အရှေ့တောင်အာရှ အားကစားပြိုင်ပွဲတွင် မြန်မာနိုင်ငံကိုယ်စားပြု ပါဝင်ယှဉ်ပြိုင်မည့် မြန်မာအမျိုးသမီးလက်ရွေးစင်ဘောလုံးအသင်း ထိုင်းနိုင်ငံသို့ထွက်ခွာ

အရှေ့တောင်အာရှ အားကစားပြိုင်ပွဲတွင် မြန်မာနိုင်ငံကိုယ်စားပြု ပါဝင်ယှဉ်ပြိုင်မည့် မြန်မာအမျိုးသမီးလက်ရွေးစင်ဘောလုံးအသင်း ထိုင်းနိုင်ငံသို့ထွက်ခွာ

ရန်ကုန် ဒီဇင်ဘာ ၂

(၃၃)ကြိမ်မြောက် အရှေ့တောင်အာရှ အားကစားပြိုင်ပွဲတွင် မြန်မာနိုင်ငံကိုယ်စားပြု ပါဝင်ယှဉ်ပြိုင်မည့် မြန်မာအမျိုးသမီး လက်ရွေးစင်ဘောလုံးအသင်းသည် ယနေ့နံနက်ပိုင်းတွင် ထိုင်းနိုင်ငံချွန်ဘူရီမြို့သို့ လေကြောင်းခရီးဖြင့် ထွက်ခွာသွားကြသည်။

အဆိုပါ မြန်မာနိုင်ငံကိုယ်စားပြု မြန်မာအမျိုးသမီးလက်ရွေးစင် ဘောလုံးအသင်းကို ရန်ကုန်အပြည်ပြည်ဆိုင်ရာလေဆိပ်၌ အားကစားချစ်မြတ်နိုးသူ ပြည်သူများ၊ ပရိသတ်များက လာရောက်တွေ့ဆုံ အားပေးကြသည်။

မြန်မာအမျိုးသမီးဘောလုံးအသင်းသည် ဒီဇင်ဘာ ၅ ရက်တွင် ဖိလစ်ပိုင်နိုင်ငံအသင်းနှင့် လည်းကောင်း၊ ဒီဇင်ဘာ ၈ ရက်တွင် မလေးရှားနိုင်ငံအသင်းနှင့်လည်းကောင်း၊ ဒီဇင်ဘာ ၁၁ ရက်တွင် ဗီယက်နမ်နိုင်ငံအသင်းနှင့်လည်းကောင်း ယှဉ်ပြိုင်ကစားကြမည်ဖြစ်သည်။

ထိုကဲ့သို့ အရှေ့တောင်အာရှ အားကစားပြိုင်ပွဲတွင် ပြိုင်ဘက်နိုင်ငံအသင်းများကို အနိုင်မခံ၊ အရှုံးမပေးသော စိတ်ဓာတ်ဖြင့် ယှဉ်ပြိုင်ကစားပြီး နိုင်ငံ့ဂုဏ်ကို မြှင့်တင်စွမ်းဆောင်ပေးမည့် ဆုတံဆိပ်များ ဆွတ်ခူးရရှိရေးအတွက် ကြိုးပမ်းလေ့ကျင့်နေမှုနှင့် စပ်လျဉ်း ၍ မြန်မာနိုင်ငံကိုယ်စားပြု မြန်မာအမျိုးသမီးလက်ရွေးစင် ဘောလုံးအသင်းမှ နည်းပြနှင့် အားကစားသမားများ၏ ရင်တွင်းစကားသံများ၊ အားကစားချစ်ပရိသတ်များ၏ ရင်ခုန်မျှော်လင့်မှု စကားသံများကို စုစည်းဖော်ပြအပ်ပါသည်။

Mr.UKI TETSURO

(အသင်းနည်းပြချုပ်-ဂျပန်)

