ကချင်ပြည်နယ်၊ မြစ်ကြီးနားအကျဉ်းထောင်၌ မူးယစ်ဆေးဝါးဆိုးကျိုး အသိပညာပေး ဟောပြောပွဲနှင့် ဆုချီးမြှင့်ပွဲ အခမ်းအနား ကျင်းပ

ကချင်ပြည်နယ်၊ မြစ်ကြီးနားအကျဉ်းထောင်၌ မူးယစ်ဆေးဝါးဆိုးကျိုး အသိပညာပေး ဟောပြောပွဲနှင့် ဆုချီးမြှင့်ပွဲ အခမ်းအနား ကျင်းပ

     ၂၀၂၅ ခုနှစ်၊ နိုဝင်ဘာ ၂၃ ရက် မွန်းတည့် ၁၂ နာရီတွင် ကချင်ပြည်နယ်၊ မြစ်ကြီးနား အကျဉ်းထောင်၌ အကျဉ်းသား၊ အကျဉ်းသူ၊ အချုပ်သား၊ အချုပ်သူများအား မူဝါဒနှင့်အညီ အကျင့် စာရိတ္တ ပြုပြင်ပြောင်းလဲစေရေးနှင့် အသိပညာတိုးပွားစေရန် ရည်ရွယ်၍ မူးယစ်ဆေးဝါးဆိုးကျိုး အသိပညာပေး ဟောပြောပွဲနှင့် ဆုချီးမြှင့်ပွဲ အခမ်းအနား ကျင်းပပြုလုပ်ခဲ့ရာ ကချင်ပြည်နယ် ဝန်ကြီးချုပ် ဦးခက်ထိန်နန်၊ လုံခြုံရေးနှင့်နယ်စပ်ရေးရာဝန်ကြီး ဗိုလ်မှူးကြီး ကျော်သူရ၊ သယံဇာတ ဝန်ကြီး ဦးတိန့်ဆောင်၊ ကချင်ပြည်နယ်တရားလွှတ်တော် တရားသူကြီးချုပ် ဒေါ်အေးအေးမော်၊ ကချင်ပြည်နယ်တရားလွှတ်တော် တရားသူကြီးချုပ်(ငြိမ်း)ဝဏ္ဏကျော်ထင် ဦးတူးဂျာ၊ ကချင်ပြည်နယ် ဥပဒေချုပ် ဒေါ်နန်းလှလှအေး၊ အကျဉ်းဦးစီးဌာနမှ ကချင်ပြည်နယ်ဦးစီးမှူး ညွန်ကြားရေးမှူး ဦးကျော်စိုး၊ ငြိမ်းချမ်းရေးအကျိုးတော်ဆောင်(PCG)သီရိပျံချီ ဦးလမိုင်ဂွမ်ဂျာ၊ YCC FOUNDER ဆရာ အင်ဒိန်အားဂျာ၊ YCC ဥက္ကဋ္ဌ ဦးမရစ်နော်ဂျာတို့ တက်ရောက်ခဲ့ပါသည်။

   အခမ်းအနား၌ အကျဉ်းထောင်တာဝန်ခံအရာရှိ လက်ထောက်ညွှန်ကြားရေးမှူး ဦးလှမျိုးအောင်မှ မူးယစ်ဆေးဝါးဆိုးကျိုး အသိပညာပေး ဟောပြောပွဲ ကျင်းပပြုလုပ်ရခြင်း၏ ရည်ရွယ်ချက်နှင့် ကြိုဆိုနှုတ်ဆက်စကားပြောကြားခြင်း၊ ကချင်ပြည်နယ်ဝန်ကြီးချုပ် ဦးခက်ထိန်နန်မှ မူးယစ်ဆေးဝါး ဆိုးကျိုးနှင့်ပတ်သက်သည့် ဆုံးမဩဝါဒစကားပြောကြားခြင်း၊ ဟောပြောယှဉ်ပြိုင်မည့် အကျဉ်းသား၊ အကျဉ်းသူ ငါးဦးအား ယှဉ်ပြိုင်စေခြင်းများ ဆောင်ရွက်ခဲ့ပါသည်။

     ဆက်လက်၍ ဆုရရှိသူများအား ကချင်ပြည်နယ်ဝန်ကြီးချုပ်နှင့် အစိုးရအဖွဲ့မှ ရွေးချယ် သတ်မှတ်ပြီး ကချင်ပြည်နယ်ဝန်ကြီးချုပ် ဦးခက်ထိန်နန်မှ ပထမဆုရရှိသူအား ဆုငွေကျပ် ငါးသိန်း၊ ကချင်ပြည်နယ်တရားလွှတ်တော်တရားသူကြီးချုပ် ဒေါ်အေးအေးမော်မှ ဒုတိယဆုရရှိသူအား ဆုငွေ ကျပ် သုံးသိန်း၊ ငြိမ်းချမ်းရေးအကျိုးတော်ဆောင်(PCG)သီရိပျံချီ ဦးလမိုင်ဂွမ်ဂျာမှ တတိယဆုရရှိသူအား ဆုငွေကျပ် နှစ်သိန်း၊ ကချင်ပြည်နယ်ဦးစီးမှူး ညွှန်ကြားရေးမှူး ဦးကျော်စိုးမှ နှစ်သိမ့်ဆုရရှိသူ နှစ်ဦးအား ငွေကျပ် တစ်သိန်းစီ အသီသီးဆုများ ပေးအပ်ချီးမြှင့်ခဲ့ကြောင်း သတင်းရရှိပါသည်။