တပ်မတော်စစ်ကြောင်းများက အကြမ်းဖက်သောင်းကျန်းသူများ ယာယီစိုးမိုးထားသည့် နောင်ချို-အုမ္မသီး-ဟိုခို-မိုးကုတ် လမ်းပိုင်းနှင့် ပြင်ဦးလွင်-ကျောက်မဲလေး-သံဘို-ဟိုခို လမ်းပိုင်း နေရာများအား ပြန်လည်သိမ်းပိုက်ရရှိ

တပ်မတော်စစ်ကြောင်းများက အကြမ်းဖက်သောင်းကျန်းသူများ ယာယီစိုးမိုးထားသည့် နောင်ချို-အုမ္မသီး-ဟိုခို-မိုးကုတ် လမ်းပိုင်းနှင့် ပြင်ဦးလွင်-ကျောက်မဲလေး-သံဘို-ဟိုခို လမ်းပိုင်း နေရာများအား ပြန်လည်သိမ်းပိုက်ရရှိ

နေပြည်တော် ဩဂုတ် ၃၀

တပ်မတော်အနေဖြင့် TNLA အဖွဲ့ နှင့် PDF အမည်ခံ အကြမ်းဖက်သောင်းကျန်းသူများ ခေတ္တစိုးမိုးထားသည့် နောင်ချိုမြို့အား ပြန်လည်သိမ်းပိုက်ထိန်းချုပ်ခဲ့ပြီး ပြည်ထောင်စုလမ်းမကြီးဖြစ်သော မန္တလေး-လားရှိုး-မူဆယ် လမ်းမကြီးပေါ်ရှိ အဓိကလမ်းကြောင်းတစ်ခုဖြစ်သည့် နောင်ချို-ကျောက်မဲ လမ်းပိုင်းအား ပြန်လည်ဖွင့်လှစ်နိုင်ရေးအတွက် နယ်မြေရှင်းလင်းရေးလုပ်ငန်းများကို ခဲရာခဲဆစ်ဖြင့် ဆောင်ရွက်ခဲ့ရာ နောင်ပိန်ကျေးရွာ၊ ပင်ပေါကျေးရွာ၊ နောင်ပစ်လမ်းခွဲနှင့် ဂုတ်တွင်းတံတား၊ ဂုတ်ထိပ်တံတားနှင့် အဆိုပါဒေသတစ်ဝိုက်တို့အား ဩဂုတ်လ ၂၉ ရက်တွင် ပြန်လည်သိမ်းပိုက်ထိန်းချုပ်နိုင်ခဲ့သည်။

အလားတူ ဒေသတွင်းကုန်စည်စီးဆင်းမှုနှင့် ဒေသခံပြည်သူများ လူမှုစီးပွားဘဝဖွံ့ဖြိုးရေးအတွက် အဓိကအရေးပါသော နောင်ချို - အုမ္မသီး - ဟိုခို - မိုးကုတ်လမ်းကြောင်းနှင့် ပြင်ဦးလွင်-ကျောက်မဲလေး-သံဘို-ဟိုခို-မိုးကုတ် လမ်းမကြီးများတစ်လျှောက် ခရီးသွားပြည်သူများ အဆင်ပြေချောမွေ့စွာ ဘေးအန္တရာယ်ကင်းစွာဖြင့် အချိန်အခါမရွေးသွားလာနိုင်ရေးအတွက် အကြမ်းဖက်သမားများ ခေတ္တစိုးမိုးထားသည့် ပြင်ဦးလွင်-မိုးကုတ်နှင့် နောင်ချို - မိုးကုတ် ကားလမ်းပိုင်းအား အမြန်ဆုံး ပြန်လည်ဖွင့်လှစ်နိုင်ရေးအတွက် တပ်မတော်စစ်ကြောင်းများက နယ်မြေရှင်းလင်းရေးလုပ်ငန်းများကို ဆက်လက်ကြိုးပမ်းဆောင်ရွက်လျက်ရှိသည်။

