မဟာအောင်မြေ၊ လွိုင်လင်နှင့် ရပ်စောက်မြို့နယ်တို့တွင် မူးယစ်ဆေးဝါးများ ဖမ်းဆီးရမိ

မဟာအောင်မြေ၊ လွိုင်လင်နှင့် ရပ်စောက်မြို့နယ်တို့တွင် မူးယစ်ဆေးဝါးများ ဖမ်းဆီးရမိ

နေပြည်တော်၊ ဧပြီ ၄

မူးယစ်ဆေးဝါး တားဆီးနှိမ်နင်းရေးရဲတပ်ဖွဲ့မှ တပ်ဖွဲ့ဝင်များပါဝင်သော ပူးပေါင်းအဖွဲ့သည် ဧပြီလ ၃ ရက် မွန်းလွဲပိုင်းတွင် မဟာအောင်မြေမြို့နယ်၊ မဟာမြိုင်(၂)ရပ်ကွက်၊ လမ်း (၄၀) နှင့် (၄၁) လမ်းကြား၊ (၆၁) လမ်းတွင် တွေ့ရှိသည့် CROWN အမျိုးအစား မော်တော်ယာဉ်နှင့် မော်တော်ဆိုင်ကယ် တစ်စီးတို့ကို ရှာဖွေရာ ယာဉ်ပေါ်တွင် တုံရှီကောင်း၊ စောကွမ်(ခ)ဇော်မင်းငွေနှင့် ကျော်ပိုင်ဟိန်း တို့အားတွေ့ရှိပြီး မော်တော်ယာဉ်မှ ကတ်တမင်း ၄ ဒသမ ၇၅ ကီလို၊  လက်ကိုင်ဖုန်း ၄ လုံးတို့ကို သိမ်းဆည်းရမိခဲ့သည်။

အလားတူ ယင်းနေ့ညနေပိုင်းတွင် မူးယစ်ဆေးဝါး တားဆီးနှိမ်နင်းရေးရဲတပ်ဖွဲ့မှ တပ်ဖွဲ့ဝင်များ ပါဝင်သော ပူပေါင်းအဖွဲ့သည် လွိုင်လင်မြို့နယ်၊ မိုင်းပွန်-တောင်ကြီး သွားကားလမ်း၊ ပွန်ချောင်း တံတားအနီးတွင် စိန်ဝင်းထွန်း(ခ)ကျောက်စိမ်း မောင်းနှင်လာသော မော်တော်ဆိုင်ကယ်ကို ရပ်တန့်ရှာဖွေရာ စိတ်ကြွ ရူးသွပ်ဆေးပြား ၁၄,၀၀၀ နှင့် လက်ကိုင်ဖုန်းတစ်လုံးတို့ကို လည်းကောင်း၊ ထို့အတူ ဧပြီလ ၂ ရက် ညပိုင်းက ရပ်စောက်မြို့မရဲစခန်းမှ တပ်ဖွဲ့ဝင်များပါဝင်သော ပူးပေါင်းအဖွဲ့သည် ရပ်စောက်မြို့နယ်၊ လွယ်ကိုး ကျေးရွာအုပ်စု၊ လွယ်ကိုးကျေးရွာနေ စိုးမောင်၏ တောင်ယာတဲအား ဝင်ရောက် ရှာဖွေရာ စိတ်ကြွရူးသွပ်ဆေးပြား ၅,၆၆၅ ပြား၊ မြန်မာငွေကျပ် ၆၈,၀၀၀ တို့ကို သိမ်းဆည်း ရမိခဲ့သဖြင့် ၎င်းတို့အား မူးယစ်ဆေးဝါးနှင့် စိတ်ကိုပြောင်းလဲစေသော ဆေးဝါးများဆိုင်ရာ ဥပဒေအရ အရေးယူထားကြောင်း သိရသည်။

(ရဲပြန်ကြား)