ရန်ကုန်တိုင်းဒေသကြီး၊ သန်လျင်မြို့နယ်နှင့် တိုက်ကြီးမြို့နယ်တို့၌ ယာဉ်တိုက်မှုဖြစ်ပွား၍ အမျိုးသား နှစ်ဦး သေဆုံး

ရန်ကုန်တိုင်းဒေသကြီး၊ သန်လျင်မြို့နယ်နှင့် တိုက်ကြီးမြို့နယ်တို့၌ ယာဉ်တိုက်မှုဖြစ်ပွား၍ အမျိုးသား နှစ်ဦး သေဆုံး

     ၂၀၂၆ ခုနှစ်၊ မေ ၁၅ ရက်က ရန်ကုန်တိုင်းဒေသကြီး၊ သန်လျင်မြို့နယ်နှင့် တိုက်ကြီးမြို့နယ်တို့၌ ယာဉ်တိုက်မှုဖြစ်ပွား၍ အမျိုးသား နှစ်ဦး သေဆုံးခဲ့ကြောင်း သိရသည်။

     ဖြစ်စဉ်မှာ မေ ၁၅ ရက် နံနက် ၁၀ နာရီ ၅၀ မိနစ်တွင် ရန်ကုန်တိုင်းဒေသကြီး၊ သန်လျင်မြို့နယ်၊ ခြောက်လမ်းသွားလမ်း၊ မိုးကောင်းဘုရားအနီး၌ ယာဉ်တိုက်မှုဖြစ် ပွားကြောင်း သတင်းအရ သန်လျင်မြို့မရဲစခန်းမှ တပ်ဖွဲ့ဝင်များပါဝင်သော ပူးပေါင်းအဖွဲ့က သွားရောက်စစ်ဆေးရာ ခြောက်လမ်းသွားလမ်းအတိုင်း မြောက်မှတောင်သို့ သန်လျင်မြို့နယ်၊ စစ်ပင်ကွင်းကျေးရွာနေ ကိုဆန်းရှိုင်းကိုကို(၂၉)နှစ် မောင်းနှင်သော YGN-19 4G/XXXX HYUNDAI ခရီးသည်တင်ယာဉ်သည် အခင်းဖြစ်နေရာအရောက်၌ လားရာတူရှေ့မှ သန်လျင်မြို့နယ်၊ ဘောသပြေကန်ကျေးရွာနေ ဦးသန်းနိုင်(၆၁)နှစ် စီးနင်းနေသော စက်ဘီးအား အရှိန်မထိန်းနိုင်ဘဲ နောက်မှဝင်ရောက်တိုက်မိခဲ့သဖြင့် ဦးသန်းနိုင်တွင် ဒဏ်ရာများရရှိကာ သေဆုံးသွားခဲ့သောကြောင့် ဆန်းရှိုင်းကိုကို အား သန်လျင်မြို့မရဲစခန်း ယာဉ်(ပ)၁၆/၂၀၂၆၊ ရာဇသတ်ကြီး ပုဒ်မ ၃၀၄-က/၂၇၉ ဖြင့် လည်းကောင်း။

     အလားတူ မေ ၁၅ ရက် ညနေ ၆ နာရီတွင် တိုက်ကြီးမြို့နယ်၊ ရန်ကုန်-ပြည်လမ်းမပေါ် ခြောက်တိုင်ကွေ့ကျေးရွာအနီး၌ ယာဉ်တိုက်မှုဖြစ်ပွားကြောင်း သတင်းအရ တိုက်ကြီးမြို့မရဲစခန်းမှ တပ်ဖွဲ့ဝင်များ ပူးပေါင်းအဖွဲ့က သွားရောက်စစ်ဆေးခဲ့ရာ အဆိုပါနေရာ၌ မြောက်မှတောင်သို့ တိုက်ကြီးမြို့နယ်၊ ရှမ်းစုရပ်ကွက်နေ ဦးအောင်အောင်(၃၉)နှစ် မောင်းနှင်လာသော YGN-1 3J/XXXX TOYOTA LIGHT TRUCK ယာဉ်သည် အခင်းဖြစ်နေရာအနီးအရောက်တွင် ၎င်းရှေ့မှ တိုက်ကြီးမြို့နယ်၊ မင်္ဂလာရပ်ကွက်နေ ဦးကျော်မျိုးလှိုင်(၄၇)နှစ် စီးနင်းလာသော စက်ဘီးအား အရှိန်မထိန်းနိုင်ဘဲ နောက်မှ ဝင်တိုက်မိခဲ့သဖြင့် ဦးကျော်မျိုးလှိုင်တွင် ဒဏ်ရာများရရှိကာ သေဆုံးသွားခဲ့သောကြောင့် အောင်အောင် အား တိုက်ကြီးမြို့မရဲစခန်း ယာဉ်(ပ)၁၂/၂၀၂၆၊ ရာဇသတ်ကြီးပုဒ်မ ၃၀၄-က/၂၇၉ ဖြင့် အမှုဖွင့်အရေးယူထားကြောင်း သတင်းရရှိပါသည်။