ဒုတိယဝန်ကြီး ဒေါက်တာသန်းစိုး ကုလသမဂ္ဂဒုက္ခသည်များဆိုင်ရာ မဟာမင်းကြီးရုံး၏ မြန်မာနိုင်ငံဆိုင်ရာ ကိုယ်စားလှယ်အား လက်ခံတွေ့ဆုံ

ဒုတိယဝန်ကြီး ဒေါက်တာသန်းစိုး ကုလသမဂ္ဂဒုက္ခသည်များဆိုင်ရာ မဟာမင်းကြီးရုံး၏ မြန်မာနိုင်ငံဆိုင်ရာ ကိုယ်စားလှယ်အား လက်ခံတွေ့ဆုံ

နေပြည်တော် ဇူလိုင် ၃၀

လူမှုဝန်ထမ်း၊ ကယ်ဆယ်ရေးနှင့် ပြန်လည်နေရာချထားရေးဝန်ကြီးဌာန ဒုတိယဝန်ကြီး ဒေါက်တာသန်းစိုးသည် ကုလသမဂ္ဂဒုက္ခသည်များဆိုင်ရာမဟာမင်းကြီးရုံး(UNHCR)၏ မြန်မာနိုင်ငံ ဆိုင်ရာကိုယ်စားလှယ် Ms. Noriko Takagi အား ယနေ့မွန်းလွဲပိုင်းတွင် အဆိုပါဝန်ကြီးဌာန ဧည့်ခန်းမ၌ လက်ခံတွေ့ဆုံသည်။

တွေ့ဆုံစဉ် နိုင်ငံတော်အစိုးရက ငလျင်ပြန်လည်ထူထောင်ရေးဆိုင်ရာလုပ်ငန်းများနှင့် “အဆောက်အအုံများ ပြန်လည်ပြုပြင်အသုံးပြုရေးနှင့် အသစ်တည်ဆောက်ရေးကြီးကြပ်မှုကော်မတီ” ဖွဲ့စည်း၍ ငလျင်သင့်ဒေသများရှိ အဆောက်အအုံများစစ်ဆေးခြင်း၊ ပျက်စီးမှုအဆင့်တိုင်းတာခြင်း၊ ပြန်လည်နေထိုင်နိုင်မှု၊ ပြုပြင်ရန်လိုအပ်မှု၊ ဖျက်ဆီးရန်လိုအပ်မှုများ ခွဲခြားသတ်မှတ်ဆောင်ရွက်နေမှု၊ ငလျင်ဘေးသင့်သူ များအတွက် UNHCR မှ ကူညီထောက်ပံ့ပေးနေမှု၊ လူမှုဝန်ထမ်း၊ ကယ်ဆယ်ရေးနှင့် ပြန်လည်နေရာ ချထားရေးဝန်ကြီးဌာနနှင့် UNHCR အကြား နားလည်မှုစာချွန်လွှာ(MoU) အမြန်ဆုံးလက်မှတ်ရေးထိုးနိုင်ရေး ကိစ္စရပ်များကို ရင်းနှီးပွင့်လင်းစွာ အမြင်ချင်းဖလှယ်ဆွေးနွေးကြသည်။

တွေ့ဆုံပွဲသို့ ဘေးအန္တရာယ်ဆိုင်ရာစီမံခန့်ခွဲမှုဦးစီးဌာန ညွှန်ကြားရေးမှူးချုပ်၊ ဒုတိယအမြဲတမ်း အတွင်းဝန်နှင့်တာဝန်ရှိသူများ၊ UNHCR ရုံးမှ ကိုယ်စား လှယ်များ တက်ရောက်ကြသည်။

သတင်းစဉ်