ဒုတိယဝန်ကြီး ဒေါက်တာသောင်းနိုင်ဦး မကွေးတိုင်းဒေသကြီးအတွင်းရှိ သစ်တောစိုက်ခင်းများ၊ ပျိုးဥယျာဉ်များ ကြည့်ရှုစစ်ဆေး

ဒုတိယဝန်ကြီး ဒေါက်တာသောင်းနိုင်ဦး မကွေးတိုင်းဒေသကြီးအတွင်းရှိ သစ်တောစိုက်ခင်းများ၊ ပျိုးဥယျာဉ်များ ကြည့်ရှုစစ်ဆေး

နေပြည်တော် မေ ၂၄

သယံဇာတနှင့်သဘာဝပတ်ဝန်းကျင်ထိန်းသိမ်းရေးဝန်ကြီးဌာန ဒုတိယဝန်ကြီး ဒေါက်တာ သောင်းနိုင်ဦးသည် ယမန်နေ့က မင်းဘူးမြို့နယ် ကန်ရေပျိုးဥယျာဉ်နှင့် ရွှေတပင်အမြဲတမ်းပျိုးဥယျာဉ်တို့တွင် ပျိုးပင်များ ရှင်သန်အောင်မြင်မှုနှင့် မိုးရာသီသစ်ပင်စိုက်ပျိုးပွဲများအတွက် မြေနေရာပြင်ဆင်ထားရှိမှုတို့ကို ကြည့်ရှုစစ်ဆေးသည်။

ထို့နောက် မင်းဘူးမြို့နယ် ရွာသာယာကျေးရွာရှိ ဒေသခံပြည်သူများအား သဘာဝပတ်ဝန်းကျင်ထိန်းသိမ်းရေးလုပ်ငန်းများတွင် ပူးပေါင်းပါဝင်ရေးနှင့် သစ်တောသစ်ပင်များ၏ အကျိုးကျေးဇူးများကို ဟောပြောဆွေးနွေးပြီး ဒေသခံပြည်သူများအတွက် စွမ်းအားမြှင့် အေဝမ်းမီးဖိုများ၊ ရွာသာယာအထက်တန်းကျောင်း စာကြည့်တိုက်အတွက် သဘာဝပတ်ဝန်းကျင်ထိန်းသိမ်းရေးဆိုင်ရာ စာအုပ်များနှင့် လစဉ်ထုတ် သစ်တောကြေးမုံစာစောင်များ ပေးအပ်လှူဒါန်းသည်။

ယင်းနောက် သစ်တောဦးစီးဌာနက ဆောင်ရွက်လျက်ရှိသည့် မကွေးမြို့နယ် ဒေါင်းနေ (တိုးချဲ့) ကြိုးပြင်ကာကွယ်တောအတွင်းရှိ (၁/၂၀၂၆) အထူးစိမ်းကွက်လပ်ဖြည့်စိုက်ခင်း၊ မကွေး-ရေနံချောင်းကားလမ်းမိုင်တိုင်အမှတ် (၃၄၀/၂) အနီးလမ်းဘေးဝဲ/ယာတွင် တည်ထောင်စိုက်ပျိုးထားသည့် အပင် ၄၀၀ စိုက်ခင်းကိုလည်းကောင်း၊ အပူပိုင်းဒေသစိမ်းလန်းစိုပြည်ရေးဦးစီးဌာနနှင့် သစ်တော ဦးစီးဌာနတို့မှ (၂၀၂၄/၂၀၂၅) မိုးရာသီတွင် စိုက်ပျိုးခဲ့သော လမ်းဘေး ဝဲ/ယာ စိမ်းလန်းစိုပြည်ရေး စိုက်ခင်းများ ရှင်သန်အောင်မြင်မှုကိုလည်းကောင်း ကြည့်ရှုစစ်ဆေးခဲ့ကြောင်း သိရသည်။

သတင်းစဉ်