အကျဉ်းထောင်/စခန်းအသီးသီးတွင် ပြင်ပကျန်းမာရေးအဖွဲ့များမှ ကျန်းမာရေးစစ်ဆေးကုသ စောင့်ရှောက်ပေးမှုများနှင့် ကျန်းမာရေးအသိပညာပေးဟောပြောပွဲများ ကျင်းပပြုလုပ်

အကျဉ်းထောင်/စခန်းအသီးသီးတွင် ပြင်ပကျန်းမာရေးအဖွဲ့များမှ ကျန်းမာရေးစစ်ဆေးကုသ စောင့်ရှောက်ပေးမှုများနှင့် ကျန်းမာရေးအသိပညာပေးဟောပြောပွဲများ ကျင်းပပြုလုပ်

     အကျဉ်းဦးစီးဌာန ကွပ်ကဲမှုအောက်ရှိ အကျဉ်းထောင်/စခန်းအသီးသီးတွင် ကျန်းမာရေးဦးစီးဌာန၊ သက်ဆိုင်ရာခရိုင်၊ မြို့နယ်များရှိ ကျန်းမာရေးအဖွဲ့များနှင့်ပူးပေါင်း၍ လစဉ်ကျန်းမာရေးစောင့်ရှောက်မှု လုပ်ငန်းများ ဆောင်ရွက်ပေးလျက်ရှိရာ ၂၀၂၆ ခုနှစ်၊ မေ ၂၅ ရက်နှင့် ၂၈ ရက်တို့တွင် ပဲခူးတိုင်းဒေသကြီး တီဘီရောဂါတိုက်ဖျက်ရေးဌာနနှင့် သာယာဝတီခရိုင်ပြည်သူ့ကျန်းမာရေးဦးစီးဌာနတို့ ပူးပေါင်း၍ ဒေါက်တာ နေသက်ထွန်း ဦးဆောင်သော အဖွဲ့ဝင် ၆ ဦးတို့သည် သာယာဝတီဗဟိုအကျဉ်းထောင်မှ အကျဉ်းသား ၃၉၉ ဦး၊ အကျဉ်းသူ ၆၈ ဦး၊ စုစုပေါင်း ၄၆၇ ဦးအား  Mobile Team  ဖြင့် တီဘီရောဂါ ရှာဖွေခြင်းလုပ်ငန်းများနှင့် ကျန်းမာရေးစောင့်ရှောက်မှုများအား လည်းကောင်း။

     အလားတူ မေ ၂၆ ရက်တွင် ပဲခူးတိုင်းဒေသကြီး၊ ပြည်ခရိုင်ပြည်သူ့ကျန်းမာရေးဦးစီးဌာန၊ ခုခံကျ/ကာလသားရောဂါတိုက်ဖျက်ရေးအဖွဲ့မှ ဒေါက်တာ ချမ်းသာဇော် ဦးဆောင်သော အဖွဲ့ဝင် ၄ ဦး တို့သည် ပြည်အကျဉ်းထောင်မှ အကျဉ်းသား ၁၈၆ ဦး၊ အကျဉ်းသူ ၂၅ ဦး၊ စုစုပေါင်း ၂၁၁ ဦးအား HIV/AIDS ကျန်းမာရေးပညာပေးဟောပြောခြင်းနှင့် VDRL သွေးဖောက်စစ်ဆေးခြင်းလုပ်ငန်းများအား လည်းကောင်း။

     ထို့အတူ မေ ၂၇ ရက်တွင် ရှမ်းပြည်နယ်၊ ညောင်ရွှေမြို့နယ်၊ စဝ်စံထွန်းပြည်သူ့ဆေးရုံကြီးမှ ဒုတိယညွှန်ကြားရေးမှူး ဒေါက်တာလင်းထင်ကျော် ဦးဆောင်သော အဖွဲ့ဝင် ၃၀ ဦးတို့သည် ညောင်ရွှေ အကျဉ်းထောင်မှ အကျဉ်းသား ၄၁၀ ဦး၊ အကျဉ်းသူ ၇၉ ဦး၊ စုစုပေါင်း ၄၈၉ ဦးတို့အား သွားနှင့် ခံတွင်း၊ အရေပြားရောဂါ၊ မျက်စိရောဂါနှင့် အထွေထွေရောဂါတို့အား ကျန်းမာရေးစောင့်ရှောက်ပေးမှု များအားလည်းကောင်း အသီးသီး ပြုလုပ်ဆောင်ရွက်ပေးခဲ့ကြောင်း သတင်းရရှိပါသည်။