ဘားအံမြို့၌ မြန်မာ့ရိုးရာလက်ဝှေ့အခြေခံသင်တန်းနှင့် ဘာသာရပ်ဆိုင်ရာအရည်အသွေးမြှင့် မွမ်းမံသင်တန်း ဖွင့်လှစ်

ဘားအံမြို့၌ မြန်မာ့ရိုးရာလက်ဝှေ့အခြေခံသင်တန်းနှင့် ဘာသာရပ်ဆိုင်ရာအရည်အသွေးမြှင့် မွမ်းမံသင်တန်း ဖွင့်လှစ်

ဘားအံ မေ ၁၈

နိုင်ငံ့ဂုဏ်ဆောင်မျိုးဆက်သစ် မြန်မာ့ရိုးရာလက်ဝှေ့အားကစားသမားကောင်းများ ပေါ်ထွန်းလာစေရေး ကရင်ပြည်နယ်အစိုးရအဖွဲ့က ကြီးမှူးဖွင့်လှစ်သည့် မြန်မာ့ရိုးရာလက်ဝှေ့ အခြေခံသင်တန်းအမှတ်စဉ် (၁/၂၀၂၆) သင်တန်းဖွင့်ပွဲကို ယနေ့နံနက်ပိုင်းတွင် ဘားအံမြို့ လှာကမြင်ကွက်သစ်ရှိ ဇွဲကပင်မိုးလုံလေလုံအားကစားရုံ၌ ကျင်းပရာ ကရင်ပြည်နယ်ဝန်ကြီးချုပ် ဦးစောမြင့်ဦး တက်ရောက်သည်။

သင်တန်းဖွင့်ပွဲတွင် ပြည်နယ်ဝန်ကြီးချုပ်က အမှာစကားပြောကြားပြီး သင်တန်းအတွက် ငွေကျပ် ၃၆၉ သိန်းကို သင်တန်းနည်းပြများထံ ပေးအပ်ချီးမြှင့်သည်။

အဆိုပါသင်တန်းသို့ လက်ဝှေ့ကလပ် (၂၀) မှ အသက် ၁၅ နှစ်မှ ၂၅ နှစ်အကြား သင်တန်းသား ၈၆ ဦး၊ သင်တန်းသူ ၁၄ ဦး စုစုပေါင်း ၁၀၀ တက်ရောက်ပြီး မြန်မာ့ရိုးရာလက်ဝှေ့ချန်ပီယံ ဝမ်ချိုင်း၊ စောငမန်း တို့ပါဝင်သော သင်တန်းနည်းပြ ၁၃ ဦးက မေ ၁၈ ရက်မှ ဇွန် ၁ ရက်အထိ ၁၄ ရက်ကြာ သင်ကြားပို့ချပေးမည်ဖြစ်သည်။

ထို့နောက် ဘားအံတက္ကသိုလ် ဘွဲ့နှင်းသဘင်ခန်းမ၌ ကျင်းပသည့် ဘားအံတက္ကသိုလ် ဆရာ ဆရာမများ ဘာသာရပ်ဆိုင်ရာ အရည်အသွေးမြှင့်မွမ်းမံသင်တန်းဖွင့်ပွဲသို့ တက်ရောက်အမှာစကား ပြောကြားပြီး ပါမောက္ခချုပ်က သင်တန်းဖွင့်လှစ်ရခြင်းနှင့်စပ်လျဉ်း၍ ရှင်းလင်းတင်ပြကာ ဘားအံတက္ကသိုလ် ဆရာ ဆရာမများက တေးသီချင်းများဖြင့် သီဆိုကပြဖျော်ဖြေကြရာ ဂုဏ်ပြုဆုများ ပေးအပ်ချီးမြှင့်ကြသည်။

စောမျိုးမင်းသိန်း(ပြန်/ဆက်)