နေပြည်တော်ကောင်စီနယ်မြေ၊ လယ်ဝေးမြို့နယ်၌ ယာဉ်တိုက်မှုဖြစ်ပွား၍ အမျိုးသား တစ်ဦး ထိခိုက် ဒဏ်ရာရရှိ

နေပြည်တော်ကောင်စီနယ်မြေ၊ လယ်ဝေးမြို့နယ်၌ ယာဉ်တိုက်မှုဖြစ်ပွား၍ အမျိုးသား တစ်ဦး ထိခိုက် ဒဏ်ရာရရှိ

      ၂၀၂၅ ခုနှစ်၊ မေ ၁၁ ရက်က နေပြည်တော်ကောင်စီနယ်မြေ၊ လယ်ဝေးမြို့နယ်၌ ယာဉ်တိုက်မှု ဖြစ်ပွား၍ အမျိုးသား တစ်ဦး ဒဏ်ရာရရှိခဲ့ကြောင်း သိရသည်။
    ဖြစ်စဉ်မှာ မေ ၁၁ ရက် နံနက် ၆ နာရီတွင် နေပြည်တော်ကောင်စီနယ်မြေ၊ လယ်ဝေးမြို့နယ်၊ ရန်ကုန်-မန္တလေးအမြန်လမ်းမကြီး မိုင်တိုင်အမှတ် ၁၉၇ မိုင် ၅ ဖာလုံနှင့် ၆ ဖာလုံအကြား၌ ယာဉ်တိုက်မှု ဖြစ်ပွားကြောင်း သတင်းအရ ပလွေးအမြန်လမ်းမကြီးရဲစခန်းမှ တပ်ဖွဲ့ဝင်များက သွားရောက်စစ်ဆေးခဲ့ရာ ရန်ကုန်မှ မန္တလေးသို့ မန္တလေးတိုင်းဒေသကြီး၊ မိတ္ထီလာမြို့နယ်၊ ညောင်ကုန်းကျေးရွာနေ ဇော်နိုင်ဟိန်း (၂၆)နှစ် မောင်းနှင်ပြီး မိတ္ထီလာမြို့နယ်၊ ထန်းတော်ကျေးရွာနေ ဝေယံကျော်(၂၈)နှစ် လိုက်ပါလာသည့် BGO-11/7J-XXXX MITSUBISHI FUSO မော်တော်ယာဉ်သည် အခင်းဖြစ်နေရာအရောက် ယာဉ်မောင်း အိပ်ငိုက်၍ လမ်းလယ်ကျွန်း၌ ကာရံထားသည့် ကတ်တုံးများအား ဝင်ရောက်တိုက်မိရပ်တန့်သွားခဲ့ပြီး ယာဉ်တိုက်မှုကြောင့် ဝေယံကျော်တွင် ထိခိုက်ဒဏ်ရာများရရှိခဲ့သဖြင့် ဇော်နိုင်ဟိန်းအား ပလွေးအမြန် လမ်းမကြီးရဲစခန်း ယာဉ်(ပ)၃/၂၀၂၅၊ ရာဇသတ်ကြီးပုဒ်မ ၃၃၇/၂၇၉ ဖြင့် အမှုဖွင့်အရေးယူထားကြောင်း သတင်းရရှိသည်။