ကျွန်တော်တို့ အသင်းအနေနဲ့ ပြိုင်ပွဲတိုင်းမှာ နောက်ဆုံးအချိန်အထိ အားမာန်အပြည့်နဲ့ ပါဝင်ယှဉ်ပြိုင်ကစားသွားမှာဖြစ်ပြီးတော့ ခံစစ်ကောင်းကောင်းကနေ တိုက် စစ်ကိုတန်ပြန်ကစားနိုင်အောင် သေချာပြင်ဆင်ထားပါတယ်။ အသင်းအနေနဲ့နည်းပြ၊ အုပ်ချုပ် သူ ၁၁ ဦး၊ ကစားသမား ၂၃ ဦးနဲ့ စုစုပေါင်း ၃၄ ဦး သွားရောက်မှာ ဖြစ်ပါတယ်။ ပြိုင်ပွဲအတွက် ပြင်ဆင်မှုဆိုရင် ပထမဆုံးလူရွေးချယ်ရာမှာ ကစားသမားတွေကိုခေါ်ယူပြီး မျှမျှတတယှဉ်ပြိုင်မှုကနေ တစ်ဆင့်ရွေးချယ်ခဲ့ပါတယ်။ အပြီးသတ်လူရွေးချယ်မှု မထုတ်ပြန်မီမှာလည်း နည်းပြဆရာတွေနဲ့ အကြိမ်ကြိမ်ဆွေးနွေးပြီး သေချာစဉ်းစားပြီးတော့ လူရွေးချယ်ခဲ့တာဖြစ်ပါတယ်။

ပြင်ဆင်ချိန်အနေနဲ့ ပြောရရင်အသင်းအနေနဲ့ ဂျပန်ကပြန်လာပြီး အာဆီယံပွဲမှာ ပြိုင်ခဲ့တယ်။ အာဆီယံပွဲပြီးတဲ့အခါ ဆက်လက် လေ့ကျင့်မှုတွေနဲ့ ဆီးဂိမ်းအတွက် အသင့်ပြင်ဆင်ခဲ့ပါတယ်။ အမျိုး သမီးဘောလုံးပြိုင်ပွဲမှာ Group နှစ်ခုရှိပြီး ကျွန်တော်တို့ Group မှာ ဗီယက်နမ်၊ မလေးရှား၊ ဖိလစ် ပိုင်အသင်းတို့ ပါပါတယ်။ ပြိုင်ဘက် အသင်းတွေရဲ့ အခြေအနေကို သုံးသပ်ပြီး ကြိုတင်ပြင်ဆင်ထားတယ်။ သူတို့ဘက်ကလည်း ကျွန်တော်တို့နဲ့ ယှဉ်ပြိုင်ဖို့ အကောင်းဆုံး ကြိုတင်ပြင်ဆင်ထားမှာဖြစ်တဲ့အတွက် လွယ်ကူတဲ့ပြိုင်ပွဲတော့ မဟုတ်ပါဘူး။

ဒါကြောင့် ပွဲတိုင်းကို သေချာပြင်ဆင်ပြီး ယှဉ်ပြိုင်ကစားသွားမှာပါ။ မြန်မာပရိသတ်တွေဟာ အသင်းအပေါ်ကို မျှော်လင့်ချက် ထားတာကြောင့် နောက်ဆုံးမိနစ်အထိ ပွဲတိုင်းမှာ မဆုတ်မနစ်နဲ့ အစွမ်းကုန်ကြိုးစားသွားမယ်လို့ ကတိပေးပါတယ်။ အမြဲတမ်း မြန်မာအမျိုးသမီးအသင်းအပေါ်ကို နွေးနွေးထွေးထွေးနဲ့ အားပေးစကားတွေ ပြောကြားမှုအပေါ် အထူးကျေးဇူးတင်ပါတယ်။ အခုလိုအရေးကြီးတဲ့ပြိုင်ပွဲရှိလာပြီဆိုရင် ပရိသတ်ရဲ့အားပေးမှုဟာ အသင်းအတွက် ခွန်အားများစွာရရှိ စေပါတယ်။ ပွဲတိုင်းမှာ အကောင်းဆုံး ယှဉ်ပြိုင်ကစားသွားမယ်၊ ပရိသတ်တွေရဲ့အားပေးမှုကို လည်း စောင့်မျှော်နေပါတယ်။

