မြန်မာနိုင်ငံ လူမွဲခံယူခြင်းဆိုင်ရာ ကျွမ်းကျင်သူများအသင်း၏ ပဉ္စမအကြိမ် နှစ်ပတ်လည်အထွေထွေအစည်းအဝေးကျင်းပ

မြန်မာနိုင်ငံ လူမွဲခံယူခြင်းဆိုင်ရာ ကျွမ်းကျင်သူများအသင်း၏ ပဉ္စမအကြိမ် နှစ်ပတ်လည်အထွေထွေအစည်းအဝေးကျင်းပ

ရန်ကုန် ဒီဇင်ဘာ ၆

မြန်မာနိုင်ငံလူမွဲခံယူခြင်းဆိုင်ရာ ကျွမ်းကျင်သူများအသင်း၏ ပဉ္စမအကြိမ် နှစ်ပတ်လည်အထွေထွေအစည်းအဝေးကို ယနေ့နံနက် ၁၀ နာရီတွင် ရန်ကုန်မြို့ အဆင့်မြင့် စာရင်းကိုင်နှင့် စာရင်းစစ်သင်တန်းကျောင်း၌ Video Conference စနစ်ဖြင့် ကျင်းပသည်။

ဦးစွာ ပြည်ထောင်စုစာရင်း စစ်ချုပ်လူမွဲခံယူခြင်းဆိုင်ရာ ကျွမ်းကျင်သူများကြီးကြပ်ရေးကောင်စီဥက္ကဋ္ဌ ဒေါက်တာခင်နိုင်ဦးက Video Message ဖြင့် မြန်မာနိုင်ငံလူမွဲခံယူခြင်းဆိုင်ရာ ကျွမ်းကျင်သူများအသင်းသည် စတင်တည်ထောင်သည့် ၂၀၂၀ ပြည့်နှစ် ဇွန် ၁ ရက်မှ ယနေ့အထိ သက်တမ်းတစ်လျှောက်တွင် ရေရှည်အသိအမှတ်ပြုခံရမှုနှင့် အသက်မွေးဝမ်းကျောင်းဆိုင်ရာ ကျင့်ဝတ်သိက္ခာနှင့် ပြည့်စုံသည့် အဖွဲ့အစည်းအဖြစ် ရပ်တည်လာခဲ့သည်မှာ သက်တမ်းငါးနှစ်ကျော်ခဲ့ပြီဖြစ်ပါကြောင်း၊ အသင်းအနေဖြင့် ယခုနှစ်အတွင်း လူမွဲခံယူခြင်းဆိုင်ရာ ဥပဒေ၊ နည်းဥပဒေပါ ပြဋ္ဌာန်းချက်များနှင့်စပ်လျဉ်း၍ ကျယ်ကျယ်ပြန့်ပြန့် သိရှိနိုင်ရန်အတွက် စကားဝိုင်းဆွေးနွေးပွဲကျင်းပခြင်း၊ ဟောပြောပို့ချခြင်း၊ အမေးအဖြေများပြုလုပ်ခြင်း၊ သက်ဆိုင်ရာ အဖွဲ့အစည်းများနှင့်ပူးပေါင်း၍ အပတ်စဉ် အွန်လိုင်းဆွေးနွေးပွဲများ၊ ဟောပြောပွဲများကျင်းပခြင်းနှင့် MICPA ၊ CPA အစီအစဉ်များတွင် ပူးပေါင်းအစီအစဉ်များ ချိတ်ဆက်ကျင်းပခြင်းတို့ကို ဆောင်ရွက်ပေးလျက်ရှိပြီး လူမွဲခံယူခြင်းဆိုင်ရာ ကျွမ်းကျင်သူများ ကြီးကြပ်ရေးကောင်စီ၏ လမ်းညွှန်ချက်နှင့်အညီ ကျင့်ဝတ်ဆိုင်ရာ လိုက်နာဆောင်ရွက်ရမည့် Code of Conduct ကို ထုတ်ပြန်နိုင်ခဲ့သည့်အတွက်များစွာ ကျေနပ်မိပါကြောင်း၊ အသင်းဝင်များအနေဖြင့် အသင်းမှ ဆောင်ရွက်ပေးလျက်ရှိသည့် ပညာရပ်ဆိုင်ရာ ဖွံ့ဖြိုးတိုးတက်ရေးအစီအစဉ်များတွင် တက်ကြွစွာပါဝင်ခြင်းဖြင့် ကိုယ်ပိုင်အရည်အချင်းများ တိုးတက်စေရေးဆောင်ရွက်ကြရန် တိုက်တွန်းလိုပါကြောင်း ပြောကြားသည်။

ထို့နောက် အစည်းအဝေးသဘာပတိဖြစ်သူအသင်း၏ဥက္ကဋ္ဌ ဦးစိုးသိန်းက နှုတ်ခွန်းဆက်အမှာစကားပြောကြားပြီး အသင်းတာဝန်ရှိသူများက ဒါရိုက်တာအဖွဲ့ အစီရင်ခံစာ၊ ဘဏ္ဍာရေးရှင်းတမ်းများ၊ ပြင်ပစာရင်းစစ်အစီရင်ခံစာတို့ကို ဖတ်ကြားတင်ပြအတည်ပြုခြင်း၊ အသင်း၏ ဒါရိုက်တာအဖွဲ့ဝင်များ နုတ်ထွက်ခြင်း/ အသစ်ခန့်အပ်ခြင်း၊ အမည်စာရင်းကြေညာခြင်း၊ ပြင်ပစာရင်းစစ်ခန့်အပ်ခြင်းနှင့် အခကြေးငွေသတ်မှတ်ခြင်းတို့ကို အစီအစဉ်အတိုင်းဆောင်ရွက်ကြပြီး အစည်းအဝေးသဘာပတိ ဦးစိုးသိန်းက နိဂုံးချုပ်အမှာစကား ပြောကြားသည်။

သတင်းစဉ်