ပြည်ထောင်စုဝန်ကြီး Jeng Phang နော်တောင် အားကစားနှင့်ကာယပညာသိပ္ပံ (ရန်ကုန်) ကျောင်းရှိ သင်တန်းသား သင်တန်းသူများ၏ လေ့ကျင့်နေမှု လိုက်လံကြည့်ရှုစစ်ဆေး

ပြည်ထောင်စုဝန်ကြီး Jeng Phang နော်တောင် အားကစားနှင့်ကာယပညာသိပ္ပံ (ရန်ကုန်) ကျောင်းရှိ သင်တန်းသား သင်တန်းသူများ၏ လေ့ကျင့်နေမှု လိုက်လံကြည့်ရှုစစ်ဆေး

ရန်ကုန် ဇန်နဝါရီ ၁၅

မြန်မာနိုင်ငံအိုလံပစ်ကော်မတီဥက္ကဋ္ဌ၊ အားကစားနှင့် လူငယ်ရေးရာဝန်ကြီးဌာနနှင့် ဟိုတယ်နှင့်ခရီးသွားလာရေးဝန်ကြီးဌာန ပြည်ထောင်စုဝန်ကြီး Jeng Phang နော်တောင်သည် အားကစားနှင့်ကာယပညာဦးစီးဌာန ညွှန်ကြားရေးမှူးချုပ် ဦးဉာဏ်ဇော်ဦးနှင့်အတူ ယမန်နေ့ညနေပိုင်းတွင် ကျိုက္ကဆံကွင်းအတွင်းရှိ အားကစားနှင့်ကာယပညာသိပ္ပံ (ရန်ကုန်) မှ အုပ်ချုပ်/နည်းပြများနှင့် အားကစားသမားများ၏ အားကစားနည်းအလိုက် လေ့ကျင့်နေမှုများကို လိုက်လံကြည့်ရှုစစ်ဆေးသည်။

ဦးစွာ ပြည်ထောင်စုဝန်ကြီးသည် အားကစားနှင့်ကာယပညာသိပ္ပံ (ရန်ကုန်) မှ ရေကူး၊ ကရာတေး၊ လှေလှော်၊ လက်ဝှေ့၊ ဂျူဒို၊ ဗိုဗီနမ်၊ ဘော်လီဘော၊ ပိုက်ကျော်ခြင်း၊ အလေးမ၊ ပြေးခုန်ပစ်၊ ဘောလုံးနှင့် ဝူရှူးအားကစားအဖွဲ့များမှ အားကစားသမားများ၏ လေ့ကျင့်နေမှုများကို လိုက်လံကြည့်ရှုစစ်ဆေးသည်။

ထို့နောက် ပြည်ထောင်စုဝန်ကြီးသည် အုပ်ချုပ်/ နည်းပြများနှင့် အားကစားသမားများကို တွေ့ဆုံ၍ အားကစားနှင့်ကာယပညာသိပ္ပံ (ရန်ကုန်) ကျောင်း ကို ၁၉၉၇ ခုနှစ် ဩဂုတ် ၁ ရက်က စတင်ဖွင့်လှစ်ခဲ့ပြီး ယခုအချိန်တွင် မြန်မာ့လက်ရွေးစင်အမျိုးသားအားကစားသမား ၁၁၈ ဦး၊ အမျိုးသမီးအားကစားသမား ၈၇ ဦး စုစုပေါင်း ၂၀၅ ဦးကို မွေးထုတ်ပေးနိုင်ခဲ့ပါကြောင်း၊ အုပ်ချုပ်/နည်းပြများအနေဖြင့် အားကစားနည်းများအလိုက် ကြံ့ခိုင်မှု၊ စွမ်းဆောင်နိုင်မှု၊ နည်းစနစ်၊ နည်းဗျူဟာ၊ နည်းပရိယာယ်များကို တတ်ကျွမ်းနားလည်ပြီး အရည်အချင်းရှိသည့် အားကစားသမားကောင်းများ မွေးထုတ်ပေးနိုင်စေရေးအတွက် စနစ်တကျသင်ကြားလေ့ကျင့်မှုများနှင့် လေ့လာဆန်းစစ်မှုများ အမြဲမပြတ် ပြုလုပ်ပေးသွားစေလိုကြောင်း၊ အားကစားသမားများအနေဖြင့် ပညာရေးတွင် ထူးချွန်ထက်မြက်ပြီး အားကစားပိုင်းတွင်လည်း ထူးချွန်ထက်မြက်သည့် နိုင်ငံ့ဂုဏ်ဆောင် အားကစားသမားကောင်းများဖြစ်အောင် အမြဲတမ်းကြိုးစားလေ့ကျင့်သွားကြရန် တိုက်တွန်းမှာကြားခဲ့ကြောင်း သိရသည်။             

သတင်းစဉ်