ရွေးကောက်ပွဲ မဲပေးအမီ

ရွေးကောက်ပွဲ မဲပေးအမီ

အမျိုးသားညီညွတ်ရေးအစိုးရဟု အမည်ခံထားသည့် ပြဿနာပေါင်း သောင်းခြောက်ထောင်နှင့် ထွေးလုံးရစ်ပတ်နေသော အကြမ်းဖက်ကြေညာခံအဖွဲ့အစည်းမှာ ၎င်း၏အတွင်းသဘောအရ ယိုင်နဲ့ပြိုလဲကျလာနေသည်ကို တွေ့မြင်နေရသည်။ နဂိုကတည်းကပင် နိုင်ငံနှင့် ပြည်သူအပေါ် စေတနာမမှန်ခဲ့၊ အတွေး အခေါ်၊ လုပ်ရပ်တို့ မမှန်ခဲ့သည့်အလျောက် ပြိုကွဲကျဆုံးသည်မှာ မဆန်း။ သို့ရာတွင် အဖွဲ့အစည်းက ကျဆုံးခန်းရောက်သည့်တိုင် အဖွဲ့ဝင်များ၊ အဖွဲ့နှင့် ဆက်နွှယ်လုပ်စားကြသူများ ကြီးပွားချမ်းသာ၊ ပျော်ရွှင်ချမ်းမြေ့ကြသည်မှာ ဆန်းသည်ဟု ဆိုရမည်။

နွေဦးတော်လှန်‌ရေးဟု ကဗျာဆန်ဆန် အမည်ပေး၍ တိုင်းပြည်ကို မီးမွှေးကာ လူလည်၊ လူနပ်၊ နေရာယူတတ်သူတို့က တစ်ပြည်တစ်ရွာသို့ ပြေးလျက် ဗရုတ်ဗရက်တော်လှန်ရေးကို အဝေးမှ လေအား၊ လက်သုံးချောင်းအမူအရာအားတို့ဖြင့် ကူကြသည်။ ဦးနှောက်ပို၍ကြီးသူ၊ အကွက်ကျော်၍ မြင်တတ်သူတို့မှာ ပါးစပ်စိုသည့်နေရာဖြစ်သော ထောက်ပို့ ခေါ် တာဝန်ကို ကိုယ့်ဘာသာယူကြပြီး လူအထင်ကြီးစေရန် Fundraiser များဟု ကိုယ့်ကိုယ်ကိုယ် ညွှန်းကြသော်လည်း ၎င်းတို့ကို အမြင်ကတ်သူများက ခွက်ခေါက်များဟု အမည်ပေးကြသည်။ အမည်အားဖြင့် ဆိုးသော်လည်း အမေရိကန်မှ ခွက်ခေါက်မဆိုထားနှင့် ရွာနီးချုပ်စပ်ဖြစ်သော ထိုင်းမှ ခွက်ခေါက်တို့သည်ပင်လျှင် တစ်နှစ်ထက် တစ်နှစ်ပို၍ အဝတ်အစားသားနားတောက်ပြောင်လာကာ ကားနှင့်ဘာနှင့် ဖြစ်လာသည်ကိုလည်း မတွေ့ချင်မြင်လျက်သား တွေ့နေကြရသည်။ တစ်ချိန်က အေးချမ်းသာယာခဲ့သည့် အညာဒေသတွင် အနီရောင်အုတ်ဂူများ မှိုလိုပေါက်လာနေချိန်တွင် NUG အဖွဲ့အတွင်း ခွေးမွေးနေ့ပွဲကျင်းပကာ ပျော်ရွှင်မြူးတူးနေသည်တို့ကို မျက်ဝါးထင်ထင် တွေ့မြင်လာကြရာ အကြမ်းဖက်လက်နက်ကိုင်လမ်းစဉ်ကို စိတ်ကုန်စွန့်ခွာလာနေကြပြီဖြစ်သည်။