ထိုသို့ဆောင်ရွက်ရာတွင် တပ်မတော်စစ်ကြောင်းများအနေဖြင့် နောင်ချို - လောက်ဖန်း - ဟိုခို - ရတနာသိင်္ဂီသတ္ထုမိုင်းတွင်းလမ်းကြောင်း၊ ပြင်ဦးလွင်-ကျောက်မဲလေး- သံဘို- ဟိုခိုလမ်းကြောင်း၊ အုမ္မသီး - သုံးဆယ် - ဟိုခို -ရတနာ သိင်္ဂီသတ္ထုမိုင်းတွင်း လမ်းကြောင်းများဖြင့် စစ်ကြောင်း(၃)ကြောင်းခွဲ၍ နယ်မြေရှင်းလင်းရေးလုပ်ငန်းများကို ခက်ခက်ခဲခဲဖြင့် သက်စွန့်ကြိုးပမ်းဆောင်ရွက်ခဲ့ရာ နောင်ချို - လောက်ဖန်း - ဟိုခို - ရတနာသိင်္ဂီသတ္ထုမိုင်းတွင်း စစ်ကြောင်းသည် ၂၀၂၅ ခုနှစ်၊ ဇူလိုင် ၁၇ ရက်နေ့တွင် အကြမ်းဖက်သောင်းကျန်းသူများ ခေတ္တစိုးမိုးထားခဲ့သည့် ကုန်းသာရွာသစ်ကျေးရွာနှင့် စက်ရုံကျေးရွာ၊ ဇူလိုင် ၁၈ ရက်နေ့တွင် လောင်ဖန်းဘိလပ်မြေစက်ရုံ၊ ၂၂ ရက်နေ့တွင် ခဲစံရွာနှင့် အင်ကြင်းကုန်းကျေးရွာ ၊ ၂၆ ရက်နေ့တွင် ပန်းစုံကျေးရွာနှင့် ကြူအင်းစိုက်ပျိုးမွေးမြူရေးနှင့် အသက်မွေးမှု အတက်သင်စခန်း(နောင်ချို)နှင့် အသက်မွေးမှုအတက်သင်စခန်း(ကောင်းမှုစခန်းခွဲ)၊ ၂၇ ရက်နေ့တွင် ဟိုနောင်ကျေးရွာ၊ ဩဂုတ် ၁ ရက်နေ့တွင် တော်မွန်းကျေးရွာ၊ ၂ ရက်နေ့တွင် နားနွဲ့ကျေးရွာ၊ ၃ ရက်နေ့တွင် ကြူကော်ကျေးရွာ၊ ၆ ရက်နေ့တွင် ဟိုခိုတို့အား အဆင့်ဆင့်သိမ်းပိုက်ရရှိခဲ့သည်။

အလားတူ အုမ္မသီး - သုံးဆယ် - ဟိုခို - ရတနာသိင်္ဂီသတ္ထုမိုင်းတွင်း လမ်းကြောင်းမှ တပ်မတော်စစ်ကြောင်းသည် အကြမ်းဖက်သောင်းကျန်းသူများ ယာယီစိုးမိုးထားသည့်နေရာများအား အဆင့်ဆင့်ပြန်လည်တိုက်ခိုက်သိမ်းပိုက်ခဲ့ရာ ဇူလိုင် ၂၄ ရက်နေ့တွင် ပြင်ဦးလွင်-နောင်ချို ကားလမ်းမကြီးပေါ်ရှိ အုမ္မသီးကျေးရွာ၊ ရွှေညောင်ပင်ကျေးရွာ၊ ဆမ်ဆယ်ကျေးရွာနှင့် ကျောက်သုံးလုံးကျေးရွာ၊ ၂၅ ရက်နေ့တွင် လွယ်ငင်းကျေးရွာ၊ ၂၆ ရက်နေ့တွင် မြို့တွင်းကျေးရွာ၊ ၂၇ ရက်နေ့တွင် သုံးဆယ်ကျေးရွာ၊ ၂၉ ရက်နေ့တွင် သရက်ကုန်းကျေးရွာ၊ ရွှေကြာအင်းကျေးရွာ၊ အထက်ကြူအင်းကျေးရွာ၊ ၃၀ ရက်နေ့တွင် အောက်ကြူအင်းကျေးရွာ၊ ဩဂုတ် ၁ ရက်တွင် နမ့်ခေါက်ကျေးရွာ၊ တော်မွန်းကျေးရွာ၊ ဩဂုတ် ၂ ရက်တွင် ကုန်းညောင်ကျေးရွာ၊ ၄ ရက်နေ့တွင် ဟိုခဲကျေး ရွာ၊ ၅ ရက်တွင် မြောက်ကုန်းကြီးကျေးရွာတို့အား ပြန်လည်သိမ်းပိုက်ရရှိခဲ့ပြီး ဩဂုတ်လ ၆ ရက်နေ့တွင် ဟိုခိုကျေးရွာအားလည်းကောင်း အဆင့်ဆင့်ပြန်လည်တိုက်ခိုက် သိမ်းပိုက်ထိန်းချုပ်နိုင်ခဲ့သည်။

