ဒုတိယဝန်ကြီး ဦးသိုက်စိုး မွန်ပြည်နယ် ချောင်းဆုံမြို့နယ် ဖွံ့ဖြိုးရေးလုပ်ငန်းများ ကြည့်ရှုစစ်ဆေး

ဒုတိယဝန်ကြီး ဦးသိုက်စိုး မွန်ပြည်နယ် ချောင်းဆုံမြို့နယ် ဖွံ့ဖြိုးရေးလုပ်ငန်းများ ကြည့်ရှုစစ်ဆေး

နေပြည်တော် ဖေဖော်ဝါရီ ၁

ချောင်းဆုံမြို့နယ် ရွာလွတ် - ကတောင်စိန်ကျေးရွာချင်းဆက် တောင်ဖြတ်လမ်း၏ အကွေ့များသောနေရာများတွင် ကွန်ကရစ်လမ်းပခုံးခင်းခြင်းလုပ်ငန်းဆောင်ရွက်နေမှုကို ယနေ့နံနက်ပိုင်းက သမဝါယမနှင့်ကျေးလက်ဖွံ့ဖြိုးရေးဝန်ကြီးဌာန ဒုတိယဝန်ကြီး ဦးသိုက်စိုးသည် မွန်ပြည်နယ် လမ်းပန်းဆက်သွယ်ရေးဝန်ကြီး ဦးတင်စန်းနိုင်၊ တာဝန်ရှိသူများနှင့်အတူ သွားရောက်ကြည့်ရှုစစ်ဆေးသည်။

ဦးစွာ ပြည်နယ်ဦးစီးမှူးက လုပ်ငန်းဆောင်ရွက်နေမှုအခြေအနေကို ရှင်းလင်းတင်ပြရာ ဒုတိယဝန်ကြီးက တောင်ဖြတ်လမ်း ရေရှည်အသုံးပြုနိုင်ရေးအတွက် လိုအပ်သည့်နေရာများတွင် မြေထိန်းနံရံများ၊ ရေတိုက်စားမှုကာကွယ်ရေးအစီအမံများ ဆောင်ရွက်သွားရန်မှာကြားပြီး လိုအပ် သည်များ ညှိနှိုင်းပေါင်းစပ်ဆောင်ရွက်ပေးကာ ရွာလွတ်လယ်ယာနှင့် အထွေထွေစီးပွားရေးသမဝါယမအသင်း၏ ရွာလွတ်ထုတ်ကုန်အမှတ်တရပစ္စည်း အရောင်းပြခန်းကို ကြည့်ရှုစစ်ဆေးသည်။

ထို့နောက် အသေးစားစက်မှုလက်မှုလုပ်ငန်းဦးစီးဌာန၏ အသေးစားကုန်ထုတ်လုပ်ငန်းများ ဖန်တီးပေးနိုင်ရေးနှင့် ကျေးလက်နေမိသားစုဝင်ငွေတိုးရေးစီမံကိန်းဖြင့် ဖွင့်လှစ်ခဲ့သော စက်ချုပ်သင်တန်း တက်ရောက်အောင်မြင်ပြီး တစ်ပိုင်တစ်နိုင် ကိုယ်ပိုင်စက်ချုပ်လုပ်ငန်း လုပ်ကိုင်နေကြသည့် ကွမ်သဲကျေးရွာမှ သင်တန်းသူများအား သွားရောက်တွေ့ဆုံအားပေးစကား ပြောကြားသည်။