ဝင်းသိင်္ဂီထွန်း

(ရှေ့တန်းတိုက်စစ်မှူး၊ ကျောနံပါတ်-၇)

ဆီးဂိမ်းပြိုင်ပွဲမှာ အသင်းအနေနဲ့ တစ်သင်းစီတိုင်းကို အာရုံစိုက်ပြီး ကျော်ဖြတ်သွားမှာပါ။ ယှဉ်ပြိုင်ရမယ့် အသင်းတွေဟာ ခြေမကွာကြဘူး။ ဒါကြောင့် ပွဲတိုင်းကို အာရုံစိုက်ပြီး ကြိုးစားရပါမယ်။ အုပ်စုတက်ဖို့အတွက် အားသွန်ခွန်စိုက် ဟန်ချက်ညီညီ စည်းစည်းလုံးလုံးနဲ့ ယှဉ်ပြိုင်သွားမှာပါ။ ဘယ်အသင်းကိုမှ လျှော့မတွက်ထားပါဘူး။

နိုင်ငံကိုယ်စားပြု မြန်မာအမျိုးသမီးအသင်းကို တာဝန်ကျေစွာ အားပေးနေကြတဲ့ နိုင်ငံတစ်ဝန်းက ချစ်ပရိသတ်ကြီးကို ရင်ထဲကနေ လှိုက်လှိုက်လှဲလှဲ ကျေးဇူးတင် ပါတယ်။ ပြိုင်ပွဲနေ့တွေမှာ ထိုင်းမှာဖြစ်စေ၊ ကိုယ့်နိုင်ငံက ရုပ်သံလိုင်းတွေကနေတစ်ဆင့်ဖြစ်စေ အားပါးတရ ခွန်အားဖြည့် အားပေးကြပါလို့ ဖိတ်ခေါ်ဂါရဝပြုပါတယ်။ ဆီးဂိမ်းကနေ ကျွန်တော်တို့တွေ နားထောင်နေမှာပါ။ ကိုယ်စွမ်းဉာဏ်စွမ်းရှိသမျှ အကောင်းဆုံး ယှဉ်ပြိုင်ပြီး ပရိသတ်တွေလိုချင်တဲ့ ရလဒ်ကောင်းတွေ ပိုင်ဆိုင်နိုင်အောင် ကြိုးစားပေးသွားပါ့မယ်။

စန်းသော်သော်

(ရှေ့တန်းတိုက်စစ်မှူး၊ ကျောနံပါတ် ၈)

ပြိုင်ပွဲအတွက် သင်တန်းနည်းပြတွေနဲ့အတူ သေသေချာချာ ပြင်ဆင်ထားပါတယ်။ အကောင်းဆုံးစွမ်းဆောင်မှုနဲ့ ယှဉ်ပြိုင်သွားမှာပါ။ မြန်မာအမျိုးသမီးအသင်းကို အားပေးကြတဲ့ ပရိသတ်အားလုံးကို ဒီကနေ ဂါရဝပြုပါတယ်။ ဘောလုံးအားကစားဆိုတာ အသင်းအဖွဲ့ပုံစံနဲ့ ယှဉ်ပြိုင်ကစားရတာဖြစ်တဲ့အတွက် အားပေးရာမှာ တစ်ဦးတစ်ယောက်တည်းကိုမဟုတ်ဘဲ အားလုံးကို မျှဝေပြီးအားပေးခြင်းဟာ အောင်မြင်မှုပန်းတိုင်ကို ပိုပြီးခိုင်မာစေပါတယ်။ အားပေးမှု ဟာ အသင်းအတွက်အသက်ပါပဲ။ မြန်မာပြည်က ချစ်ပရိသတ်တွေ အတွက် ရာနှုန်းပြည့် အနိုင်ရရှိ အောင် အဓိကထား အာရုံစိုက်ထားပါတယ်။

သဲဆုမွန်၊ အေးသီကျော်၊ နီဘိုဘိုကျော်

(ကြိုဆိုကြသည့် ပရိသတ်များ)

