ရန်ကုန်တိုင်းဒေသကြီး၊ သာကေတမြို့နယ်နှင့် ပြည်ထောင်စုနယ်မြေ၊ နေပြည်တော်၊ ဒက္ခိဏသီရိမြို့နယ်တို့၌ လိုင်စင်မဲ့မော်တော်ယာဉ်များ ဖမ်းဆီးရမိ

ရန်ကုန်တိုင်းဒေသကြီး၊ သာကေတမြို့နယ်နှင့် ပြည်ထောင်စုနယ်မြေ၊ နေပြည်တော်၊ ဒက္ခိဏသီရိမြို့နယ်တို့၌ လိုင်စင်မဲ့မော်တော်ယာဉ်များ ဖမ်းဆီးရမိ

   ၂၀၂၅ ခုနှစ်၊ ဒီဇင်ဘာ ၆ ရက်က ရန်ကုန်တိုင်းဒေသကြီး၊ သာကေတမြို့နယ်နှင့် ပြည်ထောင်စုနယ်မြေ၊ နေပြည်တော်၊ ဒက္ခိဏသီရိမြို့နယ်တို့၌ လိုင်စင်မဲ့မော်တော်ယာဉ်များ ဖမ်းဆီးရမိခဲ့ကြောင်း သိရသည်။

   ဖြစ်စဉ်မှာ ဒီဇင်ဘာ ၆ ရက် ညနေ ၃ နာရီ ၂၀ မိနစ်တွင် ရန်ကုန်တိုင်းဒေသကြီး၊ သာကေတမြို့နယ်၊ အမှတ်(၆)ယာဉ်ထိန်းရဲဒုတပ်ဖွဲ့ခွဲမှ တပ်ဖွဲ့ဝင်များက ဝေဇယန္တာလမ်းနှင့် ဧရာဝဏ်လမ်းတို့၌ ယာဉ်စစ်ဆေးခြင်းများ ဆောင်ရွက်နေစဉ် ခရမ်းမြို့နယ်၊ အမှတ်(၁၂)ရပ်ကွက်နေ ရဲထက်အောင်(၂၈)နှစ် မောင်းနှင်လာသည့် YGN-13 5J-XXXX HONDA INSIGHT ယာဉ်အား ရပ်တန့်စစ်ဆေးခဲ့ရာ အဆိုပါ မော်တော်ယာဉ်နှင့်ပတ်သက်သည့် အထောက်အထားတစ်စုံတစ်ရာ ပြသနိုင်ခြင်းမရှိဘဲ လိုင်စင်မဲ့ယာဉ် ဖြစ်ကြောင်း စစ်ဆေးသိရှိရသဖြင့် ရဲထက်အောင်အား သာကေတမြို့မရဲစခန်း (ပ)၆၆၃/၂၀၂၅၊ ပို့ကုန်သွင်းကုန် ဥပဒေပုဒ်မ ၈ ဖြင့်လည်းကောင်း။

   အလားတူ ညနေ ၅ နာရီ ၁၀ မိနစ်တွင် ပြည်ထောင်စုနယ်မြေ၊ နေပြည်တော်၊ ဒက္ခိဏသီရိမြို့နယ်၊ ဒက္ခိဏသီရိဈေးအနီးတွင် လိုင်စင်မဲ့မော်တော်ယာဉ်များ အရောင်းအဝယ်ပြုလုပ်နေကြောင်း သတင်းအရ အမှတ်(၄)ယာဉ်ထိန်းရဲတပ်ဖွဲ့စုမှ တပ်ဖွဲ့ဝင်များက သွားရောက်စစ်ဆေးခဲ့ရာ ဒက္ခိဏသီရိရပ်ကွက်နေသူများဖြစ်သည့် လမင်းထွန်း(၂၇)နှစ်ထံမှ YGN-18 2K-XXXX HONDA INSIGHT ခဲရောင်မော်တော်ယာဉ် တစ်စီးနှင့် သိန်းထွန်းဦး(၅၉)နှစ်ထံမှ MDY-7 1N-XXXX HONDA FIT SHUTTLE အဖြူရောင်မော်တော်ယာဉ် တစ်စီးတို့အား တွေ့ရှိရ၍ စစ်ဆေးခဲ့ရာ အဆိုပါမော်တော်ယာဉ်များနှင့်ပတ်သက်သည့် အထောက်အထား တစ်စုံတစ်ရာ ပြသနိုင်ခြင်းမရှိဘဲ လိုင်စင်မဲ့ယာဉ်များဖြစ်ကြောင်း စစ်ဆေးသိရှိရသဖြင့် လမင်းထွန်းနှင့် သိန်းထွန်းဦးတို့အား ဒက္ခိဏသီရိမြို့မရဲစခန်း (ပ)၆၈-၆၉/၂၀၂၅၊ ပို့ကုန်သွင်းကုန်းဥပဒေပုဒ်မ ၈ ဖြင့်လည်းကောင်း အသီးသီး အမှုဖွင့်အရေးယူထားကြောင်း သတင်းရရှိပါသည်။