ရန်ကုန်တိုင်းဒေသကြီး၊ သာကေတမြို့နယ်၊ ၃/မာန်ပြေရပ်ကွက်၊ ယမုံနာလမ်းရှိ ဂတ်(စ်)နှင့် ဆက်စပ်ပစ္စည်းရောင်းဝယ်ရေးဆိုင် မီးလောင်မှု

 ရန်ကုန်တိုင်းဒေသကြီး၊ သာကေတမြို့နယ်၊ ၃/မာန်ပြေရပ်ကွက်၊ ယမုံနာလမ်းရှိ ဂတ်(စ်)နှင့် ဆက်စပ်ပစ္စည်းရောင်းဝယ်ရေးဆိုင် မီးလောင်မှု

    ၂၀၂၄ ခုနှစ်၊ နိုဝင်ဘာ ၂၃ ရက်၊ နံနက် ၁၀ နာရီ ၁၇ မိနစ်ခန့်က ရန်ကုန်တိုင်းဒေသကြီး၊ သာကေတမြို့နယ်၊ ၃/မာန်ပြေရပ်ကွက်၊ ယမုံနာလမ်းရှိ “KK-Naing” ဂတ်(စ်)နှင့် ဆက်စပ်ပစ္စည်း ရောင်းဝယ်ရေးဆိုင် ၂၀x၃၅ ပေ၊ သွပ်မိုး၊ အထပ်သားကာ၊ ကွန်ကရစ်ခင်းအဆောက်အအုံတွင် ဂတ်(စ်)အိုးအကြီးမှ အသေးသို့ ဂတ်(စ်)ဖလှယ်ပြီး ဂတ်(စ်)အိုးအကြီးအား သေချာပြန်မပိတ်ခဲ့ရာမှ အခန်းအတွင်း ဂတ်(စ်)များပြန့်နေစဉ် ဂတ်(စ်)အိုးခေါင်းအား မော်တာ(ကော်ပတ်ပါ)ဖြင့် သန့်ရှင်းရေး ပြုလုပ်နေစဉ် မော်တာမီးပွားထွက်၍ မီးစတင်လောင်ကျွမ်းမှုဖြစ်ပွားကြောင်း သတင်းရရှိသဖြင့်  ရန်ကုန်တိုင်းဒေသကြီးအတွင်းရှိ မီးသတ်စခန်းများမှ မီးသတ်တပ်ဖွဲ့ဝင်များသည် မီးသတ်ယာဉ် ၂၅ စီးဖြင့် သွားရောက်ငြှိမ်းသတ်ခဲ့ရာ နံနက် ၁၁ နာရီ ၂၀ မိနစ်တွင် မီးငြိမ်းခဲ့ပါသည်။
    အဆိုပါ မီးလောင်မှုကြောင့် ၂၀x၃၅ ပေ၊ သွပ်မိုး၊ အထပ်သားကာ၊ ကွန်ကရစ်ခင်းအဆောက်အအုံ နှစ်လုံး၊ ၁၀x၃၅ ပေ၊ သွပ်မိုး၊ အထပ်သားကာ၊ ကွန်ကရစ်ခင်းအဆောက်အအုံ လေးလုံး၏ ထပ်ခိုးများ၊ အတွင်းပစ္စည်းများ မီးလောင်ဆုံးရှုံးခဲ့ပြီး၊ အမျိုးသား တစ်ဦး ထိခိုက်ဒဏ်ရာ(မစိုးရိမ်ရ)အား ကြက်ခြေနီ အသင်းယာဉ်ဖြင့် ရန်ကုန်ပြည်သူ့ဆေးရုံကြီးသို့ ကူညီပို့ဆောင်ပေးခဲ့ပါကြောင်းနှင့် ဂတ်(စ်)ဆိုင်ဝန်ထမ်း ဇင်ကိုအောင်(ခ)ရှက်မင်းအား သာကေတမြို့မရဲစခန်းမှ အမှုဖွင့်အရေးယူထားကြောင်း သတင်းရရှိပါသည်။