အဖျက်အမှောင့် အနှောင့်အယှက်များ ရောနှောပါဝင် မလာစေရန် သတိပြု

အဖျက်အမှောင့် အနှောင့်အယှက်များ ရောနှောပါဝင် မလာစေရန် သတိပြု

နယ်သာလန်နိုင်ငံ၊ သည်ဟိတ်ဂ်မြို့ရှိ အပြည်ပြည်ဆိုင်ရာ တရားရုံး (ICJ) တွင် တရားရင်ဆိုင်လျက်ရှိသည့် မြန်မာကိုယ်စားလှယ်အဖွဲ့နှင့်အတူ မြန်မာပြည်သူများက ရပ်တည်ထောက်ခံလျက်ရှိကြောင်း ပြသနေကြသည်။ မြန်မာနိုင်ငံနှင့် လွန်စွာအလှမ်းဝေးကွာလှသည့် အာဖရိကတိုက်အနောက်ပိုင်းရှိ ဂမ်ဘီယာနိုင်ငံက OIC အဖွဲ့၏ကိုယ်စား မြန်မာနိုင်ငံကို စွဲဆိုသည့် ထိုအမှုသည် မြန်မာနိုင်ငံ၏ အချုပ်အခြာအာဏာ၊ ဂုဏ်သိက္ခာနှင့် အမျိုးသားအကျိုးစီးပွားတို့ကို ထိခိုက်စေသည်ဟု မြန်မာပြည်သူတစ်ရပ်လုံးက နားလည်ထားကြသည်။

ရခိုင်ပြည်နယ် မြောက်ပိုင်းတွင် ၂၀၁၆ ခုနှစ်နှင့် ၂၀၁၇ ခုနှစ်တို့အတွင်းက ဖြစ်ပွားခဲ့သည့် ဖြစ်စဉ်များသည် မြန်မာနိုင်ငံအင်္ဂလိပ်လက်အောက်သို့ ကျရောက်ခဲ့သည့်ကာလ ဘင်္ဂလားနယ်စစ်တကောင်းဒေသမှလူများကို လယ်ယာလုပ်သားလိုအပ်ချက်အတွက် ခေါ်ယူခဲ့ခြင်းမှ မြစ်ဖျားခံခဲ့ခြင်းဖြစ်သည်။ အစောပိုင်းကာလက လယ်ယာလုပ်ငန်းသိမ်းချိန်တွင် ၎င်းတို့ဒေသများသို့ ပြန်သွားခဲ့ကြသော်လည်း နောက်ပိုင်းတွင် မိသားစုဆွေမျိုးများကိုပါ ခေါ်ယူလာကာ အခြေချနေလာကြသည်။ အိန္ဒိယမှ မြန်မာနိုင်ငံကို ခွဲထုတ်ချိန်တွင် စစ်တကောင်းသား ဘင်္ဂါလီလူမျိုးအများအပြား မြန်မာနိုင်ငံဘက်သို့ ဝင်ရောက်ခဲ့ကြခြင်းကြောင့် ၎င်းတို့လူဦးရေ တစ်ဟုန်ထိုး တိုးတက်လာသည်။ ဒုတိယကမ္ဘာစစ်ကြီးစတင်ချိန် ဗြိတိသျှတို့ မြန်မာနိုင်ငံမှ ဆုတ်ခွာသည့်အခါ ဘင်္ဂါလီတို့ထံတွင် လက်နက်များပေးအပ်ခဲ့ရာမှ မူဂျာဟစ်အကြမ်းဖက်လှုပ်ရှားမှုပေါ်လာသည်။ ဒေသခံရခိုင်တိုင်းရင်းသား ထောင်ပေါင်းများစွာ ရက်စက်စွာသတ်ဖြတ်ခံခဲ့ရပြီးရာနှင့်ချီသည့် ရခိုင်ကျေးရွာများ အပြီးတိုင်ပျောက်ကွယ်သွားခဲ့သည်။ ယင်းသို့သော နောက်ခံသမိုင်းကြောင်းရှိနေသည့် လူ့အသိုက်အဝန်းနှစ်ခုတို့ကြားတွင် ငြိမ်းချမ်းစွာ အတူယှဉ်တွဲနေထိုင်ရေးနှင့် သဟဇာတရှိသည့် လူ့အဖွဲ့အစည်းဖြစ်ထွန်းရေးအတွက် ခေတ်အဆက်ဆက်အစိုးရတို့ ကြိုးပမ်းဆောင်ရွက်ခဲ့ကြရသည်။ ရခိုင်ပြည်နယ်တွင် ကမန်တိုင်းရင်းသား အစ္စလာမ်ဘာသာဝင်များနှင့် ငြိမ်းချမ်းစွာနေထိုင်လိုကြသည့် ဘင်္ဂါလီလူမျိုး အစ္စလာမ်ဘာသာဝင်များစွာတို့မှာ ဌာနေတိုင်းရင်းသားရခိုင်လူမျိုးများ၊ အခြားတိုင်းရင်းသားလူမျိုးများနှင့် ပြဿနာတစ်စုံတစ်ရာမရှိဘဲ အေးချမ်းစွာနေထိုင်နေကြခြင်းဖြစ်သည်။

