ဒုတိယဝန်ကြီး ဦးသိုက်စိုး မိတ္ထီလာမြို့နယ် သမဝါယမအသင်းသားများနှင့် တွေ့ဆုံဆွေးနွေး

ဒုတိယဝန်ကြီး ဦးသိုက်စိုး မိတ္ထီလာမြို့နယ် သမဝါယမအသင်းသားများနှင့် တွေ့ဆုံဆွေးနွေး

နေပြည်တော် မေ ၂၆

သမဝါယမနှင့်ကျေးလက်ဖွံ့ဖြိုးရေးဝန်ကြီးဌာန ဒုတိယဝန်ကြီး ဦးသိုက်စိုးသည် ယနေ့နံနက်ပိုင်းက မိတ္ထီလာမြို့နယ် မုန်ကန်ကျေးရွာအုပ်စု စက်ပစ်တောင်ကျေးရွာ ပိုင်သုခန်းမတွင် ကျေးရွာအုပ်စုအတွင်းမှ နွေစပါးစိုက် သမဝါယမအသင်းသားတောင်သူများ၊ နို့စားနွားမွေးမြူကြသည့် သမဝါယမအသင်းသားများနှင့် တွေ့ဆုံသည်။

တွေ့ဆုံစဉ် သမဝါယမကဏ္ဍကို နိုင်ငံ့စီးပွားမြှင့်တင်ရေးရန်ပုံငွေ၊ သက်တံ့ရောင် သမဝါယမစီမံကိန်းရန်ပုံငွေ၊ မြစိမ်းရောင်ကျေးရွာ စီမံကိန်းရန်ပုံငွေဖြင့် လိုအပ်သည့် အရင်းအနှီး၊ အထွက်တိုးမျိုး၊ သွင်းအားစုများကို ထောက်ပံ့ပေးလျက်ရှိကြောင်း ရှင်းလင်းပြောကြားသည်။

ထို့နောက် တောမကျေးရွာအုပ်စု မကျီးပင်ကျေးရွာသို့သွားရောက်၍ စိုက်ပျိုးထုတ်လုပ်ရေး သမဝါယမအသင်းသားတောင်သူများ၊ ဒေသခံပြည်သူများနှင့်တွေ့ဆုံကာ သမဝါယမ စိုက်ပျိုး၊ မွေးမြူရေးကုန်ထုတ်လုပ်ငန်းများ ပိုမိုတိုးမြှင့်ထုတ်လုပ်နိုင်ရေးအတွက် လိုအပ်သည်များ ညှိနှိုင်းပေါင်းစပ်ဆောင်ရွက်ပေးပြီး ရွှေတြိဂံနို့စားနွားမွေးမြူရေးလုပ်ငန်း သမဝါယမအသင်းက ဖရီရှန်နို့စားနွားများ မွေးမြူထားရှိမှု၊ သဲကုန်းမွေးမြူရေးနှင့် အထွေထွေလုပ်ငန်း သမဝါယမအသင်းမှထုတ်လုပ်သော နို့စတော်ဘယ်ရီ ဒိန်ချဉ်၊ နို့အေးနှင့် နို့ခဲများ၊ ဖရီရှန်နို့စားနွားများ မွေးမြူထားမှုကို ကြည့်ရှုအားပေးသည်။

ထို့နောက် ညောင်မြင့်ကျေးရွာနှင့် လိန်တောကျေးရွာ၌ စိုက်ပျိုးရေးသမဝါယမအသင်းသားများ၊ ဒေသခံပြည်သူများ၊ ဌာနဆိုင်ရာဝန်ထမ်းများနှင့် တွေ့ဆုံဆွေးနွေးခဲ့ကြောင်း သိရသည်။

သတင်းစဉ်