ပြည်ထောင်စုဝန်ကြီးဦးဆန်းဦး ရန်ကုန်တိုင်းဒေသကြီးအတွင်းရှိ ဌာနဆိုင်ရာလုပ်ငန်းများ ကြည့်ရှုစစ်ဆေး

ပြည်ထောင်စုဝန်ကြီးဦးဆန်းဦး ရန်ကုန်တိုင်းဒေသကြီးအတွင်းရှိ ဌာနဆိုင်ရာလုပ်ငန်းများ ကြည့်ရှုစစ်ဆေး

သယံဇာတနှင့် သဘာဝပတ်ဝန်းကျင်ထိန်းသိမ်းရေးဝန်ကြီးဌာန၊ ပြည်ထောင်စုဝန်ကြီး ဦးဆန်းဦးသည် ရန်ကုန်တိုင်းဒေသကြီးအစိုးရအဖွဲ့၊ သယံဇာတနှင့် သဘာဝပတ်ဝန်းကျင်ထိန်းသိမ်း ရေးဝန်ကြီး ဦးစိုးဦးနှင့်အတူ တာဝန်ရှိသူများလိုက်ပါ၍ ၁-၆-၂၀၂၆ ရက်နေ့ နံနက်ပိုင်းတွင် ရန်ကုန်တိုင်းဒေသကြီး၊ ဒဂုံမြို့သစ်(အရှေ့ပိုင်း)ရှိ National Wood သစ်အချောထည်စက်ရုံသို့ ရောက်ရှိရာ တာဝန်ရှိသူမှ သစ်အချောထည်များ ထုတ်လုပ်တင်ပို့နေမှု အခြေအနေများအား တင်ပြရာ ပြည်ထောင်စုဝန်ကြီးက သစ်ကုန်ကြမ်းရရှိမှုကို အလေအလွင့်မရှိစေဘဲ အကျိုးရှိစွာဖြင့် သစ်အချောထည်ပစ္စည်းများ တိုးမြှင့်ထုတ်လုပ်သွားပြီး နိုင်ငံခြားငွေပိုမိုရရှိရေး ဆောင်ရွက်သွားရန်နှင့် လိုအပ်သည်များကို မှာကြားပြီး စက်ရုံအတွင်း သစ်အချောထည်များ ထုတ်လုပ်နေမှုကို လိုက်လံကြည့်ရှု စစ်ဆေးသည်။

ဆက်လက်၍ ပြည်ထောင်စုဝန်ကြီးနှင့်အဖွဲ့သည် ရွာသာကြီး သစ်တောပျိုးဥယျာဉ်သို့ ရောက်ရှိရာ တာဝန်ရှိသူမှ ပျိုးပင်များ ပျိုးထောင်ထားရှိမှု အခြေအနေကို တင်ပြရာ ပြည်ထောင်စု ဝန်ကြီးက ၂၀၂၆ ခုနှစ် မိုးရာသီတွင် သစ်ပင်စိုက်ပွဲများအတွက် လိုအပ်သောပျိုးပင်များ ဖြန့်ဝေပေးနိုင်ရန်နှင့် ပျိုးပင်များဖြန့်ဝေရာတွင် တစ်ပင်စိုက် တစ်ပင်ရှင်သန်နိုင်အောင် လိုအပ်သည့် နည်းစနစ်များ ကူညီပေးသွားရန်၊ အခြားဒေသများမှ ပျိုးပင်လိုအပ်ချက်များကို ဖြည့်ဆည်းပေးသွားရန်အတွက် အရန်ပျိုးပင်များ ပျိုးထောင်ထားရှိရေးနှင့် လိုအပ်သည်များ မှာကြားပြီး ပျိုးဥယျာဉ်အတွင်း ပျိုးပင်များ ပျိုးထောင်ထိန်းသိမ်းထားမှု အခြေအနေအား လိုက်လံကြည့်ရှု စစ်ဆေးခဲ့သည်။