အမျိုးသမီးဂုဏ်ရည်ကိုမြှင့်တင်၍ နိုင်ငံ့ဂုဏ်ရည်မြင့်မားအောင်ကြိုးပမ်း

အမျိုးသမီးဂုဏ်ရည်ကိုမြှင့်တင်၍ နိုင်ငံ့ဂုဏ်ရည်မြင့်မားအောင်ကြိုးပမ်း

၂၀၂၅ ခုနှစ် ဇူလိုင်လ ၃ ရက်နေ့သည် “မြန်မာအမျိုးသမီးများနေ့”ဖြစ်သည်။ အစဉ်အလာကြီးမားသော မြန်မာအမျိုးသမီးများ၏ ဂုဏ်အင်ကို အသိအမှတ်ပြုသောအားဖြင့် ဤနေ့ဤရက်များတွင် မြန်မာအမျိုးသမီးများနေ့အထိမ်းအမှတ် အကြိုလှုပ်ရှားမှုများ၊ အခမ်းအနားများကို နှစ်စဉ်ကျင်းပလျက်ရှိသည်။ မြန်မာအမျိုးသမီးများ၏ စွမ်းဆောင်ရည်များနှင့် မြန်မာအမျိုးသမီးတို့၏ ကျက်သရေမင်္ဂလာအပေါင်းနှင့်ပြည့်စုံသည့် ယဉ်ကျေးမှုဟန်ပန်များမှာ အခြားနိုင်ငံများနှင့်မတူ တစ်မူထူးကဲသည်ဟု ဆိုနိုင်ပါသည်။ အထူးသဖြင့် မြန်မာအမျိုးသမီးတို့၏ ယဉ်ကျေးမှုဓလေ့စရိုက်များမှာ အဆင့်အတန်းမြင့်မား ချီးမွမ်းဖွယ်မကုန်ပြည့်စုံပါသည်။

ယခုနှစ် မြန်မာအမျိုးသမီးများနေ့၏ဆောင်ပုဒ်သည် “ယဉ်ကျေးဝေဆာ မေမြန်မာ၊ မျိုးဂုဏ်မပျက် ဝတ်ဆင်လျက်”ဟူ၍ဖြစ်သည်။ ကျက်သရေအပေါင်းနှင့်ပြည့်စုံပြီး တင့်တယ်ရှုမောဖွယ်ဖြစ်သည့် မြန်မာအမျိုးသမီးတို့၏ ဝတ်စားဆင်ယင်မှုကို အထူးညွှန်းဆိုထားသည်။ မြန်မာအမျိုးသမီးတို့၏ ယဉ်ကျေးမှုဂုဏ်ကို ရှေးအစဉ်အဆက် ထိန်းသိမ်းထားနိုင်သောနိုင်ငံသည် မြန်မာနိုင်ငံဟုပင် ဂုဏ်ယူဝင့်ကြွားဖွယ်ဆိုရမည်ဖြစ်သည်။ ရိုးရိုးနှင့်ယဉ်ယဉ်မြန်မာနိုင်ငံထုတ် ပြည်တွင်းဖြစ် ဝတ်စားဆင်ယင်မှုများသည် မြန်မာအမျိုးသမီးအသီးသီးတို့၏ ရူပကာမရွေး တင့်တယ် လှပရှုမောဖွယ်ချည်းပင်ဖြစ်သည်။

အမျိုးသမီးတို့၏ ဝတ်စားဆင်ယင်မှုကိုအထူးပြု၍ ယခုနှစ်တွင် “ယဉ်ကျေးဝေဆာ မေမြန်မာ၊ မျိုးဂုဏ်မပျက် ဝတ်ဆင်လျက်” ဝတ်စားဆင်ယင်မှုပြပွဲနှင့် ဂီတဖျော်ဖြေပွဲကို ဇူလိုင်လ ၁ ရက်နေ့က မြန်မာအမျိုးသမီးများနေ့အကြိုလှုပ်ရှားမှုအဖြစ် နေပြည်တော် ဒက္ခိဏသီရိမြို့နယ် မြန်မာနိုင်ငံအမျိုးသမီးရေးရာအဖွဲ့ချုပ်ရုံး သီရိရတနာခန်းမ၌ ကျင်းပခဲ့ရာ နိုင်ငံတော်စီမံအုပ်ချုပ်ရေးကောင်စီဥက္ကဋ္ဌ နိုင်ငံတော်ဝန်ကြီးချုပ်၏ဇနီး မြန်မာနိုင်ငံအမျိုးသမီးရေးရာအဖွဲ့ချုပ် ဂုဏ်ထူးဆောင်နာယက ဒေါ်ကြူကြူလှ တက်ရောက်အားပေးခဲ့သည်။ အခမ်းအနားတွင် မြန်မာအမျိုးသမီးများနေ့ တေးသီချင်းများနှင့်အတူ ဖန်တီးဆန်းသစ်ထားသောဝတ်စုံများကို ဝတ်စားဆင်ယင်ပြသခဲ့သည်။

