မိခင်သေဆုံးမှုနှင့်ကလေးသေဆုံးမှုလျော့နည်းကျဆင်းရေး မိခင်နှင့်ကလေးကျန်းမာရေးစောင့်ရှောက်မှုသင်တန်းဖွင့်

မိခင်သေဆုံးမှုနှင့်ကလေးသေဆုံးမှုလျော့နည်းကျဆင်းရေး မိခင်နှင့်ကလေးကျန်းမာရေးစောင့်ရှောက်မှုသင်တန်းဖွင့်

ဘားအံ စက်တင်ဘာ ၄

ကရင်ပြည်နယ်အစိုးရအဖွဲ့က ကြီးမှူးကျင်းပသော ကရင်ပြည်နယ်မိခင်နှင့်ကလေးစောင့်ရှောက်မှုကြီးကြပ် ရေးအဖွဲ့နှင့် ပြည်နယ်ပြည်သူ့ကျန်းမာရေးဦးစီးဌာနတို့ပူးပေါင်းဖွင့်လှစ်သည့် မိခင်နှင့်ကလေးစောင့်ရှောက်မှုသင်တန်း ဖွင့်ပွဲကို စက်တင်ဘာလ ၄ ရက်နေ့ နံနက် ၈ နာရီက ဘားအံမြို့၊ အမှတ်(၄)အခြေခံပညာအထက်တန်းကျောင်း မြတ်ပညာခန်းမ၌ ကျင်းပသည်။

ကရင်ပြည်နယ်အတွင်း မိခင်သေဆုံးမှုနှင့်ကလေးသေဆုံးမှုလျော့နည်းကျဆင်းရေးအတွက် ရပ်ကွက်၊ကျေးရွာ များရှိအလွှာအသီးသီးမှကိုယ်ဝန်ဆောင်မိခင်များနှင့်ကလေးများကို ကျန်းမာရေးစောင့်ရှောက်မှုပေးရာတွင် အခြေခံ ကျန်းမာရေးဝန်ထမ်းများ၏အရန်အင်အားအဖြစ် ပူးပေါင်းချိတ်ဆက်ဆောင်ရွက်နိုင်ရန် ၊ ကျန်းမာရေးစောင့်ရှောက်မှု ဆိုင်ရာအရည်အသွေးပြည့်ဝသော မိခင်နှင့်ကလေးစောင့်ရှောက်ရေးအသင်းဝင်များက ပြည်သူလူထုအကြား ကျန်းမာ ရေးအသိပညာများကို ကျယ်ကျယ်ပြန့်ပြန့်သိရှိဖြန့်ဝေနိုင်ရန် ရည်ရွယ်ဖွင့်လှစ်ခြင်းဖြစ်ပြီး ပြည်နယ်ဝန်ကြီးချုပ် ဦးစောမြင့်ဦးက ဘားအံမြို့နယ်တွင် သင်တန်းသူ/သင်တန်းသား(၂၅၀)ဦး၊ လှိုင်းဘွဲမြို့ နယ်တွင်(၆၀)ဦး၊ သံတောင်ကြီး မြို့နယ်တွင်(၃၀)ဦး၊ ကော့ကရိတ်မြို့နယ်တွင်(၄၀)ဦး၊ ကြာအင်းဆိပ်ကြီးမြို့နယ်တွင် (၆၀)ဦး၊ မြဝတီမြို့နယ်တွင် (၃၀)ဦး၊ ဖာပွန်(ကမမောင်း)မြို့တွင် (၁၀)ဦး စုစုပေါင်းသင်တန်းသူ၊သင်တန်းသား (၄၈၀) ဦးကို သင်တန်းပေးသွား မည်ဖြစ်ပြီး သင်တန်းသူ/သင်တန်းသားများအနေဖြင့် သင်တန်းပြီးဆုံးသည့်အခါ မိမိတို့ ကျေးရွာ၊ရပ်ကွက်များတွင် ရှိကြသော အခြေခံကျန်းမာရေးဝန်ထမ်းများ၏ မိခင်နှင့်ကျန်းမာရေးစောင့်ရှောက်မှုလုပ်ငန်း များတွင် ပိုမိုထိရောက်စွာ ကူညီဆောင်ရွက်ပေးကြစေလိုကြောင်း တိုက်တွန်းပြောကြားကာ သင်တန်းစုစုပေါင်း (၁၄)ကြိမ်အတွက် ငွေကျပ် ၁၄၆ သိန်းကို ချီးမြှင့်ပေးအပ်သည်။

