ပြည်ထဲရေးဝန်ကြီးဌာန၊ ပြည်ထောင်စုဝန်ကြီး ဒုတိယဗိုလ်ချုပ်ကြီး ထွန်းထွန်းနောင် ဒုတိယရဲအုပ်လောင်းသင်တန်း အမှတ်စဉ်(၁၂၃) သင်တန်းဆင်းပွဲအခမ်းအနား တက်ရောက်

ပြည်ထဲရေးဝန်ကြီးဌာန၊ ပြည်ထောင်စုဝန်ကြီး ဒုတိယဗိုလ်ချုပ်ကြီး ထွန်းထွန်းနောင် ဒုတိယရဲအုပ်လောင်းသင်တန်း အမှတ်စဉ်(၁၂၃) သင်တန်းဆင်းပွဲအခမ်းအနား တက်ရောက်

     ပြည်ထဲရေးဝန်ကြီးဌာန၊ မြန်မာနိုင်ငံရဲတပ်ဖွဲ့၊ ဒုတိယရဲအုပ်လောင်းသင်တန်း အမှတ်စဉ်(၁၂၃)၊ ရဲဗလတပ်ခွဲ၏ သင်တန်းဆင်းပွဲအခမ်းအနားကို ၂၀၂၅ ခုနှစ်၊ ဩဂုတ် ၂၉ ရက် နံနက် ၇ နာရီ ၃၀ မိနစ်တွင် မန္တလေးတိုင်းဒေသကြီး၊ ပြင်ဦးလွင်မြို့နယ်၊ ရဲအရာရှိလေ့ကျင့်ရေးကျောင်း၊ စစ်ရေးပြကွင်း၌ ကျင်းပပြုလုပ်ရာ ခမ်းအနားသို့ ပြည်ထဲရေးဝန်ကြီးဌာန၊ ပြည်ထောင်စုဝန်ကြီး ဒုတိယဗိုလ်ချုပ်ကြီး ထွန်းထွန်းနောင်  တက်ရောက်၍ သင်တန်းဆင်းဂုဏ်ပြုအမှာစကား ပြောကြားပါသည်။

     ရှေးဦးစွာ ပြည်ထဲရေးဝန်ကြီးဌာန၊ ပြည်ထောင်စုဝန်ကြီး ဒုတိယဗိုလ်ချုပ်ကြီး ထွန်းထွန်းနောင်သည် ဒုတိယရဲအုပ်လောင်းများ၏ အလေးပြုခြင်းကိုခံယူကာ သင် တန်းဆင်းတပ်ခွဲများအား စစ်ဆေးခဲ့ပြီး၊ ဒုတိယရဲအုပ်လောင်းများက အနှေးလျှောက်၊ အမြန်လျှောက်ဖြင့် ချီတက်အလေးပြုကြသည်။ ယင်းနောက် ပြည်ထောင်စုဝန်ကြီးက အကောင်းဆုံးကျောင်းသားဆုရ ဒုတိယရဲအုပ်လောင်း မေကြည်အေး၊ ကွန်ပျူတာဘာသာရပ်ထူးချွန်ဆုရ ဒုတိယရဲအုပ်လောင်း နန္ဒာအောင်၊ လေ့ကျင့်ရေးထူးချွန်ဆုရ ဒုတိယရဲအုပ်လောင်း လှိုင်မျိုးထွဋ်၊ ဥပဒေဘာသာရပ်ထူးချွန်ဆုရ ဒုတိယရဲအုပ်လောင်း မေကြည်အေး၊ အင်္ဂလိပ်စာဘာသာရပ်ထူးချွန်ဆုရ ဒုတိယရဲအုပ်လောင်း နန္ဒာအောင် တို့အား ဆုများအသီးသီး ပေးအပ်ချီးမြှင့်ခဲ့သည်။ 

