ချင်းပြည်နယ်၊ တီးတိန်မြို့နယ်၌ PDF အမည်ခံ အကြမ်းဖက်သမားများက လက်နက်ကြီးဖြင့် ပစ်ခတ်တိုက်ခိုက်ခဲ့မှုကြောင့် အဆောက်အအုံ အချို့ ဗုံးသီးပေါက်ကွဲစ ထိမှန်ပျက်စီး

ချင်းပြည်နယ်၊ တီးတိန်မြို့နယ်၌ PDF အမည်ခံ အကြမ်းဖက်သမားများက လက်နက်ကြီးဖြင့် ပစ်ခတ်တိုက်ခိုက်ခဲ့မှုကြောင့် အဆောက်အအုံ အချို့ ဗုံးသီးပေါက်ကွဲစ ထိမှန်ပျက်စီး

     အကြမ်းဖက်သမားများသည် အေးချမ်းစွာ နေထိုင်လျက်ရှိသော ပြည်သူများ ထိခိုက်ဒဏ်ရာ ရရှိစေရန်နှင့် အကြောက်တရားများလွှမ်းမိုးစေရန် ရည်ရွယ်ချက်များဖြင့် ဖမ်းဆီးသတ်ဖြတ်ခြင်း၊ ရပ်ကွက်/ကျေးရွာများအတွင်းသို့ လက်နက်ကြီး၊ လက်နက်ငယ်များ၊ Drone ဖြင့် Drop Bomb များ ပစ်ချတိုက်ခိုက်ခြင်းများအား ဆင်ခြင်တုံတရားကင်းမဲ့စွာ ပြုလုပ်လျက်ရှိသည်။

     ထိုသို့ လုပ်ဆောင်လျက်ရှိရာ ၂၀၂၅ ခုနှစ်၊ ဒီဇင်ဘာ ၂၇ ရက် နံနက် ၂ နာရီ ၁၅ မိနစ်တွင် ချင်းပြည်နယ်၊ တီးတိန်မြို့နယ်၊ မြို့မရပ်ကွက်၌ PDF အမည်ခံ အကြမ်းဖက်သမားများက အများပြည်သူ ထိခိုက်စေရန် ရည်ရွယ်၍ လက်နက်ကြီးဖြင့် ပစ်ခတ်တိုက်ခိုက်ခဲ့ရာ အဆိုပါရပ်ကွက်ရှိ တီးတိန်မြို့နယ် ပြည်သူ့ဆေးရုံဝင်းအတွင်း လက်နက်ကြီးဗုံးသီး သုံးလုံး ကျရောက်ပေါက်ကွဲခဲ့မှုကြောင့် ဆေးရုံရှိ ဓာတ်ခွဲခန်းနှင့် ဝန်ထမ်းလိုင်းခန်းများ၏ ပြတင်းပေါက်မှန် နှစ်ချပ်၊ အမိုးသွပ် နှစ်ချပ်နှင့် မျက်နှာကြက်များ ဗုံးသီးပေါက်ကွဲစ ထိမှန်ပျက်စီးဆုံးရှုံးခဲ့ကြောင်း သိရသည်။

     ထိုသို့ အပြစ်မဲ့ အရပ်သားပြည်သူများ အေးချမ်းစွာ နေထိုင်လျက်ရှိသော ရပ်ကွက်/ကျေးရွာ များအတွင်းသို့ လက်နက်ကြီး၊ လက်နက်ငယ်၊ Drop Bomb များဖြင့် ပစ်ခတ်တိုက်ခိုက်ခြင်းများအား ဆင်ခြင်တုံတရားကင်းမဲ့စွာ ပြုလုပ်နေမှုများကြောင့် ဆေးရုံအဆောက်အအုံများ ထိခိုက်ပျက်စီးခဲ့မှု အပေါ် ဒေသခံပြည်သူများက လုံးဝလက်ခံနိုင်ခြင်းမရှိဘဲ ဆန့်ကျင်ကန့်ကွက်လျက်ရှိကြောင်းနှင့် လုံခြုံရေးတပ်ဖွဲ့ဝင်များက လိုအပ်သော လုံခြုံရေးလုပ်ငန်းများကို ပြည်သူလူထုနှင့် ပူးပေါင်းကာ တိုးမြှင့်လုပ်ဆောင်လျက်ရှိကြောင်း သတင်းရရှိသည်။