ပဲခူးတိုင်းဒေသကြီး၊ လက်ပံတန်းမြို့နယ်၌ စက်သုံးဆီများ တရားမဝင် သိုလှောင်ထားသူ အမျိုးသား တစ်ဦးအား ဖမ်းဆီးအရေးယူ

ပဲခူးတိုင်းဒေသကြီး၊ လက်ပံတန်းမြို့နယ်၌ စက်သုံးဆီများ တရားမဝင် သိုလှောင်ထားသူ အမျိုးသား တစ်ဦးအား ဖမ်းဆီးအရေးယူ

     ၂၀၂၅ ခုနှစ်၊ ဒီဇင်ဘာ ၇ ရက်က ပဲခူးတိုင်းဒေသကြီး၊ လက်ပံတန်းမြို့နယ်၌ စက်သုံးဆီများ တရားမဝင် သိုလှောင်ထားသူ အမျိုးသား တစ်ဦးအား ဖမ်းဆီးအရေးယူထားကြောင်း သိရသည်။

     ဖြစ်စဉ်မှာ ဒီဇင်ဘာ ၇ ရက် ညနေ ၆ နာရီ ၂၀ မိနစ်တွင် ပဲခူးတိုင်းဒေသကြီး၊ လက်ပံတန်း မြို့နယ်၊ လက်ပံတန်း-သာရဝေါသွား မဟာဗျူဟာကားလမ်းဘေးရှိ “စိန်သဇင်” စက်သုံးဆီ အရောင်းဆိုင်၌ စက်သုံးဆီများ တရားမဝင် သိုလှောင်ထားကြောင်း သတင်းအရ လက်ပံတန်းမြို့မ ရဲစခန်းမှ တပ်ဖွဲ့ဝင်များပါဝင်သော ပူးပေါင်းအဖွဲ့က သွားရောက်စစ်ဆေးခဲ့ရာ ဆီလှောင်ကန် တာဝန်ခံဖြစ်သူ လက်ပံတန်းမြို့နယ်၊ နဘဲကွင်းကျေးရွာနေ အောင်စိုးဦး (၃၉)နှစ်အား တွေ့ရှိရပြီး YGN-36/5S-XXXX DONEFENG အဖြူရောင် ဆီဘောက်ဆာမော်တော်ယာဉ်ပေါ်တွင် ပရီမီယံဒီဇယ် ၁၅၀၀ ဂါလန်ခန့်နှင့် “စိန်သဇင်” စက်သုံးဆီသိုလှောင်ကန်တွင် ပရီမီယံဒီဇယ် ၄၅၀၀ ဂါလန်ခန့်၊ စုစုပေါင်း ပရီမီယံဒီဇယ် ၆၀၀၀ ဂါလန်ခန့်(တစ်ဂါလန်လျှင် ၁၂,၈၂၀ ကျပ်နှုန်းဖြင့် တန်ဖိုးငွေကျပ် ၇၆၉ သိန်းခန့်)အား တွေ့ရှိသိမ်းဆည်းရမိသဖြင့် အောင်စိုးဦး အား လက်ပံတန်းမြို့မရဲစခန်း (ပ)၂၁၅/၂၀၂၅၊ ရေနံနှင့်ရေနံထွက်ပစ္စည်းဆိုင်ရာဥပဒေပုဒ်မ ၃၇ ဖြင့် အမှုဖွင့်အရေးယူထားကြောင်း သတင်းရရှိပါသည်။