လျှပ်စစ်စွမ်းအားဝန်ကြီးဌာန ရေဘေးသင့်ဝန်ထမ်းများအတွက် ဒုတိယအကြိမ် ထောက်ပံ့ငွေပေးအပ်

လျှပ်စစ်စွမ်းအားဝန်ကြီးဌာန ရေဘေးသင့်ဝန်ထမ်းများအတွက် ဒုတိယအကြိမ် ထောက်ပံ့ငွေပေးအပ်

နေပြည်တော် နိုဝင်ဘာ ၇

လျှပ်စစ်စွမ်းအားဝန်ကြီးဌာန ရေဘေးသင့်ဝန်ထမ်းများအတွက် လျှပ်စစ်ဝန်ထမ်းဟောင်းများအသင်းမှ လှူဒါန်းငွေအား ဒုတိယအကြိမ် ထောက်ပံ့ငွေပေးအပ်ပွဲ အခမ်းအနားကို ယနေ့မွန်းလွဲပိုင်းတွင် နေပြည်တော်ရှိ လျှပ်စစ်စွမ်းအားဝန်ကြီးဌာန ရုံးအမှတ် (၂၇) အစည်းအဝေးခန်းမ (၂) ၌ကျင်းပရာ ပြည်ထောင်စုဝန်ကြီး ဦးဉာဏ်ထွန်း၊ ဒုတိယဝန်ကြီး ဦးအေးကျော်၊ ပြည်ထောင်စုဝန်ကြီးရုံး၊ ဦးစီးဌာန၊ လုပ်ငန်း၊ ကော်ပိုရေးရှင်းတို့မှ တာဝန်ရှိသူများ၊ အရာထမ်း၊ အမှုထမ်းများနှင့် ရေဘေးသင့်ဝန်ထမ်းများ တက်ရောက်ကြသည်။

ဦးစွာ ပြည်ထောင်စုဝန်ကြီးက သဘာဝဘေးဒဏ်ကြောင့် နေအိမ်၊ အဆောက်အဦ၊ ပစ္စည်းများထိခိုက် ဆုံးရှုံးမှုဖြစ်ပေါ်ခဲ့ပြီး ရေဘေးဒဏ်သင့်ခံစားခဲ့ရသည့် မိမိတို့ဝန်ကြီးဌာနမှ ဝန်ထမ်း ၁၇၅ ဦးကို သက်ဆိုင်ရာဌာနများအလိုက် ဌာနကြီးမှူးများကိုစေလွှတ်၍ ယာယီနေရာပြောင်းရွှေ့ပေးခြင်း၊ စားသောက်နေထိုင်ရေး စီစဉ်ဆောင်ရွက်ပေးခြင်းများ ပြုလုပ်ဆောင်ရွက်ပေးပြီး ဝန်ကြီးဌာနအနေဖြင့်လည်း ထောက်ပံ့ငွေပေးအပ်မှုများကို ပထမအကြိမ်အဖြစ် ၂၀၂၄ ခုနှစ် အောက်တိုဘာလတွင် ထောက်ပံ့ပေးအပ်ခဲ့ပြီး ယခုဒုတိယအကြိမ်အဖြစ် လျှပ်စစ်ဝန်ထမ်းဟောင်းများ အသင်းမှ လှူဒါန်းငွေအား ထပ်မံထောက်ပံ့ပေးအပ်ခြင်းဖြစ်ပါကြောင်း၊ ယခုထောက်ပံ့မှုသည် တစ်ဦးချင်း လိုအပ်ချက် တစ်စိတ်တစ်ပိုင်းသာ ဖြစ်နိုင်သဖြင့် ထောက်ပံ့မှုများအား အကျိုးရှိစွာ အသုံးချနိုင်ရေး ဆောင်ရွက်ကြရန် ပြောကြားသည်။

ထို့နောက် ပြည်ထောင်စုဝန်ကြီးနှင့် ဒုတိယဝန်ကြီးတို့က ရေဘေးသင့်ဝန်ထမ်း ၁၇၅ ဦးအတွက် ဒုတိယအကြိမ်အဖြစ် လျှပ်စစ်ဝန်ထမ်းဟောင်းများအသင်းမှ လှူဒါန်းငွေအား ထောက်ပံ့ပေးအပ်ရာ သက်ဆိုင်ရာဌာနအလိုက် ဌာနအကြီးအမှူးများက လက်ခံရယူကြပြီး ရေဘေးသင့် ဝန်ထမ်းများ ကိုယ်စား ဝန်ထမ်းတစ်ဦးက ကျေးဇူးတင်စကား ပြန်လည်ပြောကြားခဲ့ကြောင်း သိရသည်။

သတင်းစဉ်