အကျဉ်းထောင်/စခန်းအသီးသီး၌ ပြင်ပကျန်းမာရေးအဖွဲ့များမှ ကျန်းမာရေးဆိုင်ရာအသိပညာပေး ဟောပြောခြင်းနှင့် ကျန်းမာရေးစောင့်ရှောက်ပေးမှုများ ပြုလုပ်

အကျဉ်းထောင်/စခန်းအသီးသီး၌ ပြင်ပကျန်းမာရေးအဖွဲ့များမှ ကျန်းမာရေးဆိုင်ရာအသိပညာပေး ဟောပြောခြင်းနှင့် ကျန်းမာရေးစောင့်ရှောက်ပေးမှုများ ပြုလုပ်

     အကျဉ်းဦးစီးဌာနကွပ်ကဲမှုအောက်ရှိ အကျဉ်းထောင်/စခန်းအသီးသီး၌ ကျန်းမာရေးဦးစီးဌာန၊ သက်ဆိုင်ရာ ခရိုင်၊ မြို့နယ်များရှိ ကျန်းမာရေးအဖွဲ့များနှင့်ပူးပေါင်း ၍ လစဉ်ကျန်းမာရေးစောင့်ရှောက်ပေးမှု လုပ်ငန်းများ ဆောင်ရွက်ပေးလျက်ရှိရာ ၂၀၂၆ ခုနှစ်၊ ဇန်နဝါရီ ၂၂ ရက်တွင် တနင်္သာရီတိုင်းဒေသကြီး၊ ထားဝယ်ပြည်သူ့ဆေး ရုံကြီးမှ ဒေါက်တာ ဇင်လင်းထိုက်သည် ထားဝယ်အကျဉ်းထောင်မှ အကျဉ်းသား ၄၃ ဦးအား လည်းကောင်း၊ ဇန်နဝါရီ ၂၆ ရက်တွင် ထားဝယ်ပြည်သူ့ဆေးရုံကြီးမှ ဒေါက်တာ ဖြိုးဝေလင်းသည် ထားဝယ်အကျဉ်းထောင်မှ အကျဉ်းသား/အကျဉ်းသူ ၃၇ ဦးအား လည်းကောင်း၊ ဇန်နဝါရီ ၂၇ ရက်တွင် ကော့သောင်းပြည်သူ့ဆေးရုံကြီးမှ ဒေါက်တာ စစ်နိုင်အောင်သည် ကော့သောင်းအကျဉ်းထောင်မှ အကျဉ်းသား/ အကျဉ်းသူ ၂၀ ဦးအား လည်းကောင်း။

     အလားတူ ဇန်နဝါရီ ၂၃ ရက်တွင် ရန်ကုန်တိုင်းဒေသကြီး၊ အင်းစိန်ပြည်သူ့ဆေးရုံကြီးမှ နား၊ နှာခေါင်း၊ လည်ချောင်း၊ ဦးခေါင်းနှင့် လည်ပင်းခွဲစိတ်အထူးကုဆရာဝန်ကြီး ဒေါက်တာ သက်တင် ဦးဆောင်သော အဖွဲ့ဝင် ၂ ဦးတို့သည် အင်းစိန်ဗဟိုအကျဉ်းထောင်မှ အကျဉ်းသား/အကျဉ်းသူ ၁၄၆ ဦး၊ အချုပ်သား/အချုပ်သူ ၁၃ ဦး၊ စုစု ပေါင်း ၁၅၉ ဦးတို့အား လည်းကောင်း။

     အလားတူ ဇန်နဝါရီ ၂၃ ရက်တွင် ဧရာဝတီတိုင်းဒေသကြီး၊ ဟင်္သာတခရိုင်ပြည်သူ့ဆေးရုံကြီးမှ ခရိုင်ပြည်သူ့ကျန်းမာရေးဦးစီးဌာနမှူး ဒေါက်တာ နေခြည်ထက်ထက်လင်းအောင် ဦးဆောင်သော အဖွဲ့ဝင် ၁၀ ဦးတို့သည် ဟင်္သာတအကျဉ်းထောင်မှ အကျဉ်းသား/အကျဉ်းသူ ၈၇ ဦး၊ အချုပ်သား/ အချုပ်သူ ၂ ဦး၊ စုစုပေါင်း ၈၉ ဦးအား လည်းကောင်း ကျန်းမာရေးဆိုင်ရာအသိပညာပေးဟောပြောခြင်းနှင့် ကျန်းမာရေးစောင့်ရှောက်မှုများ ပြုလုပ်ပေးခဲ့ကြောင်း သတင်းရရှိပါသည်။