ပြည်ထောင်စုဝန်ကြီး ဦးကိုကိုလှိုင် တရုတ်ပြည်သူ့သမ္မတနိုင်ငံ ကျေးလက်ဒေသဖွံ့ဖြိုးတိုးတက်ရေးဖောင်ဒေးရှင်း (CFRD)၏ (၁ဝ)နှစ်မြောက် နှစ်ပတ်လည်အခမ်းအနား တက်ရောက်

ပြည်ထောင်စုဝန်ကြီး ဦးကိုကိုလှိုင် တရုတ်ပြည်သူ့သမ္မတနိုင်ငံ ကျေးလက်ဒေသဖွံ့ဖြိုးတိုးတက်ရေးဖောင်ဒေးရှင်း (CFRD)၏ (၁ဝ)နှစ်မြောက် နှစ်ပတ်လည်အခမ်းအနား တက်ရောက်

ရန်ကုန် စက်တင်ဘာ ၁၅

တရုတ်ပြည်သူ့သမ္မတနိုင်ငံ ကျေးလက်ဒေသဖွံ့ဖြိုးတိုးတက်ရေးဖောင်ဒေးရှင်း (CFRD) ၏ (၁ဝ) နှစ်မြောက် နှစ်ပတ်လည်အခမ်းအနားကို ယနေ့နံနက် ၁၀ နာရီတွင် ရန်ကုန်မြို့ မင်္ဂလာတောင်ညွန့်မြို့နယ်ရှိ Wyndham Grand Yangon Hotel ၌ ကျင်းပသည်။

အခမ်းအနားသို့ နိုင်ငံတော်သမ္မတရုံးဝန်ကြီးဌာန(၂) ပြည်ထောင်စုဝန်ကြီး ဦးကိုကိုလှိုင်၊ မြန်မာနိုင်ငံဆိုင်ရာ တရုတ်ပြည်သူ့သမ္မတနိုင်ငံသံရုံး ယာယီတာဝန်ခံ Ms. Cao Jing ၊ တရုတ်ပြည်သူ့သမ္မတနိုင်ငံ ကျေးလက်ဒေသဖွံ့ဖြိုးတိုးတက်ရေး ဖောင်ဒေးရှင်း (CFRD) ဒုတိယဥက္ကဋ္ဌ Mr. liu Wenkui နှင့် တာဝန်ရှိသူများ၊ အလှူရှင်များ၊ သာသနာရေးနှင့်ယဉ်ကျေးမှုဝန်ကြီးဌာနမှတာဝန်ရှိသူများ၊ ပညာရေးဝန်ကြီးဌာနမှ တာဝန်ရှိသူများနှင့် ဖိတ်ကြားထားသူများတက်ရောက်ကြသည်။

အခမ်းအနားတွင် ပြည်ထောင်စုဝန်ကြီး ဦးကိုကိုလှိုင်၊ မြန်မာနိုင်ငံဆိုင်ရာ တရုတ်ပြည်သူ့သမ္မတနိုင်ငံသံရုံးယာယီတာဝန်ခံ Ms. Cao Jing နှင့် တရုတ်ပြည်သူ့သမ္မတနိုင်ငံ ကျေးလက်ဒေသ ဖွံ့ဖြိုးတိုးတက်ရေးဖောင်ဒေးရှင်း(CFRD) ဒုတိယဥက္ကဋ္ဌ Mr. Liu Wenkui တို့က အမှာစကားပြောကြားကြပြီး တရုတ်ပြည်သူ့သမ္မတနိုင်ငံ ကျေးလက်ဒေသ ဖွံ့ဖြိုးတိုးတက်ရေးဖောင်ဒေးရှင်း (CFRD) ၏ (၁ဝ)နှစ်မြောက် နှစ်ပတ်လည်ကိတ်အား လှီးဖြတ်ပေးကြသည်။

ထို့နောက် တရုတ်ပြည်သူ့သမ္မတနိုင်ငံ ကျေးလက်ဒေသဖွံ့ဖြိုးတိုးတက်ရေး ဖောင်ဒေးရှင်း(CFRD)နှင့် ပူးပေါင်းဆောင် ရွက်နေကြသည့် အဖွဲ့အစည်းများက နားလည်မှုစာချွန်လွှာများကို သဘောတူလက်မှတ်ရေးထိုးကြပြီး ပြည်ထောင်စုဝန်ကြီးနှင့် တရုတ်ပြည်သူ့သမ္မတနိုင်ငံ ကျေးလက်ဒေသဖွံ့ဖြိုးတိုးတက်ရေးဖောင်ဒေးရှင်း(CFRD) ဒုတိယဥက္ကဋ္ဌတို့က အလှူရှင်များကို ဂုဏ်ပြုလက်ဆောင်များပေးအပ်ကြသည်။

ယင်းနောက် အလှူရှင်များကိုယ်စား တာဝန်ရှိသူများက ကျေးဇူးတင်စကားပြောကြားကြပြီး မြန်မာနိုင်ငံရေကြောင်း ပညာတက္ကသိုလ်နှင့် လှိုင်သာယာမြို့နယ်အမှတ်(၁၈) အခြေခံပညာမူလတန်းကျောင်းမှ ကျောင်းသားကျောင်းသူများက အကများဖြင့် ဖျော်ဖြေတင်ဆက်ကြရာ ပြည်ထောင်စုဝန်ကြီးနှင့် တာဝန်ရှိသူများက ကြည့်ရှုအားပေးကြပြီး အခမ်းအနားကို ရုပ်သိမ်းလိုက်သည်။

တရုတ်နိုင်ငံ ကျေးလက်ဒေသဖွံ့ဖြိုးတိုးတက်ရေးဖောင်ဒေးရှင်း မြန်မာနိုင်ငံဆိုင်ရာရုံးသည် (၁၀) နှစ်တာအတွင်း “ကြီးမားသောချစ်ခြင်း” ဆိုသည့် အတွေးအခေါ်အတိုင်း "Belt and Road Initiative" မဟာဗျူဟာအား ရှေးရှုကာ မြန်မာပြည်တွင် ဆင်းရဲနွမ်းပါးမှုလျှော့ချရေး စီမံကိန်းများကို အပြည့်အဝဆောင်ရွက်ခဲ့ပြီး မြန်မာနိုင်ငံရှိ ပြည်နယ်အများစုမှ ကလေးများအတွက် အာဟာရပြည့်စားသောက်ဖွယ်ရာများလှူဒါန်းခြင်း၊ လျှပ်စစ်မီးမရှိသည့်ဒေသများရှိ ကျောင်းသားမိသားစုများကို solar မီးလုံးများလှူဒါန်းခြင်း၊ တက္ကသိုလ်ကျောင်းသားများကို ပညာသင်ဆုနှင့် ကျွမ်းကျင်မှုသင်တန်းများပံ့ပိုးခြင်း၊ ကျေးရွာဒေသများတွင် ရေသန့်စင်စက်များတပ်ဆင်ခြင်း စသည့်လှူဒါန်းမှုများ ဆောင်ရွက်ပေးလျက်ရှိကြောင်း သိရသည်။

သတင်းစဉ်