ပြည်ထောင်စုဝန်ကြီး ဦးကျော်စိုးဝင်း နေပြည်တော် ဟိုတယ်ဇုန် (၂) အတွင်းရှိ ဟိုတယ်များ ကြည့်ရှုစစ်ဆေး

ပြည်ထောင်စုဝန်ကြီး ဦးကျော်စိုးဝင်း နေပြည်တော် ဟိုတယ်ဇုန် (၂) အတွင်းရှိ ဟိုတယ်များ ကြည့်ရှုစစ်ဆေး

နေပြည်တော် ဇူလိုင် ၁၆

ဟိုတယ်နှင့်ခရီးသွားလာရေးဝန်ကြီးဌာန ပြည်ထောင်စုဝန်ကြီး ဦးကျော်စိုးဝင်းသည် ယနေ့မွန်းလွဲပိုင်းတွင် ဒုတိယဝန်ကြီး ဦးဖြိုးဇော်စိုး၊ အမြဲတမ်းအတွင်းဝန်၊ ညွှန်ကြားရေးမှူးချုပ်နှင့်အတူ ပြည်ထောင်စုနယ်မြေနေပြည်တော် ဥတ္တရသီရိမြို့နယ် ဟိုတယ်ဇုန် (၂) အတွင်းရှိ ဟိုတယ်များ မန္တလေးမြေငလျင်ကြီးကြောင့် ထိခိုက်ပျက်စီးခဲ့မှုများအပေါ် ပြန်လည်တည်ဆောက်ရေးလုပ်ငန်းများ ဆောင်ရွက်နေမှုအခြေအနေများကို ကြည့်ရှုစစ်ဆေးသည်။

ကြည့်ရှုစစ်ဆေးစဉ် ပြည်ထောင်စုဝန်ကြီးအား တာဝန်ရှိသူများက မန္တလေးငလျင်ကြီးကြောင့် ဟိုတယ်များ၏ ထိခိုက်ပျက်စီးမှုများကို ပြန်လည်ပြုပြင်မွမ်းမံဆောင်ရွက်နေမှုအခြေအနေ၊ အပြာရောင်အဆင့်ရှိ အဆောက်အအုံများကို မွမ်းမံပြင်ဆင်၍ ပြန်လည်ဖွင့်လှစ်နိုင်ရေး ဆောင်ရွက်နေမှုအခြေအနေ၊ ထိခိုက်ပျက်စီးမှုမရှိသည့် အဆောက်အအုံ၊ အခန်းများ၌ ဧည့်သည်များ လာရောက်တည်းခိုနေထိုင်နိုင်အောင် ဖွင့်လှစ်ထားရှိမှုအခြေအနေနှင့် လုပ်ငန်းများ လည်ပတ်ဆောင်ရွက်နေမှုအခြေအနေများကို ရှင်းလင်းတင်ပြကြရာ ပြည်ထောင်စုဝန်ကြီးက ဟိုတယ်များအနေဖြင့် ပြန်လည်တည်ဆောက်ပြုပြင်မွမ်းမံရေး ဆောင်ရွက်ကြရာတွင် ဘေးအန္တရာယ်ကင်းရှင်းရေးကို အထူးဂရုပြုဆောင်ရွက်ကြရန်လိုအပ်ပါကြောင်း၊ ထိခိုက်ပျက်စီးခဲ့သော်လည်း လူနေထိုင်နိုင်သည့် (အပြာရောင်အဆင့် သတ်မှတ်ထားသည့်) အခန်းများနှင့် ခန်းမများကို အသိအမှတ်ပြုအင်ဂျင်နီယာအဖွဲ့များဖြင့် စနစ်တကျပြုပြင်မွမ်းမံ၍ ဧည့်သည်များ ပိုမိုလက်ခံနိုင်ရေး၊ ဝန်ဆောင်မှုကောင်းများပေးနိုင်ရေး အမြန်ဆုံးဆောင်ရွက်ကြရန် လိုအပ်ပါကြောင်း၊ ဟိုတယ်များအနေဖြင့် ပြန်လည်တည်ဆောက်ရေးလုပ်ငန်းများ ဆောင်ရွက်ကြရာတွင် မြို့တော်အင်္ဂါရပ်နှင့်အညီ သန့်ရှင်းသာယာလှပရေးကိုပါ အထူးအလေးထားဆောင်ရွက်ကြရန် မှာကြားခဲ့ကြောင်း သိရသည်။

သတင်းစဉ်