ထို့အတူ ပြင်ဦးလွင်-ကျောက်မဲလေး-သံဘို-ဟိုခို စစ်ကြောင်းသည် ၂၀၂၅ ခုနှစ်၊ ဇူလိုင် ၁ ရက်တွင် အကြမ်းဖက်သောင်းကျန်းသူများ ခေတ္တစိုးမိုးထားသည့် သစ်တပင်ကုန်း၊ ဇူလိုင် ၃၁ ရက်တွင် ရပ်တော်မူကုန်း၊ ဩဂုတ် ၄ ရက်တွင် သံဘိုကျေးရွာ၊ ဇီးဖြူရေကျေးရွာနှင့် အင်းမကျေးရွာတို့အား အဆင့်ဆင့်ပြန်လည်သိမ်းပိုက်နိုင်ခဲ့သည်။

ထို့နောက် တပ်မတော်စစ်ကြောင်းများအနေဖြင့် စစ်ကြောင်း ၂ ကြောင်းပေါင်း၍ ဟိုခိုကျေးရွာမှ ဟန်ချက်ညီညီဖြင့် အကြမ်းဖက်သောင်းကျန်းသူများအား ဆက်လက်ချီတက်တိုက်ခိုက်ခဲ့ရာ ဩဂုတ် ၇ ရက် နေ့တွင် ချောင်းသာကျေးရွာ၊ ၁၁ ရက်နေ့တွင် မယ်ဟင်းကျေးရွာ၊ ၁၄ ရက်တွင် ကုန်းစံကျေးရွာနှင့် ကုန်းစ (အကျဉ်းထောင်)၊ ၂၀ ရက်နေ့တွင် ဒိုးပင်ကျေးရွာ၊ ၂၃ ရက်နေ့တွင် လုံခန်းကျေးရွာ၊ ၂၄ ရက်တွင် နားခါးကျေးရွာ၊ ၂၆ ရက်တွင် ရတနာသိင်္ဂီမိုင်းတွင်း အနီးရှိရန်သူ့စခန်းကုန်းနေရာများ၊ ၃၀ ရက်နေ့တွင် ရတနာသိင်္ဂီသတ္ထုမိုင်းတွင်းနှင့် ဒေသတစ်ဝိုက်အားလည်းကောင်း အဆင့်ဆင့်သိမ်းပိုက်ရရှိခဲ့ပြီး နယ်မြေဆက်လက်ရှင်းလင်းသွားမည်ဖြစ်ကြောင်း သိရှိရသည်။

ထိုသို့ ပြန်လည်တိုက်ခိုက်သိမ်းပိုက်ခဲ့ရာ စစ်ဆင်ရေးကာလ(၁)လကျော် ကာလအတွင်း အကြမ်းဖက်သောင်းကျန်းသူများနှင့် တိုက်ပွဲကြီး/ငယ် (၄၈)ကြိမ်ဖြစ်ပွားခဲ့ကာ ရန်သူ့အလောင်း(၂၄)လောင်းနှင့် လက်နက်မျိုးစုံ(၂၃)လက်နှင့် ဆက်စပ်ပစ္စည်းအမြောက်အများ သိမ်းဆည်းရမိခဲ့ပြီး တပ်မတော်စစ်ကြောင်းများအနေဖြင့် ထိခိုက်ကျဆုံးမှုအနည်းဆုံးဖြင့် ပြန်လည်သိမ်းပိုက်ထိန်းချုပ်နိုင်ခဲ့သည်။

