ပြည်ထောင်စုဝန်ကြီး Jeng Phang နော်တောင် ရန်ကုန်မြို့ရှိ အားကစားကွင်း/အားကစားရုံများနှင့် စခန်းသွင်းလေ့ကျင့်နေသည့် အားကစားအဖွဲ့များအား ကြည့်ရှုစစ်ဆေး

ပြည်ထောင်စုဝန်ကြီး Jeng Phang နော်တောင် ရန်ကုန်မြို့ရှိ အားကစားကွင်း/အားကစားရုံများနှင့် စခန်းသွင်းလေ့ကျင့်နေသည့် အားကစားအဖွဲ့များအား ကြည့်ရှုစစ်ဆေး

ရန်ကုန် ဇွန် ၁၂

မြန်မာနိုင်ငံအိုလံပစ်ကော်မတီဥက္ကဋ္ဌ အားကစားနှင့်လူငယ်ရေးရာဝန်ကြီးဌာန ပြည်ထောင်စုဝန်ကြီး Jeng Phang နော်တောင်၊ အားကစားနှင့်ကာယပညာဦးစီးဌာန ညွှန်ကြားရေးမှူးချုပ် ဦးဉာဏ်ဇော်ဦးတို့သည် ယမန်နေ့မွန်းလွဲပိုင်းတွင် ရန်ကုန်မြို့ တာမွေမြို့နယ် အားကစားနှင့်ကာယပညာသိပ္ပံ(ရန်ကုန်) ကျိုက္ကဆံအားကစားကွင်းအတွင်းရှိ နပန်းအားကစားရုံနှင့် ပဏာမလက်ရွေးစင်အားကစားသမားများထားရှိရာ လေးထပ်အိပ်ဆောင်ရှိ စားရိပ်သာ၊ ချက်ပြုတ်ဆောင်၊ စတိုခန်းတို့ကို ကြည့်ရှုစစ်ဆေးသည်။

ကြည့်ရှုအားပေး

ထို့နောက် တာမွေမြို့နယ်ရှိ ဘိုးလင်းအားကစားရုံသို့ ရောက်ရှိပြီး မြန်မာနိုင်ငံ ဘိုးလင်းအားကစားအဖွဲ့ချုပ်ဥက္ကဋ္ဌနှင့်တွေ့ဆုံ၍ (၃၃)ကြိမ်မြောက် အရှေ့တောင်အာရှ အားကစားပြိုင်ပွဲအတွက် လူရွေးချယ်ရေး၊ စနစ်တကျပါဝင်ယှဉ်ပြိုင်နိုင်ရေး၊ ဆုတံဆိပ်ရရှိအောင် ဆောင်ရွက်နိုင်ရေးတို့ကို ဆွေးနွေးပြောကြားပြီး ပဏာမလက်ရွေးစင်ဘိုးလင်း အားကစားသမားများနှင့် ဉာဏ်ရည်မသန်စွမ်း လက်ရွေးစင်အားကစားသမားများ လေ့ကျင့်နေမှုတို့ကို ကြည့်ရှုအားပေးသည်။

ယင်းနောက် သုဝဏ္ဏအားကစားဇုန်နယ်မြေအတွင်းရှိ အမျိုးသားဂေါက်သီးရိုက် လေ့ကျင့်ရေးကွင်း မြေနေရာနှင့် အမျိုးသားအားကစားပြိုင်ပွဲရုံ(၁)သုဝဏ္ဏတို့ကို လှည့်လည်ကြည့်ရှုစစ်ဆေး၍ လိုအပ်သည်များမှာကြားပြီး အမျိုးသားအားကစားပြိုင်ပွဲ ရုံ(၁)သုဝဏ္ဏ၌ (၃၃)ကြိမ်မြောက် အရှေ့တောင်အာရှအားကစားပြိုင်ပွဲအတွက် စခန်းဝင်လေ့ကျင့်နေသော ပဏာမလက်ရွေးစင် ဘိလိယက်နှင့် စနူကာအားကစားသမားများ လေ့ကျင့်နေမှုတို့ကို ကြည့်ရှုအားပေးသည်။

ဆက်လက်၍ ပြည်ထောင်စုဝန်ကြီးနှင့်အဖွဲ့သည် လူငယ်အားကစား လေ့ကျင့်ရေးစခန်းသုဝဏ္ဏရှိ တိုက်ကွမ်ဒိုအားကစားရုံသို့ရောက်ရှိပြီး ပဏာမလက်ရွေးစင်တိုက်ကွမ်ဒို အားကစားသမားများ လေ့ကျင့်နေမှုနှင့် ပိုက်ကျော်ခြင်းအားကစားရုံ၌ ပဏာမလက်ရွေးစင်ပိုက်ကျော်ခြင်း အားကစားသမားများ လေ့ကျင့်နေမှုတို့ကို ကြည့်ရှုအားပေးပြီး လိုအပ်သည်များ မှာကြားခဲ့ကြောင်း သိရသည်။

သတင်းစဉ်