ဒုတိယဝန်ကြီး ဒေါက်တာဇော်မြင့် ကျောင်းများပြန်လည်ဖွင့်လှစ်နိုင်ရေး ပြင်ဆင်ထားရှိမှု ကြည့်ရှုစစ်ဆေး

ဒုတိယဝန်ကြီး ဒေါက်တာဇော်မြင့် ကျောင်းများပြန်လည်ဖွင့်လှစ်နိုင်ရေး ပြင်ဆင်ထားရှိမှု ကြည့်ရှုစစ်ဆေး

နေပြည်တော် မေ ၃၀

ပညာရေးဝန်ကြီးဌာန ဒုတိယဝန်ကြီး ဒေါက်တာဇော်မြင့်နှင့် တာဝန်ရှိသူများသည် ယနေ့ နံနက်ပိုင်းတွင် Naypyitaw State Academy သို့ရောက်ရှိပြီး ဇွန် ၂ ရက်မှစတင် ဖွင့်လှစ်သင်ကြားမည့် စာသင်ခန်းများနှင့် လက်တွေ့ခန်းများ ပြင်ဆင်ထားရှိမှု၊ Naypyitaw State Academy အတွင်း ခြောက်ထပ်စာသင်ဆောင်သစ် ဆောက်လုပ်နေမှု၊ ကျောင်းသား ကျောင်းသူ အိပ်ဆောင်တည်ဆောက်နေမှုနှင့် ကျောင်းဥပဓိရုပ်ကောင်းမွန်စေရေး ဆောင်ရွက်ထားရှိမှုအခြေအနေများကို လှည့်လည်ကြည့်ရှုစစ်ဆေးသည်။

ကြည့်ရှုစစ်ဆေးစဉ် ဒုတိယဝန်ကြီးက စာသင်ခန်းများ၊ စာသင်ခုံများနှင့် စာသင်ဆောင်များအားလုံး စနစ်တကျ ပြင်ဆင်ဆောင်ရွက်ရေးနှင့် ဓာတ်ခွဲခန်းသုံးပစ္စည်းများကို ဓာတုပစ္စည်းနှင့် ဆက်စပ်ပစ္စည်းများ ထိန်းသိမ်းခြင်းဆိုင်ရာလိုက်နာရန် SOP စံသတ်မှတ်ချက်များအတိုင်း စနစ်တကျအသုံးပြုရေး ကိစ္စရပ်များကို ဆွေးနွေးမှာကြားပြီး လိုအပ်သည်များ ပေါင်းစပ်ညှိနှိုင်းဖြည့်ဆည်းဆောင်ရွက်ပေးသည်။

ထို့နောက် နေပြည်တော်ဇမ္ဗူသီရိမြို့နယ် အမှတ်(၉) အခြေခံပညာအထက်တန်းကျောင်းသို့ ရောက်ရှိပြီး ယာယီနေထိုင်ရေးစခန်း ပြောင်းရွှေ့ပြီးစီးမှုအခြေအနေကို ကြည့်ရှုစစ်ဆေးကာ ကျောင်းပရိဝုဏ်နှင့် စာသင်ခန်းများ၊ စာသင်ခုံများကို ကျောင်းပြန်လည်ဖွင့်လှစ်ရာတွင် အဆင်သင့်ဖြစ်စေရေးမှာကြားပြီး ကျောင်းဥပဓိရုပ်ကောင်းမွန်စေရေးနှင့် ကျောင်းတွင်းသန့်ရှင်းရေးတို့အတွက် ဆရာ ဆရာမများ၊ ဝန်ထမ်းများ၊ တပ်မတော်သားများနှင့် စည်ပင် သာယာရေးဝန်ထမ်းများစုပေါင်း၍ လုပ်အားပေးဆောင်ရွက်နေမှု အခြေအနေများကို ကြည့်ရှုအားပေးကာ လိုအပ်သည်များကို ပေါင်းစပ်ညှိနှိုင်းဖြည့်ဆည်း ဆောင်ရွက်ပေးခဲ့ကြောင်း သိရသည်။

သတင်းစဉ်