ထို့အတူ နောင်ချို-ကျောက်မဲလမ်းပိုင်းရှိ နယ်မြေရှင်းလင်းရေးလုပ်ငန်းများ ဆောင်ရွက်နေသော တပ်မတော်စစ်ကြောင်းများအနေဖြင့် အဆိုပါဒေသအတွင်း နယ်မြေစိုးမိုးရေးနှင့် နယ်မြေလုံခြုံရေးလုပ်ငန်းများ ဆက်လက်ဆောင်ရွက်လျက်ရှိကြောင်း သိရှိရသည်။

အကြမ်းဖက်သမားများအနေဖြင့် အဆိုပါဒေသများအား ခေတ္တစိုးမိုးထားသည့် ကာလအတွင်း အများပြည်သူသွားလာလျက်ရှိသည့် လမ်း၊ တံတားများအား မိုင်းထောင်ဖောက်ခွဲဖျက်ဆီးခြင်း၊ မိုင်းထောင်ခြင်း၊ သစ်ပင်သစ်ကိုင်းများဖြင့် လမ်းပိတ်ဆို့ခြင်းများ၊ ကျေးရွာများအတွင်း အကြမ်းဖက်လုပ်ငန်းများဆောင်ရွက်ခဲ့ခြင်းများကြောင့် တပ်မတော်စစ်ကြောင်းများက လမ်းကြောင်းတစ်လျှောက်ရှိ အတားအဆီးနေရာများနှင့် ပျက်စီးခဲ့သည့် လမ်းတံတားများအား လူအင်အားနှင့် စက်ယန္တရားများအသုံးပြု၍ အများပြည်သူပြန်လည်အသုံးပြုသွားလာနိုင်ရေးနှင့် ပို့ဆောင်ဆက်သွယ်ရေး အဆင်ပြေချောမွေ့စေရေးအတွက် အတားအဆီးများအားဖယ်ရှားရှင်းလင်းခြင်း၊ မိုင်းအန္တရာယ်ကင်းရှင်းစေရေးအတွက် မိုင်းရှင်းလင်းရေးလုပ်ငန်းများ ဆောင်ရွက်ခြင်းတို့ကို နေ့ညမပျက် ဆောင်ရွက်လျက်ရှိသည်။

ထို့အပြင် တပ်မတော်စစ်ကြောင်းများအနေဖြင့် အဆိုပါဒေသများရှိ ယာယီနေရပ်စွန့်ခွာပြည်သူများ မိမိရပ်ရွာအိုးအိမ်များတွင် အေးချမ်းစွာပြန်လည်အခြေချနေထိုင်နိုင်ရေး၊ အစိုးရအုပ်ချုပ်မှုယန္တရား ပြန်လည်လည်ပတ်နိုင်ရေး၊ အကြမ်းဖက်လက်နက်ကိုင်သောင်းကျန်းသူများက ပြည်သူလူထုအပေါ် အကြမ်းဖက်မှုများမရှိစေရေး၊ လက်နက်အားကိုးဖြင့် ပြည်သူကိုအနိုင်ကျင့်ခြင်းများ၊ ဒေသဖွံ့ဖြိုးရေးကို ပျက်စီးစေသည့် အကြမ်းဖက်လုပ်ရပ်များမရှိစေရေးတို့အတွက် လိုအပ်သည့်နယ်မြေလုံခြုံရေးနှင့် နယ်မြေရှင်းလင်းရေးလုပ်ငန်းများကို အစဉ်တစ်စိုက် ဆက်လက်ဆောင်ရွက်လျက်ရှိကြောင်း သတင်းရရှိသည်။