ဒုတိယဝန်ကြီး ဒေါက်တာဇော်မြင့် အခြေခံပညာကျောင်းများ၌ ဒုတိယနေ့ကျောင်းအပ်နှံ‌မှု လှည့်လည်ကြည့်ရှု

ဒုတိယဝန်ကြီး ဒေါက်တာဇော်မြင့် အခြေခံပညာကျောင်းများ၌ ဒုတိယနေ့ကျောင်းအပ်နှံ‌မှု လှည့်လည်ကြည့်ရှု

နေပြည်တော် မေ ၂၄

ကျောင်းအပ်နှံရေး သီတင်းပတ် အဖြစ် မေ ၂၂ ရက်မှ ဇွန် ၁ ရက်အထိ သတ်မှတ်၍ ကျောင်းအပ်နှံမှု လက်ခံခြင်းများကို ဆောင်ရွက်လျက်ရှိရာ ယမန်နေ့တွင် ပြည်ထောင်စုနယ်မြေ နေပြည်တော်ရှိ အခြေခံပညာကျောင်းအသီးသီး၌ ဒုတိယနေ့ ကျောင်းအပ်လက်ခံခြင်းများကို ဆောင်ရွက်လျက်ရှိသည်။

ပညာရေးဝန်ကြီးဌာန ဒုတိယဝန်ကြီး ဒေါက်တာဇော်မြင့်သည် ပညာရေးဝန်ကြီးဌာန ညွှန်ကြား ရေးမှူးချုပ်၊ ဒုတိယအမြဲတမ်းအတွင်းဝန်များနှင့်အတူ ယမန်နေ့ နံနက်ပိုင်းတွင် နေပြည်တော် အမှတ်(၅) အခြေခံပညာအထက်တန်းကျောင်း၊ အမှတ်(၆) အခြေခံပညာအထက်တန်းကျောင်းနှင့် အမှတ်(၁၄) အခြေခံပညာအထက်တန်း‌ကျောင်းများသို့ သွားရောက်၍ ကျောင်းလာရောက်အပ်နှံသည့် မိဘအုပ်ထိန်းသူများနှင့် ကျောင်းသား ကျောင်းသူများ အဆင်ပြေချောမွေ့စွာ ကျောင်း အပ်နှံနိုင်ရေး ဆောင်ရွက်ပေးနေမှု၊ ကျောင်းသား ကျောင်းသူများအတွက် ပြဋ္ဌာန်းပုံနှိပ်စာအုပ်များ၊ ဗလာစာအုပ်များ၊ စာရေးကိရိယာများနှင့် ကျောင်းဝတ်စုံများ တစ်ပါတည်း‌ အခမဲ့ထောက်ပံ့‌ပေးအပ်‌နေမှုအခြေအနေများကို လှည့်လည်ကြည့်ရှု စစ်ဆေးပြီး ကျောင်းလာရောက်အပ်နှံကြသည့် ကျောင်းသား ကျောင်းသူများနှင့် ကျောင်းသားမိဘများကို ရင်းရင်းနှီးနှီး လိုက်လံနှုတ်ဆက် အားပေးသည်။

ထို့နောက် ဒုတိယဝန်ကြီးနှင့် အဖွဲ့သည် ဇွန် ၁၆ ရက်တွင် တက္ကသိုလ်ဝင်စာမေးပွဲ ပြန်လည် ဖြေဆိုကြမည့် ကျောင်းသား ကျောင်းသူများ စခန်းသွင်းလေ့ကျင့်သင်ကြားပေးနေမှုကို ရင်းရင်းနှီးနှီး လိုက်လံကြည့်ရှုအားပေးကာ ကျောင်းသား‌ ကျောင်းသူများ စာမေးပွဲပြန်လည်ဖြေဆိုရာတွင် ယခင်ရည်မှန်းချက်ထက် ပိုမိုမြင့်မားသည့် ရည်မှန်းချက်ဖြင့် ကြိုးစားသင်ယူကြ‌‌စေလို ကြောင်း၊ စခန်းသွင်းလေ့ကျင့်စဉ်ကာလအတွင်း ကျန်းမာ‌ရေးအထူးဂရုစိုက်ကြစေလို‌ကြောင်း မှာကြားပြီး စားသောက်ရေး၊ နေထိုင်ရေးကိစ္စရပ်များ အဆင်ပြေစေရေး ပေါင်းစပ်ညှိနှိုင်းဆောင်ရွက်ပေးခဲ့ကြောင်း သိရသည်။

သတင်းစဉ်