အာရှဖလား ယူ-၁၇ ပြိုင်ပွဲ အုပ်စုနောက်ဆုံးပွဲယှဉ်ပြိုင် မြန်မာအသင်းနှင့် ထိုင်းအသင်းတို့ နှစ်ဂိုးစီသရေကျ

အာရှဖလား ယူ-၁၇ ပြိုင်ပွဲ အုပ်စုနောက်ဆုံးပွဲယှဉ်ပြိုင် မြန်မာအသင်းနှင့် ထိုင်းအသင်းတို့ နှစ်ဂိုးစီသရေကျ

ရန်ကုန် မေ ၁၃

၂၀၂၆ အာရှဖလား ယူ-၁၇ ပြိုင်ပွဲ အုပ်စု (A) နောက်ဆုံးနေ့ကို မေ ၁၂ ရက် ညပိုင်းက ဆော်ဒီအာရေဗျနိုင်ငံ၌ ကျင်းပရာ မြန်မာနှင့် ထိုင်းအသင်း နှစ်ဂိုးစီသရေကျခဲ့သည်။

မြန်မာအသင်းရော ထိုင်းအသင်းပါ အုပ်စုဒုတိယပွဲပြီးကတည်းက နောက်တစ်ဆင့်တက်ရောက်ခွင့်ဆုံးရှုံးပြီးဖြစ်သော်လည်း ဂုဏ်သိက္ခာပိုင်းအတွက် နိုင်ပွဲရရှိရန်ကြိုးပမ်းခဲ့သည်။ မြန်မာအသင်းအနေဖြင့် အနိုင်သုံးမှတ်ရရှိသင့်သည့်ပွဲဖြစ်သော်လည်း နှစ်ဂိုးပြတ်ဦးဆောင်ပြီး ထိုင်းအသင်းက ချေပဂိုးနှစ်ဂိုးပြန်သွင်းကာ သရေကျခဲ့ခြင်းဖြစ်သည်။

မြန်မာအသင်းသည် ပွဲထွက်လူစာရင်းကို အပြောင်းအလဲအချို့ ပြုလုပ်ခဲ့သော်လည်း အတောင့်တင်းဆုံးလူစာရင်းဖြင့် ပွဲထွက်လာသည်။

ပွဲစကတည်းက နှစ်သင်းစလုံး အပြန်အလှန်တိုက်စစ်ဆင်ကစားနိုင်ခဲ့ပြီး တိုက်စစ်မှူး စိုင်းမြတ်မင်းက ၁၉ ၊ ၂၂ မိနစ်တွင် နှစ်ဂိုးဆက်သွင်းယူကာ မြန်မာအသင်း နှစ်ဂိုးပြတ်ဦးဆောင်နိုင်ခဲ့သည်။ သို့သော် မိနစ် ၃၀ တွင် ဆူသီဖာပရာက ထိုင်းအသင်းအတွက် ပထမချေပဂိုးပြန်သွင်းခဲ့သဖြင့် ပထမပိုင်းအပြီးတွင် မြန်မာအသင်းက နှစ်ဂိုး - တစ်ဂိုးဖြင့် ဦးဆောင်နေသည်။ ဒုတိယပိုင်းတွင် ထိုင်းအသင်းက ချေပဂိုးရရန်အားပိုထည့်လာပြီး ၇၅ မိနစ်တွင် ဂါဘရတ်က ဒုတိယဂိုးသွင်းယူခဲ့သဖြင့် နှစ်ဂိုးစီသရေကျခဲ့ခြင်းဖြစ်သည်။

အုပ်စု (A) အခြားပွဲတွင် အိမ်ရှင်ဆော်ဒီအာရေဗျအသင်းနှင့် တာဂျစ်ကစ္စတန်အသင်း ငါးဂိုးစီသရေကျခဲ့သည်။ အုပ်စု (A) ပွဲစဉ်များ အပြီးတွင် ဆော်ဒီအာရေဗျအသင်းနှင့် တာဂျစ်ကစ္စတန်အသင်းက ခုနစ်မှတ်စီဖြင့် ကွာတားဖိုင်နယ်တက်ရောက်ပြီး ထိုင်းအသင်းနှင့် မြန်မာအသင်းက တစ်မှတ်စီရရှိကာ အုပ်စုမှထွက်ခဲ့ရသည်။

ညီညီစိုးညွန့်၊ ဓာတ်ပုံ-MFF