ပြည်ထောင်စုဝန်ကြီး ခွန်သန့်ဇော်ထူး ဝန်ထမ်းများအတွက် ရုံးမြေဧရိယာအတွင်း ယာယီတဲများ ဆောက်လုပ်နေမှု ကြည့်ရှုစစ်ဆေး

ပြည်ထောင်စုဝန်ကြီး ခွန်သန့်ဇော်ထူး ဝန်ထမ်းများအတွက် ရုံးမြေဧရိယာအတွင်း ယာယီတဲများ ဆောက်လုပ်နေမှု ကြည့်ရှုစစ်ဆေး

နေပြည်တော် ဧပြီ ၂၀

တိုင်းရင်းသားလူမျိုးများရေးရာဝန်ကြီးဌာန ပြည်ထောင်စုဝန်ကြီး ခွန်သန့်ဇော်ထူးနှင့် ဒုတိယဝန်ကြီး ဦးဇော်အေးမောင်တို့သည် ယနေ့နံနက်ပိုင်းတွင် တိုင်းရင်းသား လူမျိုးများရေးရာဝန်ကြီးဌာနရုံး မြေဧရိယာအတွင်း၌ ငလျင်ဘေးဒဏ်ကြောင့် ထိခိုက်ခဲ့သည့် ပြည်ထောင်စုဝန်ကြီးရုံးနှင့် ဦးစီးဌာနများမှ ဝန်ထမ်းမိသားစုများ နေထိုင်ရန်အတွက် ယာယီတဲများ ဆောက်လုပ်ပြီးစီးမှု အခြေအနေကို သွားရောက်ကြည့်ရှုစစ်ဆေးသည်။

ယင်းနောက် ယာယီတဲများအတွက် သုံးရေသွယ်တန်းထားရှိမှုအခြေအနေ၊ ယာယီတဲများ ဆောက်လုပ်ပြီးစီးမှုအခြေအနေနှင့် ယင်လုံအိမ်သာဆောက်လုပ်မည့် မြေနေရာတို့ကို ကြည့်ရှုစစ်ဆေးပြီး လိုအပ်သည်များကို ပေါင်းစပ်ညှိနှိုင်းဖြည့်ဆည်းဆောင်ရွက်ပေးသည်။

ဆက်လက်၍ ပြည်ထောင်စုဝန်ကြီးသည် တာဝန်ရှိသူများနှင့် တွေ့ဆုံ၍ နိုင်ငံတော်အကြီးအကဲ၏ လမ်းညွှန်မှာကြားချက်များနှင့် နိုင်ငံတော်မှ ဆက်လက်ဆောင်ရွက်ပေးမည့် အစီအစဉ်များကို ရှင်းလင်းပြောကြားပြီး မိမိဝန်ကြီးဌာနအနေဖြင့် ဝန်ထမ်းများအတွက် ယာယီတဲများကို မိသားစုအလိုက် တစ်နှစ်ကျော်ခန့် လုံလုံခြုံခြုံနေထိုင်နိုင်ရန် မူလကတည်းက ရည်ရွယ်ဆောက်လုပ်ပေးလျက်ရှိသဖြင့် နေထိုင်မည့် စာရင်းများကို ကြိုတင်စစ်ဆေးရန်နှင့် လိုအပ်မည့်မိသားစုများကို အခြေတကျနေထိုင်နိုင်ရေးဆောင်ရွက်သွားမည်ဖြစ်၍ တာဝန်ခံများအနေဖြင့် အဆင့်ဆင့် ဆင့်ကဲ၍ အောက်ခြေဝန်ထမ်းများအထိ သတင်းအချက်အလက်များ ပြန်လည်မျှဝေပေးရန်၊ သင်္ကြန်ရုံးပိတ်ရက်များအပြီး ရုံးလုပ်ငန်းများ ပုံမှန်လည်ပတ်နိုင်ရေးကြိုတင်စီမံဆောင်ရွက်ရန်တို့ကို မှာကြားခဲ့ကြောင်း သိရသည်။

သတင်းစဉ်