိထုတ်လုပ်မှုကဏ္ဍ ဖွံ့ဖြိုး တိုးတက်စေရန် ဆောင်ရွက်လျက်ရှိကြောင်း၊ ကာကွယ်ရေးဝန်ကြီးဌာနရှိ သံမဏိစက်ရုံ (ပြင်ဦးလွင်) နှင့် စက်မှုဝန်ကြီးဌာနရှိ အမှတ်(၂)သံမဏိစက်ရုံ (ပင်းပက်) စက်ရုံ(၂)တို့သာ သံသတ္တုရိုင်းမှ သံစိမ်းထုတ်လုပ်သည့် စက်ရုံများဖြစ်ကြောင်း၊ မြန်မာ့စီးပွားရေးကော်ပိုရေးရှင်းရှိ အမှတ်(၁)သံမဏိစက်ရုံ (ကျောက်ဆွယ်ကျိုး)နှင့် အမှတ်(၂)သံမဏိစက်ရုံ (မြောင်းတကာ) တို့သည် Semi-Product များဖြစ်သည့် သံမဏိလေးထောင့်တုံး (Steel Billet) နှင့် သံမဏိအထူပြား (Steel Slab) တို့ကို အသုံးပြု၍ ဆောက်လုပ်ရေးလုပ်ငန်းသုံး သံချောင်းလုံး၊ သံမဏိပြားနှင့် သံမဏိသံဘောင်များ ထုတ်လုပ်ပေးလျက်ရှိကြောင်း၊ ထို့အပြင် အမှတ်(၃) သံမဏိစက်ရုံ (ရွာမ)သည် သံမဏိဖြတ်စ (Steel Scrap) များကို အရည်ကျို၍ သံမဏိလေးထောင့်တုံးများ ထုတ်လုပ်ပေးလျက်ရှိပြီး ပုဂ္ဂလိကပိုင် သံရည်ကျိုလုပ်ငန်းများသည် သံတိုသံစ (Iron Scrap) နှင့် သံမဏိဖြတ်စ (Steel Scrap) များကို အသုံးပြု၍ အရည်ကျိုပုံသွန်းလောင်းခြင်းနှင့် ဆောက်လုပ်ရေးလုပ်ငန်းသုံး သံချောင်းလုံးများထုတ်လုပ်ခြင်းကို ဆောင်ရွက်လျက်ရှိ၍ သံသတ္တုရိုင်းမှ သံနှင့်သံမဏိထုတ်လုပ်မှုကို ဆောင်ရွက်နိုင်ခြင်း မရှိကြောင်း၊ နိုင်ငံတော်အကြီးအကဲ၏ အားပေးဆောင်ရွက်ပေးမှုနှင့် အမှတ်(၁)သံမဏိစက်ရုံ (မြင်းခြံ) ရှိ သံရည်ကျိုအလုပ်ရုံ (Melt Shop-1) ကို ယခုလအတွင်း ပြန်လည် လည်ပတ်၍ သံမဏိလေးထောင့်တုံး (Steel Billet) ထုတ်လုပ်နိုင်ရေးကြိုးစားဆောင်ရွက်လျက်ရှိကြောင်း၊ အမှတ်(၂)သံမဏိစက်ရုံ (ပင်းပက်)တွင် သံသတ္တုရိုင်းမှ သံစိမ်းထုတ်လုပ်ခြင်းလုပ်ငန်းကို ၂၀၂၃-၂၀၂၄ ခု ဘဏ္ဍာရေးနှစ်တွင် စတင်လည်ပတ်နိုင်ရေး ကြိုးစားဆောင်ရွက်လျက်ရှိကြောင်း၊ မြန်မာနိုင်ငံတွင် နှစ်စဉ်သံမဏိတန်ချိန် (၃)သန်းခန့် လိုအပ်သော်လည်း ပြည်တွင်း၌ တစ်နှစ်လျှင် (၁)သန်းခန့်သာ ထုတ်လုပ်နိုင်သည့်အတွက် သံမဏိတန်ချိန် (၂)သန်းခန့်ကို