အမေရိကန်ပြည်ထောင်စုတွင် ယှဉ်ပြိုင်ထိုးသတ်သည့် ယူအက်ဖ်စီ ဖလိုင်းဝိတ်တန်း ချန်ပီယံခါးပတ်လုပွဲတွင် မြန်မာနိုင်ငံကိုယ်စားပြု ချင်းလူငယ် ဂျိုရှုအာဗန်က ပြိုင်ဘက် ဂျပန်ကစားသမားကို အနိုင်ရရှိ

အမေရိကန်ပြည်ထောင်စုတွင် ယှဉ်ပြိုင်ထိုးသတ်သည့် ယူအက်ဖ်စီ ဖလိုင်းဝိတ်တန်း ချန်ပီယံခါးပတ်လုပွဲတွင် မြန်မာနိုင်ငံကိုယ်စားပြု ချင်းလူငယ် ဂျိုရှုအာဗန်က ပြိုင်ဘက် ဂျပန်ကစားသမားကို အနိုင်ရရှိ

နေပြည်တော် မေ ၁၀

အမေရိကန်ပြည်ထောင်စု၌ ကျင်းပပြုလုပ်သည့် ယူအက်ဖ်စီ ဖလိုင်းဝိတ်တန်း ချန်ပီယံခါးပတ်လုပွဲတွင် မြန်မာနိုင်ငံကိုယ်စားပြု ချင်းလူငယ်ဖိုက်တာ ဂျိုရှုအာဗန်သည် ပြိုင်ဘက်ဂျပန်ကစားသမား တက်ဆူရိုတိုင်ရာကို ပဉ္စမအချီတွင် အလဲထိုးအနိုင်ယူပြီး ချန်ပီယံခါးပတ်ကို ကာကွယ်နိုင်ခဲ့ကြောင်း သိရသည်။

ယနေ့ပွဲတွင် ဂျိုရှူအာဗန်အနေဖြင့် ပြိုင်ဘက်ဖြစ်သူ တက်ဆူရိုတိုင်ရာ၏ချုပ်ကွက်များကို ရုန်းထွက်နိုင်ခဲ့ပြီး ၎င်း၏အားပြင်းတိကျသော လက်သီးချက်များဖြင့် ပြိုင်ဘက်အား ဖိအားပေးထိုးသတ်ကာ ထိုက်ထိုက်တန်တန် အနိုင်ရရှိခဲ့ခြင်းဖြစ်ပြီး အသက် (၂၄) နှစ်အရွယ် ဂျိုရှူအာဗန်သည် ပဉ္စမအချီပြီးဆုံးရန် ၁ မိနစ် ၃၂ စက္ကန့်အလိုတွင် ပြိုင်ဘက်အား အလဲထိုးအနိုင်ယူခဲ့ကာ ချန်ပီယံခါးပတ်ကို ပထမဆုံးအကြိမ် ကာကွယ်နိုင်ခဲ့ခြင်းဖြစ်သည်။

ယူအက်ဖ်စီတွင် ဒုတိယအသက်အငယ်ဆုံး ချန်ပီယံ ဂျိုရှူအာဗန်အနေဖြင့် လက်ရှိတွင် ယှဉ်ပြိုင်နိုင်ခဲ့မှုအားဖြင့် (၁၁) ပွဲထိုးသတ်ထားပြီး (၁၀) ပွဲနိုင်၊ (၁) ပွဲရှုံးမှတ်တမ်းကို ပိုင်ဆိုင်ထားသူလည်းဖြစ်ကြောင်း သတင်းရှိရသည်။