ပြည်ထောင်စုဝန်ကြီး ဦးလှမိုး ငလျင်ဒဏ်သင့် အဆောက်အဦးများ ကြည့်ရှုစစ်ဆေးပြီး ဝန်ထမ်းများ ပြန်လည်နေထိုင်နိုင်ရေး ကွင်းဆင်းဆောင်ရွက်

ပြည်ထောင်စုဝန်ကြီး ဦးလှမိုး ငလျင်ဒဏ်သင့် အဆောက်အဦးများ ကြည့်ရှုစစ်ဆေးပြီး ဝန်ထမ်းများ ပြန်လည်နေထိုင်နိုင်ရေး ကွင်းဆင်းဆောင်ရွက်

နေပြည်တော် ဧပြီ ၁၉

သမဝါယမနှင့် ကျေးလက်ဖွံ့ဖြိုးရေးဝန်ကြီးဌာန၊ ပြည်ထောင်စုဝန်ကြီး ဦးလှမိုးသည် တာဝန် ရှိသူများလိုက်ပါလျက် ယနေ့နံနက်ပိုင်းက သမဝါယမနှင့် ကျေးလက်ဖွံ့ဖြိုးရေးဝန်ကြီးဌာနပိုင် မြေနေရာ၌ သမဝါယမဦးစီးဌာနမှ ငလျင်ဒဏ်သင့် ဝန်ထမ်း (၈၀) ဦးနှင့် မိသားစုများ၊ အသေးစား စက်မှုလက်မှုလုပ်ငန်းဦးစီးဌာနမှ ဝန်ထမ်း (၆၀) ဦးနှင့်မိသားစုများ ယာယီနေထိုင်နိုင်ရန် (၂) ခန်းတွဲ အိမ်ရာများ တည်ဆောက်နေမှုကို ကြည့်ရှုစစ်ဆေးပြီး တာဝန်ရှိသူများအား မေလပထမပတ်အတွင်း ပြီးစီးအောင် တည်ဆောက်ကြရန်၊ ရေ၊ မီး ရရှိရေးနှင့် မိလ္လာစနစ် ကောင်းမွန်စေရန် မှာကြားသည်။

ဆက်လက်ပြီး ပြည်ထောင်စုဝန်ကြီးသည် ဝန်ကြီးဌာနရုံးအဆောက်အဦး ပြန်လည်ပြုပြင် နေမှုများကိုလည်းကောင်း၊ ရုံးအဝင်လမ်း ပြုပြင်ပြီးစီးမှုကိုလည်းကောင်း၊ ရုံးဝန်းကျင်ရှိ ဆည်တမံ ပြန်လည်ပြုပြင်နေမှုကိုလည်းကောင်း၊ ဝန်ထမ်းစားရိပ်သာ တည်ဆောက်နေမှုကိုလည်းကောင်း ကြည့်ရှုစစ်ဆေးကာ တာဝန်ရှိသူများအား သောက်သုံးရေရရှိရေး အမြန်ဆောင်ရွက်ရန် မှာကြားပြီး လိုအပ်သည်များ ပေါင်းစပ်ဖြည့်ဆည်း ဆောင်ရွက်ပေးခဲ့သည်။

ထိုမှတဆင့် ပြည်ထောင်စုဝန်ကြီးသည် ဇဗ္ဗူသီရိမြို့နယ်အတွင်းရှိ အပြာရောင်အဆင့် သတ်မှတ်ထားပြီး လူနေထိုင်ရန် သင့်တော်သော အဆောင်များဖြစ်သည့် ကံ့ကော်ဝန်ထမ်းအိမ်ရာ တိုက်အမှတ် (၂၆၀)၊  သဇင် (၁) အဆောင် (၆) အပျိုဆောင်၊ သဇင် (၅) အဆောင် (၁၁) နှင့် အဆောင် (၁၂) လူပျိုဆောင်၊ သဇင် (၄) အဆောင် (၈) (၉) အပျိုဆောင်များ၊ တိုက်အမှတ် (၁၁၁၅)၊ တိုက်အမှတ် (၆၂၀၄) နှင့် တိုက်အမှတ် (၆၁၀၅) အရာထမ်းအိမ်ရာများသို့ သွားရောက်၍ အဆောက်အဦးများ၏ ထိခိုက်မှုအခြေအနေ၊ ဝန်ထမ်းများနေထိုင်ရန် အဆင်ပြေစိတ်ချရမှု ရှိ/မရှိ ကြည့်ရှုစစ်ဆေးပြီး တာဝန်ရှိသူများအား ပြည်ထောင်စုဝန်ကြီးက ရုံးဖွင့်ဖွင့်ချင်း ဝန်ထမ်းများ နေထိုင်နိုင်ရေး စီစဉ်ဆောင်ရွက်ပေးရန်၊ ရေ၊ မီး ကိစ္စများ အဆင်ပြေစေရေးနှင့် အသေးစားပျက်စီး မှုများကို အမြန်ပြုပြင်ဆောင်ရွက်ပေးကြရန် လမ်းညွှန်မှာကြားခဲ့ကြောင်း သိရသည်။