ဆီးဂိမ်းပြိုင်ပွဲမှာ သွားရောက်ယှဉ်ပြိုင်ကြမယ့် အမျိုးသမီးဘောလုံးအသင်းကို အားပေးဖို့ မနက် ၄ နာရီကတည်းက လေဆိပ်ကိုရောက်နေတာပါ။ မြန်မာအမျိုး သမီးတွေရဲ့ စွမ်းဆောင်မှုနဲ့ နိုင်ငံတကာနဲ့အညီ ရင်ပေါင်တန်း လုပ်ဆောင်နိုင်မှုကို လေးစားတာကြောင့်ပါ။ ပြည်တွင်းပြိုင်ပွဲမဟုတ်ဘဲ အရှေ့တောင်အာရှဆီးဂိမ်း ပြိုင်ပွဲဆိုတော့ ပြိုင်ပွဲဝင် တခြားနိုင်ငံတွေကို ကျော်ဖြတ်ပြီး ဆုတွေအသီးသီးနဲ့ပြန်လာရင် အကောင်းဆုံးကြိုဆိုဖို့ ပြင်ဆင်ထားပါတယ်။

မြန်မာအမျိုးသမီး ဘောလုံးအသင်းက အားကစားသမား အားလုံးကို အားပေးပါတယ်၊ အထူးသဖြင့် မေထက်လူနဲ့ ဇွန်ယုယဦးကို ပိုပြီးသဘောကျပါတယ်။ ဖြစ်နိုင်ရင် ထိုင်းနိုင်ငံအထိလိုက်ပါပြီး အားပေးချင်တာပါ။ အခုလို အသင်းလိုက်တွေ့ရတော့ စိတ်လှုပ်ရှားပြီး ပျော်ရပါတယ်။ ပြန်လာရင်လည်း အားပါးတရ ကြိုဆိုမှာပါ။ သူတို့လည်း အစွမ်းကုန် ကြိုးစားသွားကြမှာဖြစ်တဲ့အတွက် နိုင်ငံ့ဂုဏ်ဆောင်ရွှေတံဆိပ်တွေနဲ့ ရွှေရောင်လွှမ်းပါစေလို့ ဆုတောင်းပေးပါတယ်။ ထိခိုက်ဒဏ်ရာလည်း ကင်းပါစေ။

မြန်မာအမျိုးသမီး ဘောလုံးအသင်းကို ချစ်ပါတယ်။ သူတို့ကို အပြစ်ပြောတာ မကြိုက်ပါဘူး။ ဘာဖြစ်လို့လဲဆိုတော့ ဘယ်အရာမှ လွယ်လွယ်ကူကူ ရလေ့မရှိတာကို သိသင့်ပါတယ်။ ဒါကြောင့် အမှားလေးတွေရှိရင် နားလည်ခွင့်လွှတ်ပြီး ဆုတံဆိပ်တွေနဲ့ အတူတူ ပြန်လာချိန်အတွက် ကြိုတင်ပြင်ဆင်ပြီး အားပေးသွား ကြဖို့လိုပါတယ်။ ယှဉ်ပြိုင်ရတဲ့ ပြိုင်ပွဲထဲမှာ နိုင်ငံကိုယ်စားပြုဆိုတာ အင်မတန်တာဝန်ကြီးတယ်ဆိုတာ သူတို့က ပိုပြီးသိပြီးသားပါ။ ကျွန်မတို့အဖွဲ့ကတော့ အားပါးတရ အားပေးကြမှာပါ။ သူတို့အတွက်လည်း ဂုဏ်ယူတယ်။ မြန်မာအမျိုးသမီးတွေအနေနဲ့ ကြိုးစားရင်ကြိုးစားသလောက် အကျိုးရှိတယ်ဆိုတာ အမျိုးသမီးဘောလုံးအသင်းကို စံနမူနာယူလို့ ရပါတယ်။

တွေ့ဆုံမေးမြန်း - သစ္စာ(MNA) ဓာတ်ပုံ - ဇွဲမာန်