မန္တလေးတိုင်းဒေသကြီး၊ သာစည်မြို့နယ်၌ ယာဉ်တိုက်မှုဖြစ်ပွား၍ အမျိုးသား တစ်ဦး သေဆုံး

မန္တလေးတိုင်းဒေသကြီး၊ သာစည်မြို့နယ်၌ ယာဉ်တိုက်မှုဖြစ်ပွား၍ အမျိုးသား တစ်ဦး သေဆုံး

     ၂၀၂၆ ခုနှစ်၊ ဖေဖော်ဝါရီ ၁၀ ရက်က မန္တလေးတိုင်းဒေသကြီး၊ သာစည်မြို့နယ်၌ ယာဉ်တိုက်မှု ဖြစ်ပွား၍ အမျိုးသား တစ်ဦး သေဆုံးခဲ့ကြောင်း သိရသည်။ 

     ဖြစ်စဉ်မှာ ဖေဖော်ဝါရီ ၁၀ ရက် မွန်းလွဲ ၂ နာရီ ၃၀ မိနစ်တွင် မန္တလေးတိုင်းဒေသကြီး၊ သာစည်မြို့နယ်၊ ပေသုံးဆယ်ရပ်ကွက်၊ မိတ္ထီလာ-တောင်ကြီးသွားကားလမ်း မိုင် တိုင်အမှတ် ၃၅ မိုင် ၆ ဖာလုံနှင့် ၇ ဖာလုံကြား၌ ယာဉ်တိုက်မှုဖြစ်ပွားကြောင်း သတင်းအရ ယင်းမာပင်နယ်မြေရဲစခန်းမှ တပ်ဖွဲ့ဝင်များက သွားရောက်စစ်ဆေးခဲ့ရာ တောင်ကြီးမြို့နေ ဇော်ဖြိုးဝေ(၃၂)နှစ် မောင်းနှင်လာသည့် MDY-17/9M-XXXX JINBEI HAISE MINIBUS မော်တော်ယာဉ်သည် မိတ္ထီလာမြို့မှ တောင်ကြီးမြို့ ဘက်သို့ မောင်းနှင်လာစဉ် အခင်းဖြစ်နေရာအရောက်၌ လမ်းမပေါ်မှ နွားများအား ရှောင်တိမ်းရာမှ အရှိန်မထိန်းနိုင်ဘဲ နွားကျောင်းနေသည့် ပေသုံးဆယ်ရပ်ကွက်နေ ကိုနောင်(ခ) ကျော်နောင်(၄၅)နှစ်အား ဝင်ရောက်တိုက်မိခဲ့သဖြင့် ကိုနောင်(ခ)ကျော်နောင်တွင် ထိခိုက်ဒဏ်ရာများရရှိကာ အခင်းဖြစ်နေရာ၌ သေဆုံးသွားခဲ့သောကြောင့် ဇော်ဖြိုးဝေ အား ယင်းမာပင်နယ်မြေရဲစခန်း ယာဉ်(ပ)၁/၂၀၂၆၊ ရာဇသတ်ကြီးပုဒ်မ ၃၀၄-က ဖြင့် အမှုဖွင့်အရေးယူထားကြောင်း သတင်းရရှိပါသည်။