ပြည်ပမှ နိုင်ငံခြားငွေ (၁)ဘီလီယံကျော်ခန့်သုံးစွဲ၍ တင်သွင်းနေရကြောင်း၊ သံ၊ သံမဏိကဏ္ဍနှင့်ပတ်သက်၍ တိုင်းပြည်၏ နိုင်ငံခြားငွေသုံးစွဲမှုကို လျော့ကျစေရန်နှင့် သံနှင့်သံမဏိထုတ်လုပ်မှုလုပ်ငန်းများဖွံ့ဖြိုးလာစေရန် ရည်ရွယ်ပြီး ကမ္ဘာပေါ်တွင် သံနှင့်သံမဏိ ထုတ်လုပ်ခြင်းလုပ်ငန်းများ၌ အများဆုံးအသုံးပြုနေသည့် နည်းစဉ်များအပေါ် အားနည်းချက်၊ အားသာ ချက်၊ စိန်ခေါ်မှုနှင့် ခြိမ်းခြောက်နိုင်မှုများ ဆန်းစစ်ခြင်း၊ သံသတ္တုရိုင်းအတွင်း သံပါဝင်မှုအပေါ်မူတည်၍ ရွေးချယ်အသုံးပြုနိုင်သည့် နည်းစဉ်များကို အကြံပြုသုံးသပ်ခြင်းနှင့် အကောင်အထည်ဖော်မည့် အစီအစဉ်များကို ဆွေးနွေးသွားမည်ဖြစ်ကြောင်း၊ ထို့ကြောင့် တက်ရောက်လာသူများမှ သံနှင့်သံမဏိထုတ်လုပ်သည့် နည်းစဉ်များနှင့်ပတ်သက်၍ လေ့လာသိရှိထားသည်များကို အကြံပြုဆွေးနွေးပေးပါရန် ဖိတ်ခေါ်ပါကြောင်း ပြောကြားသည်။
    စက်မှုဝန်ကြီးဌာန၊ ပြည်ထောင်စုဝန်ကြီးက ဆက်လက်ပြောကြားရာတွင် တိုင်းဒေသကြီးနှင့် ပြည်နယ်အလိုက် သစ်/ဝါး ပေါက်ရောက်မှုအခြေအနေပေါ်မူတည်ပြီး ပျော့ဖတ်စက်ရုံများကို ဝါး/သစ်ကုန်ကြမ်းများ လွယ်လွယ်ကူကူနှင့် သယ်ယူထုတ်ယူနိုင်သည့် နေရာများ၊ ရေအရင်းအမြစ် အလွယ်တကူရရှိနိုင်မည့် နေရာများတွင် တည်ဆောက်ရမည်ဖြစ်သလို စက်ရုံမှထွက်ရှိမည့် စွန့်ပစ်ရေများကိုသန့်စင်ပြီး စနစ်တကျပြန်လည်စွန့်ထုတ်ရန် လိုအပ်သည့်အတွက် စက်ရုံတည်ဆောက်ရန် မြေနေရာရွေးချယ်မှုသည် အရေးကြီးပါကြောင်း၊ ထို့အပြင် ပျော့ဖတ်ချက်လုပ်ရာတွင် ထုံးကျောက်၊ ဆား၊ ကော့စတစ်ဆိုဒါနှင့် ဆိုဒီယမ်ဆာလဖိုဒ် စသည့်ဓာတုကုန်ကြမ်းများ လိုအပ်ပါကြောင်း၊ ထို့ကြောင့် ပျော့ဖတ်ဖြစ်လာအောင် အဓိကအသုံးပြုရသည့် ဝါး/သစ်ကုန်ကြမ်းများ လိုအပ်သည့်အပြင် ထုံးကျောက်နှင့် ဆားကုန်ကြမ်းများပါ တွဲဖက်အသုံးပြုရန် လိုအပ်သည့်အတွက် အဆိုပါကုန်ကြမ်းများရရှိနိုင်ရေး လွယ်ကူလက်လှမ်းမီသည့်နေရာများနှင့် ရေ၊ လျှပ်စစ်ဓာတ်အား၊ လောင်စာအရင်းအမြစ်များရရှိနိုင်ရန် လွယ်ကူသည့်နေရာများတွင် ရွေးချယ်ပြီး ပျော့ဖတ်စက်ရုံများတည်ထောင်ရမည်ဖြစ်ကြောင်း၊ နိုင်ငံတော်ဝန်ကြီးချုပ်၏ လမ်းညွှန်ချက်အရ မြန်မာနိုင်ငံရှိ သံသတ္တုရိုင်းထွက်ရှိရာဒေသများ၊ သံသတ္တုရိုင်းအတွင်း သံပါဝင်မှုအပေါ်မူတည်၍ အသုံးပြုနိုင်သည့် နည်းစဉ်များ၊ လိုအပ်သည့် ဆက်စပ်ကုန်ကြမ်းတွင်းထွက်များ ရရှိနိုင်မှု၊ စွမ်းအင်နှင့် လောင်စာ ပံ့ပိုးပေးနိုင်မှုတို့အပေါ် မူတည်၍ သံမဏိစက်ရုံများ အကောင်အထည်ဖော်နိုင်မယ့် အစီအမံများရေးဆွဲနိုင်ရန်နှင့် သစ်ဝါးကုန်ကြမ်းအရင်းအမြစ်များကိုအသုံးပြုပြီး ပျော့ဖတ်စက်ရုံများ တည်ထောင်ထုတ်လုပ်နိုင်ရေးတို့အတွက် တက်ရောက်လာသူများမှ ပွင့်ပွင့်လင်းလင်း ဝိုင်းဝန်းဆွေးနွေး အကြံပြုပေးကြရန် ထပ်မံဖိတ်ခေါ်ပါကြောင်း ပြောကြားသည်။
    ထို့နောက် သယံဇာတနှင့်သဘာဝပတ်ဝန်းကျင်ထိန်းသိမ်းရေးဝန်ကြီးဌာန၊ ပြည်ထောင်စုဝန်ကြီးက တိုင်းဒေသကြီးနှင့် ပြည်နယ်များတွင် သံမဏိစက်ရုံများ တည်ဆောက်နိုင်ရေးအတွက် သံသတ္တုရိုင်းနှင့် ဆက်စပ်ကုန်ကြမ်းရရှိနိုင်မှုအခြေအနေများကို ဆွေးနွေးသွားမည်ဖြစ်ကြောင်း၊ မြန်မာနိုင်ငံတွင် တစ်နှစ်လျှင် အမေရိကန်ဒေါ်လာ သန်း(၂၀၀)တန်ဖိုးရှိ စက္ကူများနှင့် သံမဏိတန်ချိန် (၂)သန်းခန့်ကို တင်သွင်းနေရကြောင်း၊ ထို့ကြောင့် ပြည်တွင်းမှ ထွက်ရှိသည့် သစ်တောသယံဇာတ၊ တွင်းထွက်သယံဇာတများကို အသုံးပြုပြီး ထုတ်လုပ်မည်ဆိုပါက နိုင်ငံခြားငွေသုံးစွဲရမှု သက်သာမည်ဖြစ်သည့်အပြင် သွင်းကုန်အစားထိုးဆောင်ရွက်နိုင်မည်ဖြစ်ကြောင်း၊ သံမဏိထုတ်လုပ်ရန်အတွက် သံသတ္တုရိုင်း (Iron Ore) သည် အဓိကလိုအပ်သည့် တွင်းထွက်ကုန်ကြမ်းဖြစ်ကြောင်း၊ သံသတ္တုရိုင်းအမျိုးအစားများဖြစ်သည့် ဟေမတိုက်၊ လီမွန်နိုက်၊ မဂနက်တိုက်၊ ရွှေသတ္တုသိုက်တို့သည် ယေဘူယျအားဖြင့် တွေ့ရှိမှုအများဆုံးဖြစ်ကြောင်း၊ တွေ့ရှိရသည့် သံသတ္တုရိုင်းသိုက်များတွင် သံသတ္တုပါဝင်မှု အမျိုးအစားများ ကွဲပြားနေသည်ကိုတွေ့ရှိရကြောင်း၊ သံမဏိထုတ်လုပ်ရန်အတွက် နည်းစဉ်အလိုက် ဆက်စပ်လိုအပ်သည့် ရွံ့စေး၊ ထုံးကျောက်၊ ဒိုလိုမိုက်၊ ဆီလီကာနှင့် ကျောက်မီးသွေးတို့လိုအပ်ကြောင်း၊ ထို့ကြောင့် သံမဏိစက်ရုံတည်ဆောက်ရာတွင် Iron Ore တစ်ခုတည်းဖြင့် ဆောင်ရွက်၍မရဘဲ အခြားဆက်စပ်တွင်းထွက်ပစ္စည်းများ ရရှိရေးအတွက်လည်း စဉ်းစားဆောင်ရွက်ရမည် ဖြစ်ကြောင်း၊ မြန်မာနိုင်ငံတွင် သံသတ္တုရိုင်းဖော်ထုတ်ကွက် (၃၄၈)ခု တန်ချိန် (၅၃၅)သန်းရှိကြောင်း ခန့်မှန်းတွက်ချက် မှတ်တမ်းတင်ထားကြောင်း၊ အဆိုပါ သံသတ္တုရိုင်းသိုက် (၃၄၈)ခုအနက် သံသတ္တုရိုင်းတန်ချိန်(၅)သိန်း ထွက်ရှိမှုနှင့်ဆက်စပ်တွင်းထွက်ပစ္စည်းများ ရရှိနိုင်မှုအခြေအနေများကို ယခုဆွေးနွေးပွဲတွင် ဆွေးနွေးသွားမည်ဖြစ်၍ သံမဏိစက်ရုံများ တည်ဆောက်နိုင်ရေးအတွက် ဦးစားပေးရွေးချယ်နိုင်မည်ဖြစ်ကြောင်း၊ စက္ကူစက်ရုံနှင့်ပျော့ဖတ်စက်ရုံများ တည်ဆောက်နိုင်ရေးအတွက် မြန်မာနိုင်ငံတွင် စာရင်းကောက်ယူထားသည့် ဝါးထွက်ရှိမှု ဧရိယာဧကအနေဖြင့် (၆၉.၆)သန်းရှိကြောင်း၊ တစ်နှစ်လျှင် ဝါးအလုံးရေ (၂၆၅) သန်းလုံး ထုတ်လုပ်နိုင်မည်ဖြစ်သော်လည်း (၁၄၅)သန်းလုံးသာ ထုတ်လုပ်သုံးစွဲနေသည်ကို တွေ့ရှိရကြောင်း၊ ဝါးပေါက်ရောက်မှုဧရိယာ စာရင်းများကို တစ်နိုင်ငံလုံးအတိုင်းအတာဖြင့် ကောက်ယူနိုင်မှုမရှိသေးသဖြင့် ဝါးအလုံးရေ (၂၆၅)သန်းထက် ပိုမိုထုတ်လုပ်နိုင်မည်ဖြစ်ကြောင်း၊ ဝါးနှင့်ကြီးမြန်သစ်ပင်များ စိုက်ပျိုးနိုင်မှုအခြေအနေများကိုလည်း ဆွေးနွေးသွားမည်ဖြစ်ကြောင်း၊ စက္ကူထုတ်လုပ်ရာတွင် ကုန်ကြမ်းအဖြစ် အသုံးပြုနိုင်သည့် ဝါးအမျိုးအစား (၆)မျိုး နှင့် စိုက်ပျိုးနိုင်သည့် ကြီးမြန်သစ်ပင်ဖြစ်သည့် မန်ဂျန်းရှား၊ ယူကလစ်၊ ယမနေ တို့ကို စိုက်ပျိုး နိုင်သည့် ဧရိယာ၊ ထုတ်ယူနိုင်သည့် ဝါးနှင့်သစ်တန်ပမာဏ၊ ပျော့ဖတ်ထွက်ရှိနိုင်မှုပမာဏတို့ကို တင်ပြဆွေးနွေးသွားမည်ဖြစ်ကြောင်း၊ ရေရှည်တွင် သစ်တောဧရိယာအတွင်းရှိသည့် တောနိမ့်၊ တောပါးဧရိယာများတွင် စက်မှုကုန်ကြမ်းအတွက် ပုဂ္ဂလိကသစ်တောစိုက်ခင်းများ တည်ထောင်နိုင်ပါကြောင်း၊ တစ်နိုင်ငံလုံးတွင် တင်ဒါစနစ်ဖြင့် သစ်တောစိုက်ခင်းများ တည်ထောင်နိုင်ရန် တောနိမ့်၊ တောပါးဧရိယာ (၃.