ချင်းပြည်နယ်၊ တီးတိန်မြို့နယ်၌ CDF-Zoland အမည်ခံ အကြမ်းဖက်အဖွဲ့က ဖမ်းဆီးခေါ်ဆောင် သွားခဲ့သည့် ပညာရေးဝန်ထမ်း တစ်ဦး ပြန်လည်လွတ်မြောက်

ချင်းပြည်နယ်၊ တီးတိန်မြို့နယ်၌ CDF-Zoland အမည်ခံ အကြမ်းဖက်အဖွဲ့က ဖမ်းဆီးခေါ်ဆောင် သွားခဲ့သည့် ပညာရေးဝန်ထမ်း တစ်ဦး ပြန်လည်လွတ်မြောက်

     လက်နက်ကိုင်အကြမ်းဖက်အဖွဲ့များသည် တိုင်းဒေသကြီးနှင့် ပြည်နယ်များရှိ မြို့၊ ရွာများ အတွင်း တိုက်ပွဲများဖော်ဆောင်ခြင်း၊ လက်နက်ကြီးများဖြင့် အဝေးမှ ပစ်ခတ်ခြင်း၊ Drone ဖြင့် Drop Bomb များ ပစ်ချတိုက်ခိုက်ခြင်း၊ လက်လုပ်ဗုံး၊ လက်လုပ်မိုင်းများဖြင့် မိုင်းထောင်ဖောက်ခွဲ တိုက်ခိုက်ခြင်းများအား လုပ်ဆောင်လျက်ရှိသည့်အပြင် နိုင်ငံ့ဝန်ထမ်းများကို ပစ်မှတ်ထားဖမ်းဆီး၍ ခြိမ်းခြောက်ငွေတောင်းခံခြင်း၊ သတ်ဖြတ်ခြင်းများစသော လူသားချင်းမစာနာသည့် လူမဆန်သော အကြမ်းဖက်မှုများနှင့် ရာဇဝတ်မှုများအား ကျူးလွန်လုပ်ဆောင်လျက်ရှိပါသည်။

     ထိုသို့ လုပ်ဆောင်လျက်ရှိရာ ၂၀၂၅ ခုနှစ်၊ ဩဂုတ် ၂၅ ရက် နံနက် ၈ နာရီ ၃၀ မိနစ်တွင် ချင်းပြည်နယ်၊ တီးတိန်မြို့နယ်၊ ဆိုင်းဇန်ကျေးရွာနေ အခြေခံပညာအထက်တန်းကျောင်း(ဆိုင်းဇန်)မှ ခေတ္တကျောင်းအုပ်ဆရာမဖြစ်သူ ဒေါ်ကျင်းဆန်းကိမ်(ခ)သီတာဆန်း(၃၅)နှစ်သည် ၎င်း၏နေအိမ်၌ ရှိနေစဉ် CDF-Zoland အမည်ခံ အကြမ်းဖက်အဖွဲ့က ခြိမ်းခြောက်၍ ဖမ်းဆီးခေါ်ဆောင်သွားခဲ့ပြီး “ကျောင်းဖွင့်လှစ်ခြင်း မပြုလုပ်ရန်” ခြိမ်းခြောက်ပြောဆိုကာ စက်တင်ဘာ ၂ ရက် နံနက် ၉ နာရီတွင် မျက်နှာအားအဝတ်ဖြင့်စည်းလျက် မော်တော်ဆိုင်ကယ်ဖြင့်ခေါ်ဆောင်၍ ဆိုင်းဇန်ကျေးရွာအနီးရှိ ရှာလ်တန်ချောင်းဘေးသို့ ပို့ဆောင်ပေးခဲ့သဖြင့် နေအိမ်သို့ ပြန်လည်ရောက်ရှိခဲ့ကြောင်း သိရသည်။

     အထက်ပါဖြစ်စဉ်မှ ပညာရေးဝန်ထမ်း တစ်ဦးအား ဖမ်းဆီးခေါ်ဆောင်၍ ခြိမ်းခြောက်ခြင်းများ ပြုလုပ်ခဲ့သည့် အကြမ်းဖက်သမားများအား ဖော်ထုတ်ဖမ်းဆီးအရေးယူနိုင်ရေးနှင့် နယ်မြေဒေသ တည်ငြိမ်အေးချမ်းအတွက် လုံခြုံရေးတပ်ဖွဲ့ဝင်များက လိုအပ်သည့် လုံခြုံရေးလုပ်ငန်းစဉ်များနှင့်အညီ ဆက်လက်ဆောင်ရွက်လျက်ရှိကြောင်း သတင်းရရှိပါသည်။