ယင်းနောက် ကျေးရွာကော်မတီဝင်များ၊ ကျေးရွာသူ ကျေးရွာသားများနှင့် တွေ့ဆုံရာ ဒုတိယဝန်ကြီးက ဝန်ကြီးဌာနမှ အကောင်အထည်ဖော်ဆောင်ရွက်ပေးနေသော မြစိမ်းရောင် ကျေးရွာစီမံကိန်း၊ ကျေးရွာဖွံ့ဖြိုးရေးလုပ်ငန်း (VDP) စီမံကိန်း၊ ကျေးလက်စီးပွားမြင့်မာရေး ရန်ပုံငွေထူထောင်ခြင်း (RBF) စီမံကိန်းဆိုင်ရာများကို ရှင်းလင်းပြောကြားပြီး ကျေးရွာသူကျေးရွာ သားများ၏ တင်ပြချက်များအပေါ် လိုအပ်သည်များ ညှိနှိုင်းပေါင်းစပ်ဆောင်ရွက်ပေးသည်။

ဆက်လက်၍ အောင်သဇင်သမဝါယမအသင်းနှင့် မွန်ပြည်နယ်သမဝါယမအသင်းစုချုပ်တို့ ပူးပေါင်းဆောင်ရွက်နေသည့် ရွှေမြိုင်စိုက်ပျိုးရေးနှင့် အထွေထွေစီးပွားရေးသမဝါယမအသင်းလီမိတက်၏ တန် ၉၀ကျ ဆန်စက်နှင့် တန် ၁၂၀ စပါး အခြောက်ခံစက်တို့ကို ကြည့်ရှုစစ်ဆေးရာ အသင်းစု ချုပ်ဥက္ကဋ္ဌနှင့် စက်ရုံတာဝန်ခံတို့၏ လုပ်ငန်းဆိုင်ရာ တင်ပြမှုများအပေါ် ဒုတိယဝန်ကြီးက စိုက်ပျိုးထုတ်လုပ်ရေးသမဝါယမအသင်းများမှ ထွက်ရှိလာသော စပါးများကိုသမဝါယမအသင်းပိုင်ဆန်စက်ဖြင့် ဝယ်ယူကြိတ်ခွဲ၍ ပြန်လည်ရောင်းချခြင်းဖြင့် အသင်းသားတောင်သူများ ပိုမိုအကျိုးဖြစ်ထွန်းနိုင်သဖြင့် အချင်းချင်းစည်းစည်းလုံးလုံးညီညီညွတ်ညွတ် ပူးပေါင်းဆောင်ရွက်ကြရန် တိုက်တွန်း မှာကြားသည်။

ထို့နောက် မော်လမြိုင်မြို့ သမဝါယမစာရင်းရေးစာရင်းကိုင်သက်မွေးပညာသင်တန်းကျောင်းမှ ကျောင်းအုပ်ကြီး၊ ဆရာ ဆရာမများ၊ သင်တန်းသား သင်တန်းသူများနှင့်တွေ့ဆုံပြီး သမဝါယမကောလိပ်များနှင့် သမဝါယမနှင့်စီမံခန့်ခွဲမှုပညာတက္ကသိုလ်များသို့ ပေါင်းကူးတက်ရောက်နိုင်ရေး၊ အမျိုးသားရေးစိတ်ဓာတ်နှင့် လူမှုရေးစိတ်ဓာတ်အခြေခံပြည့်ဝသော သမဝါယမပညာတတ်များ မွေးထုတ်ပေးနိုင်ရေး ကြိုးပမ်းဆောင်ရွက်ကြရန် တိုက်တွန်းမှာကြားကာ သင်တန်းသားများအတွက် ပညာသင်ထောက်ပံ့ငွေများ ပေးအပ်သည်။

ယင်းနောက် အသစ်ဆောက်လုပ်ထားသော သုံးထပ် RC စာသင်ဆောင်၊ နှစ်ထပ်သင်တန်း သား အိပ်ဆောင်နှင့် ရေချိုးခန်း၊ သန့်စင်ခန်းများကို ကြည့်ရှုစစ်ဆေးပြီး လိုအပ်သည်များ ပေါင်းစပ် ဖြည့်ဆည်းဆောင်ရွက်ပေးခဲ့ကြောင်း သိရသည်။

သတင်းစဉ်