     ထို့နောက် ပြည်ထောင်စုဝန်ကြီးက သင်တန်းဆင်းဂုဏ်ပြုအမှာစကား ပြောကြားရာတွင်  မြန်မာနိုင်ငံရဲတပ်ဖွဲ့တွင် ခေါင်းဆောင်ငယ်များအဖြစ် တာဝန်ယူကြရတော့မည့်သူများအနေဖြင့် ကွပ်ကဲရသည့်တပ်ဖွဲ့အား တက်ညီလက်ညီဖြင့် စုပေါင်းဆောင်ရွက်နိုင်စွမ်းရှိအောင် ဦးဆောင်နိုင်ရမှာဖြစ်သလို မိမိကိုယ်တိုင်လည်း အရာရာမှာ စံပြဖြစ်အောင် ခေါင်းဆောင်မှုအင်္ဂါရပ် ၁၆ ချက်နှင့်အညီ လိုက်နာကျင့်ကြံ နေထိုင်သွားကြရန် လိုအပ်ပြီး ရဲအရာရှိတပ်ဖွဲ့ဝင်တစ်ဦးအဖြစ် မွန်မြတ်သည့် လုပ် ငန်းတာဝန်များကို ကျေပွန်စွာထမ်းဆောင်နေသူများဖြစ်သည်ကို အစဉ်သတိချပ်နေရန် မှာကြားလိုကြောင်း။

     မြန်မာနိုင်ငံရဲတပ်ဖွဲ့၏ အစဉ်အလာ(၁၂)ရပ်တွင်ပါရှိသည့် “နိုင်ငံတော်တွင် အရေးကြုံတိုင်း နောင်တော်တပ်မတော်နှင့် တစ်စိတ်တစ်ဝမ်းတည်းလက်တွဲ၍ ကာကွယ်စောင့်ရှောက်ခဲ့သည့် တပ်ဖွဲ့ ဖြစ်သည်” ဟူသည့် အချက်နှင့်အညီ မြန်မာနိုင်ငံရဲတပ်ဖွဲ့ဝင်များသည် တပ်မတော်နှင့်အတူ နယ်မြေခံပြည်သူ့စစ်အဖွဲ့၊ ပြည်သူ့လုံခြုံ ရေးနှင့်အကြမ်းဖက်နှိမ်နင်းရေးအဖွဲ့၊ ဒေသခံပြည်သူလူထုများနှင့် လက်တွဲပြီး တည်ငြိမ်အေးချမ်းမှုပျက်ပြားနေသည့် နေရာဒေသများတွင် တည်ငြိမ်အေးချမ်းမှုပြန်လည်ရရှိအောင် ဆောင်ရွက်လျက်ရှိကြောင်း၊ ပြည်သူလူထု၏ အသက်အိုးအိမ်စည်းစိမ်များကို ဆိုးရွားစွာ ထိခိုက်ပျက်စီးစေသည့် အကြမ်းဖက်မှုများကို နှိမ်နင်းရာတွင် ရဲစွမ်းသတ္တိအရင်းခံ၍ ရန်သူအပေါ် ပြုကျင့်ရမည့် ကျင့်ဝတ် ၅ ပါးမှ ပဉ္စမအချက်ဖြစ်သည့် “ရန်သူ၏စိတ်ဓာတ်ကို ယတိပြတ်ချိုးနှိမ်၍ အပြီးသတ်အောင်ပွဲခံယူပါ” ဆိုသည့် ကျင့်ဝတ်နှင့်အညီ ကျင့်ကြံကြိုးပမ်း ဆောင်ရွက်ကြရမှာဖြစ်ကြောင်း။

     နိုင်ငံတော်မှလည်း တိုင်းပြည်နှင့်လူမျိုးအတွက် စွန့်လွှတ်စွန့်စားတာဝန်ထမ်းရွက်ခဲ့ကြသည့် တပ်ဖွဲ့ဝင်များကို ထိုက်တန်သည့် ဂုဏ်ပြုမှုများချီးမြှင့်ပေးလျက်ရှိရာ မိမိတို့တပ်ဖွဲ့ဝင်များအနေဖြင့် ပြည်သူကို အလုပ်အကျွေးပြုသည့်၊ နိုင်ငံတော်၏ လွတ်လပ်ရေးနှင့်အချုပ်အခြာအာဏာတည်မြဲရေးကို အသက်ပေးကာကွယ်စောင့် ရှောက်တတ်သည့် ရဲတပ်ဖွဲ့ဝင်များအဖြစ် လေးနက်စွာခံယူပြီးကျရာ တာဝန်များကို ဦးလည်မသုန် ထမ်းရွက်သွားကြဖို့ မှာကြားလိုကြောင်း။

     မြန်မာနိုင်ငံရဲတပ်ဖွဲ့သည် ရည်မှန်းချက်တာဝန် ၄ ရပ်အား အကောင်အထည်ဖော် ဆောင်ရွက်ရာတွင်လည်းကောင်း၊ စစ်ဆင်ရေးနှင့် လုံခြုံရေးတာဝန်များကို နောင် တော်တပ်မတော်နှင့် လက်တွဲပြီး ထမ်းဆောင်ရာတွင်လည်းကောင်း စစ်ရေးသတိ၊ လုံခြုံရေးအသိရှိရန်နှင့် လုံခြုံရေးကျိုးပေါက်မှုများ မရှိစေရေးအတွက် အလေး ထားကြပ်မတ်ဆောင်ရွက်သွားရမည်ဖြစ်ကြောင်း၊ ရပ်ရွာအေးချမ်းသာယာရေးနှင့် လုံခြုံရေးတာဝန်များအား ပြည်သူနှင့်အတူ ပူးပေါင်းဆောင်ရွက်ကြရမှာဖြစ်ပြီး တရားဥပဒေစိုးမိုးရေးအတွက် ပြစ်မှုများမဖြစ်ပွားအောင် ကြိုတင်ကာကွယ်ခြင်း၊ ပြစ်မှုဖြစ်ပွားပါကလည်း တရားခံများကို ချက်ချင်းစုံစမ်းဖော်ထုတ် ဖမ်းဆီးပြီး ပြစ်မှုအလိုက်ထိရောက်သည့် ပြစ်ဒဏ်ကျခံနိုင်ရေး တရားဥပဒေနှင့်အညီ စီမံခြင်းတို့ကို ဆောင်ရွက်ကြရမှာဖြစ်ကြောင်း၊ “မြန်မာနိုင်ငံရဲတပ်ဖွဲ့၏ အမြင့်ဆုံးဂုဏ် သိက္ခာသည် ပြည်သူလူထုက အားကိုးယုံကြည်မှုပင်ဖြစ်သည်” ဆိုသည့် ခံယူချက်နှင့်အညီ ပြည်သူကလေးစားပြီး အားကိုးယုံကြည်ရသည့် စွမ်းရည်ရှိသော ရဲတပ်ဖွဲ့ဖြစ်စေရေး ကြိုးပမ်းထမ်းဆောင်သွားကြရန် လိုအပ်ကြောင်း။

     အမျိုးသားကာကွယ်ရေးနှင့် လုံခြုံရေးကောင်စီ၏ ဦးတည်ချက် ၄ ရပ်နှင့်အညီ လွတ်လပ်၍ တရားမျှတသော ရွေးကောက်ပွဲအောင်မြင်စွာ ကျင်းပနိုင်ရေးဆောင်ရွက်ရာတွင် ဆန့်ကျင်ဘက် အဖွဲ့ အစည်းများက အဖျက်အမှောင့်လုပ်ငန်းများ မပြုလုပ်နိုင်ရန်အတွက် မြန်မာနိုင်ငံရဲတပ်ဖွဲ့အနေဖြင့် သတင်းလက်ဦးမှုရယူပြီး စုံစမ်းဖော်ထုတ်အရေးယူ ဆောင်ရွက်သွားကြရန်နှင့် လုံခြုံရေးနှင့် တရား ဥပဒေ စိုးမိုးရေးလုပ်ငန်းများကို အရှိန်အဟုန်မြှင့်တင်ဆောင်ရွက်ကြရန် လိုအပ်ကြောင်း။

