ဝါဆိုလပြည့် ဓမ္မစကြာအခါတော်နေ့

ဝါဆိုလပြည့် ဓမ္မစကြာအခါတော်နေ့

ယနေ့သည် ဒုတိယဝါဆိုလပြည့်နေ့ ဓမ္မစကြာအခါတော်နေ့ဖြစ်သည်။ သိဒ္ဓတ္ထမင်းသားသည် ကဆုန်လပြည့်နေ့တွင် ဥရုဝေလတော နေရဉ္စရာ မြစ်ကမ်းပါးအနီး ဗောဓိပင်ရင်း၌ သဗ္ဗညုတဘုရား အဖြစ်သို့ ရောက်တော်မူခဲ့သည်။ ဝါဆိုလပြည့်နေ့သို့ ရောက်သောအခါ ဣသိပတန မိဂဒါဝုန်တော၌ ပဉ္စဝဂ္ဂီငါးဦးတို့အား ဓမ္မစကြာတရားဦး ဟောတော်မူသည်။ ထို့ကြောင့် ဗုဒ္ဓဘာသာဝင်တို့က ဝါဆိုလပြည့်နေ့ကို ဓမ္မစကြာအခါတော်နေ့ဟု သတ်မှတ်ကြသည်။

ဓမ္မစကြာဒေသနာ သို့မဟုတ် ဓမ္မစက္ကပဝတ္တနသုတ်တော်သည် ဗုဒ္ဓမြတ်စွာဘုရား ပထမဆုံး ဟောကြားတော်မူသော တရားတော်ဖြစ်သည်။ ဤသုတ်တော်ကို ဟောကြားတော်မူပြီးမှ သဗ္ဗညုတ ဘုရားဖြစ်ကြောင်း လောကဓာတ် တစ်ခုလုံးကို ရဲဝံ့စွာကြေညာခဲ့သည်။ သံသရာမှထွက်မြောက်ရာ ကျင့်စဉ်ဖြစ်သော “မဇ္ဈိမပဋိပဒါ”မဂ္ဂင်ရှစ်ပါး အကျင့်တရားကို ဟောပြတော်မူခဲ့သည်။

ဓမ္မစကြာဒေသနာကို ဟောကြားတော်မူရန် သဟမ္ပတိဗြဟ္မာကြီးကိုယ်တိုင် လူ့ပြည်သို့ဆင်း၍ ဝပ်စင်းခယ လျှောက်ထားတောင်းပန်ရသည်။ မြတ်ဗုဒ္ဓ၏အထူးခြားဆုံး ဦးဦးဖျားဖျား မြတ်တရားဖြစ်သည်။ ပွင့်ပြီးပွင့်လတ္တံ့သော ဘုရားအဆူဆူတို့သည်လည်း ဤအတိုင်းပင်ဟောတော် မူကြသည်။ ဗုဒ္ဓသာသနာကို ဤဓမ္မစကြာ ဒေသနာဖြင့် စတင်ဖွင့်လှစ်ခြင်းကြောင့် “သာသနာဖွင့် တရားတော်ကြီး” ဟုလည်း ဂုဏ်တင်နိုင်ကြသည်။

ပဉ္စဝဂ္ဂီငါးဦးနှင့် နတ်၊ ဗြဟ္မာတို့ကို ဒိဋ္ဌိနှင့်ဝိစိကိစ္ဆာကင်းကွာ၍ သောတာပန်အဖြစ်ရောက်စေနိုင်သဖြင့် “အရိယာလမ်း မဂ်စခန်းဖွင့်သည့် တရားတော်ကြီး” ဟုလည်း ခေါ်ဝေါ်နိုင်သည်။ ဓမ္မစကြာတရားပွဲ အပြီးတွင် ၃၂ ပါးသော နိမိတ်ကြီးတို့သည် ထင်ဟပ်ပေါ်လွင်လာသည်။ တစ်သောင်းသော လောကဓာတ်တိုင်အောင်ပင် နတ်ဗြဟ္မာတို့၏ အရောင်ထက်အထောင်မက ထွန်းပြောင်သည့် အရောင်အလင်းကြီး ပေါ်ထွန်းခဲ့သဖြင့် “နိမိတ်ထူးပြ မြတ်ဓမ္မ”ဟု လည်း ခေါ်ဆိုနိုင်ပါသည်။

ဓမ္မစကြာတရား မဟောကြားမီက လောကတွင် သံဃာရတနာမပေါ်သေးပေ။ တရားပွဲအပြီးတွင် အရှင်ကောဏ္ဍညသည် သောတာပန် အရိယာဖြစ်လာပြီး ပထမဆုံးအရိယာသာဝကကြီး ဖြစ်လာခဲ့သည်။ ထို့ကြောင့် ဤသုတ်တော်ကို “သံဃာရတနာအစ ဓမ္မစကြာက” ဟူ၍လည်း ဆိုနိုင်သည်။ ထို့နောက် ပဉ္စဝဂ္ဂီတို့ဟိဘိက္ခုရဟန်းများ ဖြစ်ပေါ်လာကြသဖြင့် ဤလောကဝယ် ရတနာသုံးပါးပြည့်စုံအောင် ဖြည့်စွမ်းပေးနိုင်သော သုတ်တော်မြတ်ဖြစ်ပေသည်။