၆၅)သန်းဧက ရှိသည့်အတွက် စက္ကူစက်ရုံများတည်ဆောက်နိုင်ရန်အတွက် ကုန်ကြမ်းများလုံလောက်မှုရှိပါကြောင်း၊ စိုက်ခင်းများတည်ထောင်စိုက်ပျိုးရေးအတွက် လုပ်ထုံးလုပ်နည်းများနှင့်အညီ ဆောင်ရွက်ပေးသွားမည်ဖြစ်ကြောင်း၊ သယံဇာတနှင့်သဘာဝပတ်ဝန်းကျင်ထိန်းသိမ်းရေးဝန်ကြီးဌာနအနေဖြင့် သံမဏိစက်ရုံများ တည်ဆောက်နိုင်ရေးနှင့် စက္ကူနှင့်ပျော့ဖတ်စက်ရုံများ တည်ဆောက်နိုင်ရေးအတွက် စက်မှုဝန်ကြီးဌာန၏ လိုအပ်ချက်များကို အစွမ်းကုန်ဖြည့်ဆည်းပေးသွားမည်ဖြစ်ကြောင်း ပြောကြားသည်။ 
    အစီအစဉ်အရ စက်မှုဝန်ကြီးဌာန၊ အမှတ်(၁)အကြီးစားစက်မှုလုပ်ငန်း၊ ဦးဆောင်ညွှန်ကြားရေးမှူးက မြန်မာနိုင်ငံရှိ သံသတ္တုရိုင်းထွက်ရှိရာဒေသများ၊ အသုံးပြုနိုင်သည့် သံနှင့်သံမဏိထုတ်လုပ်သည့် နည်းစဉ်များနှင့် သံမဏိစက်ရုံများ တည်ထောင်ဆောင်ရွက်သွားရန် ဆောင်ရွက်နိုင်မည့်အခြေအနေများအားလည်းကောင်း၊ အမှတ်(၃)အကြီးစားစက်မှုလုပ်ငန်း၊ ဦးဆောင်ညွှန်ကြားရေးမှူးက ပြည်နယ်နှင့်တိုင်းဒေသကြီးအလိုက် ပျော့ဖတ်စက်ရုံ များ တည်ဆောက်နိုင်ရန်အတွက် အခြေခံလိုအပ်သော ကုန်ကြမ်းများ၊ အရင်းအမြစ်များ အားလည်းကောင်း၊ သယံဇာတနှင့် သဘာဝပတ်ဝန်းကျင်ထိန်းသိမ်းရေးဝန်ကြီးဌာနမှ ညွှန်ကြားရေးမှူးချုပ်များ၊ ဦးဆောင်ညွှန်ကြားရေးမှူးများက သံမဏိစက်ရုံ၊ စက္ကူနှင့်ပျော့ဖတ်စက်ရုံများ တည်ဆောက်နိုင်ရေးအတွက် မြန်မာနိုင်ငံတွင် သစ်တောသယံဇာတနှင့်တွင်းထွက် သယံဇာတများ ထွက်ရှိမှုအခြေအနေတို့ကိုလည်းကောင်း အသီးသီးရှင်းလင်းတင်ပြရာ တက်ရောက်လာသူများမှ သိရှိလိုသည်များကို မေးမြန်းပြီး ပြည်ထောင်စုဝန်ကြီးများက နိဂုံးချုပ်အမှာစကားပြောကြား၍ အခမ်းအနားအား ရုပ်သိမ်းခဲ့ကြောင်း သတင်းရရှိသည်။
(သတင်းစဉ်)