မကြာသေးမီက အမေရိကန်နိုင်ငံအစိုးရ၏ မြန်မာနိုင်ငံသားများအပေါ် Temporary Protected Status (TPS) ပေးထားရာမှ ရပ်ဆိုင်းကြောင်း သတင်းထုတ်ပြန်ခဲ့ရာ မြန်မာနိုင်ငံမှ ထွက်ပြေး တိမ်းရှောင်ပြီး အမေရိကန်နိုင်ငံတွင် TPS အခွင့်အရေးရယူနေထိုင်နေကြသူများ အခက်တွေ့ကြရပြီဖြစ်သည်။ အမေရိကန်အစိုးရ၏သုံးသပ်ချက်အရ မြန်မာနိုင်ငံအစိုးရ၏ အရေးပေါ်အခြေအနေ ရုပ်သိမ်းပေးခဲ့မှု၊ ပါတီစုံဒီမိုကရေစီအထွေထွေရွေးကောက်ပွဲ ကျင်းပနိုင်ရန် ဆောင်ရွက်နေမှု၊ တိုင်းရင်းသားလက်နက်ကိုင်အဖွဲ့များနှင့် ပစ်ခတ်တိုက်ခိုက်မှုရပ်စဲပြီး ငြိမ်းချမ်းရေးဆောင်ရွက်နိုင်မှု၊ မြန်မာနိုင်ငံ၏ အုပ်ချုပ်ရေးပိုင်းဆိုင်ရာ တည်ငြိမ်လာမှုနှင့် တိုးတက်မှုတို့ကြောင့် TPS အခွင့်အရေးရထားသည့် မြန်မာနိုင်ငံသားများ မြန်မာနိုင်ငံသို့ လုံခြုံစွာပြန်နိုင်ပြီဖြစ်ကြောင်း သုံးသပ်ပြီး ရပ်ဆိုင်းခဲ့ခြင်းဖြစ်သည်။

အိမ်ရှင်နိုင်ငံက ဧည့်နှင်နေပြီဖြစ်ရာ အမိမြေကို ခင်တွယ်သည်ဖြစ်စေ၊ မခင်တွယ်သည်ဖြစ်စေ မပြန်မဖြစ် ပြန်ကြရတော့မည်ဖြစ်သည်။ အချို့လည်း မြန်မာနိုင်ငံမှလွဲလျှင် အခြားနိုင်ငံ တစ်ခုခုသို့ တစ်နည်းနည်းဖြင့် ရွှေ့ပြောင်းရန် ကြိုးပမ်းကြသည်လည်း ရှိနိုင်သည်။ နိုင်ငံတော်အစိုးရအနေဖြင့် ၂၀၂၁ ခုနှစ် ဧပြီလ ၂ ရက်နေ့ကတည်းကပင် အကြောင်းအမျိုးမျိုးကြောင့် နေရာဒေသအသီးသီးကို ရောက်ရှိနေသည့် မြန်မာနိုင်ငံသားများကို တရားဝင်ကြေညာချက်ထုတ်ပြီး ဖိတ်ခေါ်ခဲ့သည်။ ၂၀၂၅ ခုနှစ် ဇူလိုင် ၄ ရက်နေ့တွင် ပြည်ထောင်စုအကျိုးအတွက် ဖိတ်ခေါ်ချက်ဖြင့် PDF အမည်ခံ လက်နက်ကိုင်အုပ်စုများကို တရားဥပဒေဘောင်အတွင်း ဝင်ရောက်နိုင်ရန် ဖိတ်ခေါ်ခဲ့သည်။ ၂၀၂၄ ခုနှစ် စက်တင်ဘာ ၂၆ ရက်နေ့တွင်လည်း ရွေးကောက်ပွဲကျင်းပတော့မှာဖြစ်သည့်အတွက် နိုင်ငံရေးကို နိုင်ငံရေးနည်းဖြင့် ဖြေရှင်းရန် ကမ်းလှမ်းချက်ထုတ်ပြန် ဖိတ်ခေါ်ခဲ့သည်။ အဆိုပါ ဖိတ်ခေါ်ကမ်းလှမ်းချက်များကြောင့် ပြန်လည်ဝင်ရောက်လာကြသူများ ရာပေါင်းများစွာရှိခဲ့ပြီး တရားဥပဒေဘောင်အတွင်း အေးချမ်းစွာ နေထိုင်နိုင်ခဲ့ကြသည်။

ယခုလည်း အမေရိကန်အစိုးရ၏ မြန်မာနိုင်ငံသားများအပေါ် TPS အခွင့်အရေးပေးထားမှု ရပ်ဆိုင်းလိုက်ခြင်းကြောင့် အမေရိကန်နိုင်ငံတွင် ရောက်ရှိနေကြသည့် မြန်မာနိုင်ငံသူ နိုင်ငံသားများ အမိနိုင်ငံသို့ ပြန်လာနိုင်ကြပြီး နိုင်ငံတော်အစိုးရကလည်း ကြိုဆိုလျက်ရှိသည်။ မကြာမီကာလအတွင်း မြန်မာနိုင်ငံတွင် ပါတီစုံဒီမိုကရေစီအထွထွေရွေးကောက်ပွဲကြီးကို ကျင်းပတော့မည်ဖြစ်ရာ နိုင်ငံသားတစ်ဦးအနေဖြင့် မဲပေးနိုင်ရေး၊ ခေတ်မီဖွံ့ဖြိုးတိုးတက်သည့် နိုင်ငံတော်တည်ဆောက်ရေးတွင် ပါဝင်နိုင်ရေးအတွက် မနှေးအမြန် ပြန်လည်လာရောက်နိုင်ကြပါစေကြောင်း။ ။