ဖဆပလခေတ် မူဂျာဟစ်တို့မှသည် ယခု ARSA တို့အထိ အကြမ်းဖက်လှုပ်ရှားမှုများ၏ နောက်တွင် ပြည်ပမှကြိုးကိုင်မှုများ၊ ကူညီထောက်ပံ့မှုများရှိနေပြီး ၎င်းတို့၏ရည်ရွယ်ချက်မှာ နယ်မြေရယူရန်ဖြစ်သည်ဟု မြန်မာပြည်သူအားလုံးက ယုံကြည်ထားကြသည်။ ၎င်းတို့က ၂၀၁၆ ခုနှစ်နှင့် ၂၀၁၇ ခုနှစ်တို့တွင် ဖြစ်ပွားခဲ့သည့် ဖြစ်စဉ်များမှသည် ယခုအပြည်ပြည်ဆိုင်ရာ တရားရုံးသို့ရောက်ရှိသည်အထိ အကွက်ချစီစဉ်ညွှန်ကြား ဆောင်ရွက်ခဲ့ကြခြင်းဖြစ်ရာ ယခုကဲ့သို့ မြန်မာကိုယ်စားလှယ်များ သွားရောက်၍ တရားရင်ဆိုင်နေကြသည်မှာလည်း နိုင်ငံကို ရှေ့တန်းကျကျ ကာကွယ်နေကြခြင်းဖြစ်သည်ဟု ရှုမြင်ကြသည့်အလျောက် မြန်မာပြည်သူများက အင်တိုက်အားတိုက်ထောက်ခံ အားပေးနေကြခြင်းပင်ဖြစ်သည်။ ယင်းသို့ထောက်ခံအားပေးကြရာတွင် နိုင်ငံရေးပါတီများ၊ အဖွဲ့အစည်းများ၊ တစ်သီးပုဂ္ဂလလူပုဂ္ဂိုလ်များ စသည်ဖြင့် အသီးသီးအားပေးနေကြခြင်းဖြစ်ရာ မြန်မာကိုယ်စားလှယ်အဖွဲ့အတွက် စိတ်ဓာတ်ခွန်အားကို ဖြစ်စေသည်။

တစ်ဖက်တွင်လည်း ထောက်ခံအားပေးမှုများအကြားတွင် နိုင်ငံနှင့်လူမျိုး၏ပုံရိပ်ကို ကျဆင်းစေနိုင်သည့်၊ တရားရင်ဆိုင် နေရဆဲအခြေအနေကို အနှောင့်အယှက်ဖြစ်စေသည့် အဖျက်အမှောင့်၊ အနှောင့်အယှက်များ ရောနှောပါဝင်မလာစေရန်လည်း အထူးသတိပြုကြရန်နှင့် အထူးကြပ်မတ်ထိန်းသိမ်းကြရန် ဆော်သြလိုသည်။ မြန်မာနိုင်ငံနှင့် မြန်မာလူမျိုးတို့၏ နိုင်ငံ ချစ်စိတ်၊ မျိုးချစ်စိတ်နှင့်အတူ ယဉ်ကျေးမှု၊ စည်းလုံးညီညွတ်မှု၊ စည်းကမ်းတကျရှိမှုတို့ကို ကမ္ဘာကသိအောင်ပြသကာ အမှန်တရားနှင့် တရားမျှတမှုရရှိရေး တိုက်ပွဲဝင်နေကြသည့် မြန်မာကိုယ်စားလှယ်အဖွဲ့အား ကူညီအားဖြည့်ကြရပါမည့်အကြောင်း။ ။