မြတ်စွာဘုရားလောင်းတော်သည် အစွန်းတရားနှစ်ပါးကို စွန့်ပယ်ခွာလျက် မဇ္ဈိမပဋိပဒါ သာယာအေးမြကြောင်း လမ်းကောင်းလမ်းမှန်ကို ကျင့်ကြံတော်မူခဲ့သည်။ ထို့ကြောင့် ပဉ္စဝဂ္ဂီတို့အား တရားဟောတော်မူသောအခါ မိမိကြုံတွေ့ခဲ့ရသည့် အစွန်းတရား ထိုနှစ်ပါးသောအမှားမျိုးသို့ မလိုက်မှားမိကြရန်နှင့် မိမိကိုယ်တွေ့ ရရှိပြီးဖြစ်သော နိဗ္ဗာန်ရကြောင်း လမ်းကောင်းလမ်းမှန်ကို လိုက်နာကြရန်အတွက် ဓမ္မစကြာတရားဦးရတနာကို ဟောပြ တော်မူခဲ့လေသည်။

ဓမ္မစကြာဒေသနာတော်တွင်လည်း ဒုက္ခဆင်းရဲမှ လွတ်မြောက်ရန် အကြောင်းနည်းလမ်းတို့ကို ဖော်ပြထားသည်။ မြတ်စွာဘုရားသည် ဝေရဉ္စာ ပုဏ္ဏားကြီးအား “ကြက်ကျင်းတစ်ခု၌ နောက်ဆုံးဥသည့် ဥခွံမှ အလျင်ဖောက် ထွက်လာသကဲ့သို့ ငါသည်လည်း အဝိဇ္ဇာဥခွံမှ ရှေးဦးစွာလွတ်မြောက်၍ အလင်းသို့ရောက်ခဲ့သည်” ဟု မိန့်ကြားတော်မူသည်။ ထို့အတူ ကျွန်ုပ်တို့သည် ဤဝါဆိုလပြည့်နေ့၌ ဓမ္မစကြာဒေသနာတော်ကို ကြားနာရသဖြင့် ဉာဏ်အလင်းရောက်ဖို့ လိုအပ်လှပါသည်။

ဓမ္မစကြာအခါတော်နေ့သည် သံသရာဝဋ်ဆင်းရဲဒုက္ခမှ လွတ်မြောက်သည့် ဉာဏ်အလင်း ပေါက်သည့်နေ့ဖြစ်၍ ထူးမြတ်လှသည်။ ဝါဆိုလပြည့်နေ့သည်ကား ထူးမြတ်လှသည့် အခါသမယနေ့ ပေါင်းစုံလင်သော ရက်မြတ်ဖြစ်သည်။ မယ်တော်မာယာ၏ဝမ်းတွင် ဘုရားလောင်းသိဒ္ဓတ္ထမင်းသား ပဋိသန္ဓေယူသောနေ့။ သိဒ္ဓတ္ထမင်းသား တောထွက်တော်မူသောနေ့။ ဘုရားဖြစ်တော်မူပြီးနောက် ဓမ္မစကြာတရားဦးကို ဟောကြားတော်မူသောနေ့။ ဘုရားဖြစ်ပြီဟု ရဲဝံ့စွာကြေညာတော်မူသောနေ့။ တရားရတနာ စတင်ပေါ်ထွန်းသောနေ့။ သံဃာရတနာ စတင်ပေါ်ထွန်းသောနေ့။ ဧဟိဘိက္ခုဟူသော မြတ်ဗုဒ္ဓ၏ ဗျာဒိတ်တော်ရ ရဟန်း စတင်ပေါ်ထွန်းတော်မူသောနေ့။ မြတ်စွာဘုရားရှင် ခုနစ်ဝါမြောက် ဝါဆိုတော်မူရင်း အဘိဓမ္မာတရား ဟောကြားရန်အတွက် တာဝတိံသာနတ်ပြည်သို့ ကြွတော်မူစဉ် ရေမီးအစုံဖြင့် တန်ခိုးပြာဋိဟာ ပြတော်မူသောနေ့တို့ ဖြစ်သည်။

သို့ဖြစ်ရာ သူတော်ကောင်းအပေါင်းတို့အနေဖြင့် ဝါဆိုလပြည့် ဓမ္မစကြာအခါတော်နေ့ရောက်တိုင်း ဓမ္မစကြာဒေသနာ ကိုသာမက သဒ္ဓါတရားပေါက်ရာ အခါတော်တစ်ခုခုကို နှလုံးသွင်းလျက် ကောင်းကျိုးများကို ပွားများအားထုတ် နိုင်ကြပါစေကြောင်း။ ။