အခြေခံစက်ချုပ်သင်တန်းဖွင့်ပွဲ အခမ်းအနားကို ရခိုင်ပြည်နယ်တွင် ကျင်းပပြုလုပ်

အခြေခံစက်ချုပ်သင်တန်းဖွင့်ပွဲ အခမ်းအနားကို ရခိုင်ပြည်နယ်တွင် ကျင်းပပြုလုပ်

ရခိုင်ပြည်နယ်အစိုးရအဖွဲ့၏ ဦးဆောင်မှုဖြင့် တိုင်းရင်းသားအခွင့်အရေးများကာကွယ်စောင့် ရှောက်ရေးဦးစီးဌာနနှင့် လူမှုဝန်ထမ်းဦးစီးဌာနတို့ ပူးပေါင်းဖွင့်လှစ်သည့် တိုင်းရင်းသားလူငယ်များ အတွက် အခြေခံစက်ချုပ်သင်တန်းဖွင့်ပွဲအခမ်းအနားကို (၁၄-၇-၂၀၂၅)ရက်နေ့တွင် ရခိုင်ပြည်နယ်၊ စစ်တွေမြို့၊ ဉီးဥတ္တမခန်းမ၌ ကျင်းပပြုလုပ်ခဲ့ပါသည်။

အခမ်းအနားတွင် ရခိုင်ပြည်နယ်အစိုးရအဖွဲ့၊ ပြည်နယ်ဝန်ကြီးချုပ်ဦးထိန်လင်းက အဖွင့်အမှာစကားပြောကြားရာတွင် ရခိုင်ပြည်နယ်အစိုးရအဖွဲ့အနေဖြင့် ပြည်နယ်အတွင်း နေထိုင်ကြသော တိုင်းရင်းသားများအားလုံး၏ ကဏ္ဍပေါင်းစုံဖွံ့ဖြိုးတိုးတက်ရေးအတွက် မိမိတို့တွင် ရှိသော စွမ်းအားအရင်းအမြစ်များကို လူမှန်နေရာမှန်အသုံးပြု၍ အကောင်အထည်ဖော်ဆောင်ရွက် လျက်ရှိပါကြောင်း၊  ဒေသခံတိုင်းရင်းသားများ၏ လိုအပ်ချက်နှင့် လိုလားချက်များကို ဖြည့်ဆည်း ပေးနိုင်ရန် တိုင်းရင်းသားရေးရာအသိပညာပေးဟောပြောခြင်းနှင့် ရပ်ရွာအခြေပြုအသက်မွေးဝမ်း ကျောင်းပညာလိုအပ်ချက်များကို ဆန်းစစ်စီမံခြင်းအစီအစဉ်ကို ယာယီနေရပ်စွန့်ခွာ စုရပ်စခန်း များတွင် နေထိုင်ကြသည့် တိုင်းရင်းသားများကို စစ်တမ်းကောက်ယူဆောင်ရွက်ခဲ့ပြီး စစ်တမ်း ရလဒ်အရ တိုင်းရင်းသားများအနေဖြင့် ဦးစားပေးဖွင့်လှစ်ပေးစေလိုသောသင်တန်းများကို ရွေးချယ်ဖော်ပြရာတွင် စက်ချုပ်သင်တန်းကို ပထမဦးစားပေးအနေဖြင့် ရွေးချယ်ခဲ့ကြသဖြင့် ယခုအခြေခံစက်ချုပ်သင်တန်းကို ဖွင့်လှစ်ပေးရခြင်းဖြစ်ပါကြောင်း ပြောကြားခဲ့ပါသည်။

ဆက်လက်၍ ရခိုင်ပြည်နယ်အစိုးရအဖွဲ့၊ ပြည်နယ်ဝန်ကြီးချုပ်ဦးထိန်လင်းက အခြေခံ စက်ချုပ်သင်တန်းအတွက် ချီးမြှင့်ငွေကျပ်(၁၈၀)သိန်းကို တိုင်းရင်းသားအခွင့်အရေးများ ကာကွယ် စောင့်ရှောက်ရေးဦးစီးဌာန၊ လက်ထောက်ညွှန်ကြားရေးမှူးနှင့် အိမ်တွင်းမှုသက်မွေး လုပ်ငန်း ပညာသင်တန်းကျောင်း၊ ကျောင်းအုပ်ကြီးတို့အား ပေးအပ်ခဲ့ပါသည်။ ထို့နောက် ပြည်နယ်မိခင်နှင့် ကလေးစောင့်ရှောက်ရေးကြီးကြပ်မှုအဖွဲ့ နာယက ဒေါ်ဆွေဆွေမြတ်က အခြေခံစက်ချုပ် သင်တန်းအတွက် သင်ထောက်ကူပစ္စည်းများ ပေးအပ်ခဲ့ရာ  သင်တန်းသူများကိုယ်စား သင်တန်းသူ(၂)ဦးက လက်ခံရယူခဲ့ကြပြီးနောက် စုပေါင်းမှတ်တမ်းတင် ဓာတ်ပုံရိုက်ကူးခဲ့ပါသည်။ 

အခြေခံစက်ချုပ်သင်တန်းကို (၁၄-၇-၂၀၂၅)ရက်နေ့မှ (၁၂-၈-၂၀၂၅)ရက်နေ့အထိ (၁)လကြာ သင်ကြားပို့ချသွားမည်ဖြစ်ပြီး ရခိုင် (၂၉)ဦးနှင့် မရမာကြီး(၁)ဦး စုစုပေါင်း(၃၀)ဦး တက်ရောက်သင်ကြားမည်ဖြစ်ကြောင်း သိရှိရပါသည်။