မြန်မာအမျိုးသမီးများ၏ ကြိုးကြီးချိတ်ချိတ်ထဘီနှင့် ပိုးပဝါရင်ဖုံးအင်္ကျီတို့သည် ရှေးအစဉ်အလာကတည်းက ယခုအချိန်အထိ မရိုးနိုင်အောင် အစဉ်အမြဲဆန်းသစ်နေသည့် အဝတ်အထည်များဖြစ်သည်။ သာမန်ချိတ်ထဘီနှင့် ပိုးအင်္ကျီ၊ ချည်အင်္ကျီလေး ဝတ်ဆင်ရုံမျှဖြင့် အဆိုပါအမျိုးသမီးမှာ အလွန်တင့်တယ်ပြီး ရိုးရိုးယဉ်ယဉ် ကျက်သရေမင်္ဂလာရှိလှသည်။ ပိုးလုံချည်၊ ချည်ပုဆိုး၊ ပိုးဖဲပဝါမျိုးစုံတို့ကို ဆန်းသစ်တီထွင်ချုပ်လုပ်ကာ ဝတ်ဆင်ကြသည့် မြန်မာအမျိုးသမီးများမှာ ပွဲနေပွဲထိုင် ပွဲဝင်အခမ်းအနားကြီးများအထိပင် အလွန်တင့်တယ် ရှုမောဖွယ်ကောင်းနေသည်။ ခေတ်မီဆန်းပြားသည့် ပြည်ပမှ အဝတ်အထည်များ မည်မျှပင်ရှိလာသည်ဖြစ်စေ မြန်မာ့မူ၊ မြန်မာ့ဟန်၊ မြန်မာထုတ်ကုန် မြန်မာအဝတ်အထည်များမှာ တိမ်မြုပ်ပျောက်ကွယ်ခြင်းမရှိဘဲ ဆန်းသစ်ပေါ်လွင်နေသည်မှာ ဂုဏ်ယူဖွယ်ရာဖြစ်သည်။

မြန်မာတို့သည် ယဉ်ကျေးမှုအစဉ်အလာကြီးမားသော လူမျိုးများဖြစ်သည်။ ကိုယ့်ထီးကိုယ့်နန်း ကိုယ်ကြငှန်းဖြင့် နေထိုင်ခဲ့ကြသောလူမျိုးဖြစ်သည်။ ယဉ်ကျေးမှုအစဉ်အလာကြီးမားသည့်အားလျော်စွာ မြန်မာ့ယဉ်ကျေးမှုဓလေ့စရိုက်များကို တန်ဖိုးထားပြီး ကိုယ်ပိုင်ယဉ်ကျေးမှုကို ထိန်းသိမ်းကာကွယ်စောင့်ရှောက်လိုသော လူမျိုးဖြစ်သည်။ ထိုအထဲတွင် မြန်မာအမျိုးသမီးများ၏ ဝတ်စားဆင်ယင်မှုမှာ ပိုမိုပေါ်လွင်ထင်ရှားပြီး တင့်တယ်လှပေသည်။ မြန်မာအမျိုးသမီးများသည် ပင်ကိုသဘာဝအရ အေးဆေးတည်ငြိမ်ပြီး စိတ်ထားနူးညံ့သူများဖြစ်သည့်အပြင် အရှက်အကြောက်နှင့် ဣန္ဒြေသိက္ခာကြီးမားသည်။ မြန်မာအမျိုးသမီးများကို မြန်မာအဝတ်အစားများဖြင့် ထိန်းသိမ်းကာကွယ်ပေးထားသည်။

သို့သော် ခေတ်ကာလပြောင်းလဲလာပြီး တိုးတက်ခေတ်မီမှုများ များပြားလာသည့် မျက်မှောက်ကာလတွင် တိုင်းတစ်ပါးယဉ်ကျေးမှုများ တစ်စတစ်စထိုးဖောက် ဝင်ရောက်လာသည်။ ထိုအခါ အရှက်သိက္ခာဣန္ဒြေကို ထိန်းသိမ်းပေးထားသည့် မြန်မာအမျိုးသမီးတို့၏ အစဉ်အလာမပျက် ရိုးရာယဉ်ကျေးမှု အဝတ်အထည်များကို ပစ်ပယ်လာကြသည်။ ခေတ်မီတိုးတက်သည့် နိုင်ငံများမှ ဝတ်စားဆင်ယင်မှုများကို အတုခိုးလာကြသည်။ ဘောင်းဘီတို၊ ဘောင်းဘီရှည်၊ စကပ်တို၊ ရင်ကွဲစသည့် မလုံမခြုံဝတ်စားဆင်ယင်မှုများ ထိုးဖောက်လာသည်။ အမျိုးသမီးတို့၏ ဂုဏ်သိက္ခာကို ပျက်ပြားစေသည့် သရုပ်ပျက်ဝတ်စားဆင်ယင်မှုများကြောင့် အမျိုးသမီးတို့၏ဂုဏ်ရည်ကျဆင်းပြီး ကိုယ်ကျင့်တရားသိက္ခာများပင် ပျက်ယွင်းစေသည့် အဖြစ်ဆိုးကို ရောက်နိုင်သည်။

သို့ဖြစ်ရာ ယခုနှစ် မြန်မာအမျိုးသမီးများနေ့ အထိမ်းအမှတ်အဖြစ် “ယဉ်ကျေးဝေဆာ မေမြန်မာ၊ မျိုးဂုဏ်မပျက်ဝတ်ဆင်လျက်”ဟူသည့် လှုပ်ရှားဆောင်ရွက်မှုသည် မြန်မာအမျိုးသမီးများ၏ဂုဏ်ရည်ကို ဆက်လက်ထိန်းသိမ်းမြှင့်တင်ပြီး နိုင်ငံ့ဂုဏ်မြင့်မားတိုးတက်အောင် အမျိုးသမီးထုအား တိုက်တွန်းနှိုးဆော်ထားပါကြောင်း။ ။