လက်ကိုင်ရှည် လက်တွန်းထွန်စက်နှင့် တွဲဖက်သုံးလူထိုင်စီး (စက်တုံး)နောက်တွဲကိရိယာများ လွှဲပြောင်းပေးအပ်

လက်ကိုင်ရှည် လက်တွန်းထွန်စက်နှင့် တွဲဖက်သုံးလူထိုင်စီး (စက်တုံး)နောက်တွဲကိရိယာများ လွှဲပြောင်းပေးအပ်

ပဲခူး မေ ၂၄

ခေတ်စနစ်နှင့်အညီ တောင်သူ လယ်သမားများ လူမှုစီးပွားဘဝဖွံ့ဖြိုးတိုးတက်စေရန် နိုင်ငံတော် အစိုးရက လယ်ယာသုံးစက် ကိရိယာများအား လက်ငင်းစနစ်၊ အရစ်ကျစနစ်များဖြင့် ဖြန့်ဖြူး ရောင်းချပေးလျက် ရှိကြောင်း၊ စက်ပြင်ဆင်ခြင်းနှင့် စနစ်တကျ နည်းမှန်လမ်းမှန် မောင်းနှင်သုံးစွဲ နိုင်ရေးအတွက် မြို့နယ်စက်မှု လယ်ယာစခန်းများတွင်သင်တန်းများ ဖွင့်လှစ်သင်ကြားပေးလျက်ရှိကြောင်း ပဲခူးတိုင်းဒေသကြီး ဝန်ကြီးချုပ်ဦးမျိုးဆွေဝင်းက ပြောကြားသည်။

ယနေ့နံနက်ပိုင်းတွင် ပဲခူးမြို့နယ် ဘုရားကြီးမြို့ စက်မှုလယ်ယာ သင်တန်းကျောင်း၌ ကျင်းပသည့် လက်ကိုင်ရှည် လက်တွန်းထွန်စက်နှင့် တွဲဖက်သုံးလူထိုင်စီး(စက်တုံး) နောက်တွဲ ကိရိယာများ လွှဲပြောင်းပေးအပ် ပွဲ အခမ်းအနားတွင် ထိုသို့ပြောကြားခဲ့ခြင်းဖြစ်သည်။

ဆက်လက်၍ တိုင်းဒေသကြီးဝန်ကြီးချုပ်က တိုင်းဒေသကြီးအစိုးရအဖွဲ့၏ ညွှန်ကြားချက် ဖြင့် တည်ဆောက်ထားသည့် လက်ကိုင်ရှည် လက်တွန်းထွန်စက်နှင့် တွဲဖက်သုံးလူထိုင်စီး (စက်တုံး) နောက်တွဲကိရိယာများသည် တောင်သူများအတွက် များစွာအကျိုးကျေးဇူးရရှိမည်ဖြစ်ကြောင်း၊ မြေယာပြုပြင်ခြင်းနှင့် ရိတ်သိမ်းခြွေလှေ့ခြင်းလုပ်ငန်းများတွင် လယ်ယာသုံးစက် ကိရိယာများကို တွင်ကျယ်စွာ အသုံးပြုစေလိုကြောင်း ပြောကြားသည်။

ထို့နောက် တိုင်းဒေသကြီးဝန်ကြီးချုပ်သည် ဒေသခံတောင်သူ ၅၀ကို လက်ကိုင်ရှည်လက်တွန်း ထွန်စက်အစီး ၅၀ နှင့် တွဲဖက်သုံးလူထိုင်စီး (စက်တုံး) နောက်တွဲကိရိယာ ၃၀ ကို လွှဲပြောင်းပေးအပ်သည်။

ဆက်လက်၍ တိုင်းဒေသကြီးဝန်ကြီးချုပ်သည် ဘောနတ်ကြီးကျေးရွာ၌ လက်ကိုင်ရှည်လက်တွန်း ထွန်စက်လူထိုင်စီး (စက်တုံး) နောက်တွဲကိရိယာဖြင့် မြေယာပြုပြင်ခြင်း သရုပ်ပြသမှုကို သွားရောက်ကြည့်ရှုပြီး ဒေသခံတောင်သူများနှင့်ရင်းရင်းနှီးနှီး တွေ့ဆုံခဲ့ကြောင်း သိရသည်။

သတင်းစဉ်