ပါတီစုံဒီမိုကရေစီအထွေထွေရွေးကောက်ပွဲများကို ပျက်ပြားစေရန် ရည်ရွယ်၍ နှောင့်ယှက်ဟန့်တား ဖျက်ဆီးခြင်း ပြုလုပ်သူများအား အရေးယူ 

ပါတီစုံဒီမိုကရေစီအထွေထွေရွေးကောက်ပွဲများကို ပျက်ပြားစေရန် ရည်ရွယ်၍ နှောင့်ယှက်ဟန့်တား ဖျက်ဆီးခြင်း ပြုလုပ်သူများအား အရေးယူ 

     ၂၀၂၅ ခုနှစ်၊ ပါတီစုံဒီမိုကရေစီအထွေထွေရွေးကောက်ပွဲ ကျင်းပမှုကို ပျက်ပြားစေရန် ရည်ရွယ်၍ လူမှုကွန်ရက်စာမျက်နှာများ၊ အများပြည်သူဆိုင်ရာနေရာများ၌ ဟောပြောခြင်း၊ ပြောဆိုခြင်း၊ စည်းရုံးလှုံ့ဆော်ခြင်း၊ ဆန္ဒပြခြင်း၊ စာရေးသားခြင်း၊ ရုပ်ပုံပိုစတာများ ချိတ်ဆွဲခြင်း စသည်တို့ဖြင့် နှောင့်ယှက်ဟန့်တားဖျက်ဆီးခြင်းများ၊ ရွေးကောက်ပွဲဆိုင်ရာ လုပ်ငန်းစဉ်များအား ထိခိုက် ပျက်စီးအောင် နှောင့်ယှက်ဟန့်တားဖျက်ဆီးခြင်း ပြုလုပ်သူများအား လုံခြုံရေးတပ်ဖွဲ့ဝင်များက ပါတီစုံဒီမိုကရေစီအထွေထွေရွေးကောက်ပွဲများကို နှောင့်ယှက်ဟန့်တားခြင်းမှ ကာကွယ်ပေးရေး ဥပဒေနှင့်အညီ အမှုရေးဖွင့် ဆောင်ရွက်လျက်ရှိပါသည်။
     ထိုသို့ ဆောင်ရွက်လျက်ရှိရာ ၂၀၂၅ ခုနှစ်၊ အောက်တိုဘာ ၂၁ ရက် နံနက် ၇ နာရီ ၃၀ မိနစ်တွင် မွန်ပြည်နယ်၊ ရေးမြို့နယ်၊ မြို့မ(၂)ရပ်ကွက်နေ ရပ်ကွက်၊ ကျေးရွာရွေးကောက်ပွဲကော်မရှင်အဖွဲ့ခွဲ ဥက္ကဋ္ဌဖြစ်သူ ဦးလင်းနိုင်ဦး(၃၉)နှစ်သည် ၎င်း၏ညီဖြစ်သူ ဦးကျော်လင်းဦး(၃၃)နှစ်နှင့်အတူ ကိုယ်ပိုင် မော်တော်ယာဉ်ဖြင့် မော်လမြိုင်မြို့သို့ ရေး-မော်လမြိုင်ကားလမ်းအတိုင်း ထွက်ခွာလာစဉ် မွန်ပြည်နယ်၊ သံဖြူဇရပ်မြို့နယ်၊ ဝဲခမိကျေးရွာအနီး အနင်းလမ်းခွဲအရောက်၌ KNU အကြမ်းဖက် အဖွဲ့နှင့် PDF အမည်ခံ အကြမ်းဖက်သမားများ ပူးပေါင်းအဖွဲ့က ဦးလင်းနိုင်ဦးအား ဖမ်းဆီး ခေါ်ဆောင်သွားခဲ့သဖြင့် အဆိုပါအကြမ်းဖက်သမားများအား အောက်တိုဘာ ၂၂ ရက်တွင် သံဖြူဇရပ် မြို့မရဲစခန်း (ပ)၂၃၉/၂၀၂၅၊ ပါတီစုံဒီမိုကရေစီအထွေထွေရွေးကောက်ပွဲများကို နှောင့်ယှက်ဟန့်တား ဖျက်ဆီးခြင်းမှ ကာကွယ်ပေးရေးဥပဒေပုဒ်မ ၂၄ (ခ) ဖြင့် လည်းကောင်း။
      အလားတူ အောက်တိုဘာ ၂၁ ရက် မွန်းလွဲ ၁ နာရီတွင် ရန်ကုန်တိုင်းဒေသကြီး၊ လမ်းမတော် မြို့နယ်၊ အမှတ်(၅)ရပ်ကွက်နေ ပြည်ထောင်စုကြံ့ခိုင်ရေးနှင့်ဖွံ့ဖြိုးရေးပါတီမှ လွှတ်တော် ကိုယ်စားလှယ်လောင်း ဦးညီညီသွယ်(၅၃)နှစ်သည် အဆိုပါရပ်ကွက်ရှိ ၎င်းဖွင့်လှစ်ထားသည့် လက်ဖက်ရည်ဆိုင်၌ ရှိနေစဉ် စာပို့ဝန်ထမ်းဝတ်စုံဝတ်ဆင်ထားသူ တစ်ဦးမှ စာတစ်စောင် လာရောက်ပေးပို့သဖြင့် ဖွင့်ဖောက်ကြည့်ခဲ့ရာ ၎င်းအား ခြိမ်းခြောက်ရေးသားထားသည့်စာဖြစ်ကြောင်း တွေ့ရှိရသဖြင့် အဆိုပါခြိမ်းခြောက်စာ ရေးသား၊ ပေးပို့သူ(စိစစ်ဆဲ)အား လမ်းမတော်မြို့မရဲစခန်း (ပ)၁၀၀/၂၀၂၅၊ ပါတီစုံဒီမိုကရေစီအထွေထွေရွေးကောက်ပွဲများကို နှောင့်ယှက်ဟန့်တားဖျက်ဆီးခြင်းမှ ကာကွယ်ပေးရေးဥပဒေပုဒ်မ ၂၄(က) ဖြင့် လည်းကောင်း အမှုရေးဖွင့်ကာ ပြစ်မှုကျူးလွန်သူများအား ဖော်ထုတ်ဖမ်းဆီးနိုင်ရေး ဆက်လက်ဆောင်ရွက်လျက်ရှိကြောင်း သတင်းရရှိပါသည်။