ပဲခူးတိုင်းဒေသကြီး၊ အုတ်တွင်းမြို့နယ်၌ ယာဉ်တိုက်မှုဖြစ်ပွား၍ အမျိုးသား တစ်ဦး သေဆုံးကာ အမျိုးသမီး တစ်ဦး ထိခိုက်ဒဏ်ရာရရှိ

ပဲခူးတိုင်းဒေသကြီး၊ အုတ်တွင်းမြို့နယ်၌ ယာဉ်တိုက်မှုဖြစ်ပွား၍ အမျိုးသား တစ်ဦး သေဆုံးကာ အမျိုးသမီး တစ်ဦး ထိခိုက်ဒဏ်ရာရရှိ

     ၂၀၂၆ ခုနှစ်၊ မတ် ၂၁ ရက်က ပဲခူးတိုင်းဒေသကြီး၊ အုတ်တွင်းမြို့နယ်၌ ယာဉ်တိုက်မှုဖြစ်ပွား၍ အမျိုးသား တစ်ဦး သေဆုံးကာ အမျိုးသမီး တစ်ဦး ထိခိုက်ဒဏ်ရာရရှိခဲ့ကြောင်း သိရသည်။

     ဖြစ်စဉ်မှာ မတ် ၂၁ ရက် နံနက် ၈ နာရီ ၃၀ မိနစ်တွင် ပဲခူးတိုင်းဒေသကြီး၊ အုတ်တွင်းမြို့နယ်၊ ဥယျာဉ်တော်ကျေးရွာ ရန်ကုန်-မန္တလေးလမ်းဟောင်း မိုင်တိုင်အမှတ် ၁၅၃ မိုင် ၃ ဖာလုံ၌ ယာဉ်တိုက်မှုဖြစ်ပွားကြောင်း သတင်းအရ အုတ်တွင်းမြို့မရဲစခန်းမှ တပ်ဖွဲ့ဝင်များပါဝင်သော ပူးပေါင်းအဖွဲ့က သွားရောက်စစ်ဆေးခဲ့ရာ အုတ်တွင်းမြို့မှ တောင်ငူမြို့ဘက်သို့ အုတ်တွင်းမြို့နယ်၊ ကြက်သွန်ခင်း (၂)ရပ်ကွက်နေ ဝင်းမောင်(၇၃)နှစ် မောင်းနှင်ပြီး ဇနီးဖြစ်သူ ဒေါ်စန်းစန်းအေး(၆၃)နှစ် လိုက်ပါလာသော ဆိုင်ကယ်သည် အခင်းဖြစ်နေရာအရောက်၌ လမ်းဖြတ်ကွေ့စဉ် တောင်ငူမြို့မှ အုတ်တွင်းမြို့ဘက်သို့ တောင်ငူမြို့နယ်၊ မင်းကြီးညိုရပ်ကွက်နေ ခွန်လွင်မိုး(၃၀)နှစ် မောင်းနှင်ပြီး တစ်ရပ်ကွက်တည်းနေ ဝေယံဖြိုး(၃၃)နှစ် လိုက်ပါလာသော BGO-2/5M-XXXX TOYOTA HILUX VIGO မော်တော်ယာဉ်နှင့် ဝင်ရောက်တိုက်မိခဲ့၍ ဝင်းမောင်တွင် ထိခိုက်ဒဏ်ရာများရရှိကာ အခင်းဖြစ်နေရာ၌ သေဆုံးသွားခဲ့ပြီး ဒေါ်စန်းစန်းအေးတွင် ထိခိုက်ဒဏ်ရာများ ရရှိခဲ့သဖြင့် ခွန်လွင်မိုးနှင့် ဝင်းမောင်တို့ နှစ်ဦးအား အုတ်တွင်းမြို့မရဲစခန်း ယာဉ်(ပ)၄/၂၀၂၆၊ ရာဇသတ်ကြီးပုဒ်မ ၃၀၄-က/၃၃၈/၂၇၉ ဖြင့် အမှုဖွင့်အရေးယူထားကြောင်း သတင်းရရှိပါသည်။