     မြန်မာနိုင်ငံရဲတပ်ဖွဲ့ဝင်များအားလုံး အသက်အရွယ်အလိုက် ရှိသင့်ရှိထိုက်သည့် ကျန်းမာကြံ့ခိုင်မှု ရှိအောင် နေ့စဉ်ပုံမှန် လေ့ကျင့်နေရမှာဖြစ်သလို ကျန်းမာရေးကိုထိခိုက်စေသည့် အရက်၊ ကွမ်းယာ၊ ဆေးလိပ်သောက်သုံးခြင်းနှင့် ဆီ၊ ဆား၊ အချို လွန်ကဲစွာစားသုံးခြင်းများကို ရှောင်ကြဉ်၍ ကျန်းမာရေးကို အထောက်အကူဖြစ်စေသည့် လမ်းလျှောက်ခြင်း၊ လေကောင်းလေသန့်ရှူရှိုက်သည့် အသက်ရှူ လေ့ကျင့်ခန်းပြုလုပ်ခြင်း၊ ရေများများသောက်သုံးခြင်းများကို တစ်ဦးချင်းကိုယ်စီ အသိ တရား၊ ဆင်ခြင်တုံ တရားများဖြင့် ထိန်းသိမ်းနေထိုင်ကာ စွမ်းရည်ပြည့်ဝထက်မြက်စေရေးအတွက် “လေ့လာ၊ လေ့ကျင့်၊ လိုက်နာ” ဟူသော လေ့ကျင့်ရေးမူဝါဒနှင့်အညီ မိမိကိုယ်ကိုမိမိ တည်ဆောက်ကြရမှာဖြစ်ကြောင်း တိုက်တွန်းပြောကြားခဲ့ပါသည်။

     သင်တန်းဆင်းပွဲအခမ်းအနားသို့ ပြည်ထဲရေးဝန်ကြီးဌာနလက်အောက်ရှိ တပ်ဖွဲ့/ဦးစီးဌာနများမှ မြန်မာနိုင်ငံရဲတပ်ဖွဲ့ ရဲချုပ်နှင့် ညွှန်ကြားရေးမှူးချုပ်များ၊ ရဲအရာရှိကြီးများ၊ နိုင်ငံ့ဝန်ထမ်းတက္ကသိုလ် (အထက်မြန်မာပြည်)ပါမောက္ခချုပ်၊ ဗဟိုမီးသတ်သင်တန်းကျောင်းမှ ကျောင်းအုပ်ကြီးနှင့် ဖိတ်ကြား ထားသူများ တက်ရောက်ခဲ့ကြပါသည်။

     နေ့လယ်ပိုင်းတွင် ပြည်ထောင်စုဝန်ကြီးသည် တာဝန်ရှိသူများလိုက်ပါလျက် ရဲအရာရှိလေ့ကျင့်ရေး ကျောင်းဝင်းအတွင်း သင်တန်းသားများနှင့် ဝန်ထမ်းမိသားစုများ သက်သာချောင်ချိရေးအတွက် တည်ဆောက်လျက်ရှိသည့် ဥစားကြက် မွေးမြူရေးခြံများအား သွားရောက်ကြည့်ရှု့စစ်ဆေးခဲ့ပြီး တာဝန် ရှိသူတစ်ဦး၏ ရှင်း လင်းတင်ပြမှုအပေါ် ပြည်ထောင်စုဝန်ကြီးက ဆက်လက်ဆောင်ရွက်ရန် လိုအပ်သည် များအား မှာကြားခဲ့ပါသည်။

     ပြည်ထောင်စုဝန်ကြီးသည် ညပိုင်းတွင် ရဲအရာရှိလေ့ကျင့်ရေးကျောင်း ဗဟိုခန်းမ၌ ကျင်းပ ပြုလုပ်သည့် ဒုတိယရဲအုပ်လောင်းသင်တန်း အမှတ်စဉ် (၁၂၃)၏ သင်တန်းဆင်းဂုဏ်ပြု ညစာစားပွဲ အခမ်းအနားသို့ မြန်မာနိုင်ငံရဲတပ်ဖွဲ့ ရဲချုပ် ဒုတိယရဲဗိုလ်ချုပ်ကြီး ဝင်းဇော်မိုး၊ ဖိတ်ကြားထားသော ဧည့်သည်တော်များ၊ သင်တန်း ဆင်း ဒုတိယရဲအုပ်များနှင့်အတူ တက်ရောက်ခဲ့ကြောင်း သတင်းရရှိပါသည်။