ထို့နောက် သင်တန်းသူ/သင်တန်းသားများက ပြည်နယ်မိခင်နှင့်ကလေးစောင့်ရှောက်မှုကြီးကြပ်ရေးအဖွဲ့ နာယကထံ အသင်းဝင်အဆိုပြုလွှာများကို ပေးအပ်ကြပြီး ပြည်နယ်ဝန်ကြီးချုပ်၊ ပြည်နယ်မိခင်နှင့်ကလေးစောင့် ရှောက်မှုကြီးကြပ်ရေးအဖွဲ့နာယက နှင့်အဖွဲ့ဝင်များသည် သင်တန်းသူ၊သင်တန်းသားများနှင့်စုပေါင်းမှတ်တမ်းဓာတ်ပုံ များရိုက်ကူးခဲ့ကြပြီး ပြည်နယ်ဝန်ကြီးချုပ်နှင့်တာဝန်ရှိသူများသည် သင်တန်းသူ၊သင်တန်းသားများနှင့်အခမ်းအနားသို့ တက်ရောက်လာသူများအား ရင်းနှီးနွေးထွေးစွာတွေ့ဆုံနှုတ်ဆက်၍ အားပေးစကားများပြောကြားခဲ့ကြောင်း သိရသည်။

ဆက်လက်၍ ပြည်နယ်ဝန်ကြီးချုပ်၊ ပြည်နယ်တရားလွှတ်တော်တရားသူကြီးချုပ်၊ ပြည်နယ်အစိုးရအဖွဲ့ဝင် များနှင့် ဘားအံပညာရေးဒီဂရီကောလိပ်ရှိ သင်တန်းသား၊သင်တန်းသူ၊ ဆရာ၊ဆရာမများ၏ အထူးနေ့လယ်စာစားပွဲကို နံနက် ၁၁ နာရီခွဲက ဘားအံပညာရေးဒီဂရီကောလိပ် စားရိပ်သာ၌ ကျင်းပရာ ပြည်နယ်ဝန်ကြီးချုပ်ဦးစောမြင့်ဦးက ကရင်ပြည်နယ်၏ အခြေခံပညာကဏ္ဍကို အရည်အသွေးတိုးတက်ကောင်းမွန်အောင် တာဝန်ယူကြမည့်သူများဖြစ်သည့် အတွက် မှာကြားစရာရှိသည်များကိုမှာကြားပြီးဂုဏ်ပြုလိုသောကြောင့် ယခုကဲ့သို့ ရင်းရင်းနှီးနှီးလာရောက်တွေ့ဆုံခြင်း ဖြစ်ကြောင်း၊ ဆရာ၊ဆရာမလောင်းများအနေဖြင့် ပညာရေးဖွံ့ဖြိုးတိုးတက်အောင်ဆောင်ရွက်ရင်း အနာဂတ်အတွက် မျိုးဆက်သစ်များပြုစုပျိုးထောင်ပေးကြစေလိုကာ မိမိကိုယ်ကိုလည်း အရည်အသွေးပြည့်ဝသောဆရာများဖြစ်အောင် ကြိုးစားကြစေလိုကြောင်း ပြောကြားသည်။

ထို့နောက် ပြည်နယ်ဝန်ကြီးချုပ်က အထူးနေ့လယ်စာအတွက် ငွေကျပ် ၁၈ သိန်းကို ကျောင်းအုပ်ဆရာမကြီး နှင့်သင်တန်းသား၊သင်တန်းသူများထံ ချီးမြှင့်ပေးအပ်ပြီး ဘားအံပညာရေးဒီဂရီကောလိပ်ရှိ သင်တန်းသား၊သင်တန်းသူ၊ ဆရာ၊ဆရာမများနှင့်အတူ အထူးနေ့လယ်စာကို အတူတကွသုံးဆောင်ခဲ့ကြကာ ထိုသို့နေလည်စာသုံးဆောင်နေမှုများ အား ပြည်နယ်ဝန်ကြီးချုပ်နှင့်တာဝန်ရှိသူများက ရင်းနှီးနွေးထွေးစွာလိုက်လံတွေ့ဆုံနှုတ်ဆက်၍ အားပေးစကားများ ပြောကြားခဲ့ပါသည်။