EV သုတေသနဖွံ့ဖြိုးရေးနှင့် နည်းပညာပြန့်ပွားရေးလုပ်ငန်းကော်မတီ ညှိနှိုင်းအစည်းအဝေး (၁/၂၀၂၆) ကျင်းပ

EV သုတေသနဖွံ့ဖြိုးရေးနှင့် နည်းပညာပြန့်ပွားရေးလုပ်ငန်းကော်မတီ ညှိနှိုင်းအစည်းအဝေး (၁/၂၀၂၆) ကျင်းပ

နေပြည်တော် ဇန်နဝါရီ ၂၆

အမျိုးသားအဆင့် လျှပ်စစ်သုံးယာဉ်နှင့် ဆက်စပ်လုပ်ငန်းများ ဖွံ့ဖြိုးတိုးတက်ရေး ဦးဆောင်ကော်မတီ၏ ညွှန်ကြားချက်များအတိုင်း  သိပ္ပံနှင့်နည်းပညာဝန်ကြီးဌာနသည် နိုင်ငံတော်တွင် လျှပ်စစ်သုံးယာဥ်(Electric Vehicle ၊EV)ကဏ္ဍဖွံ့ဖြိုးရေးအတွက် ကြိုးပမ်းဆောင်ရွက်လျက်ရှိရာ လျှပ်စစ်သုံးယာဉ်နှင့် ဆက်စပ်ပစ္စည်းများ သုတေသန ဖွံ့ဖြိုးရေးနှင့် နည်းပညာပြန့်ပွားရေးလုပ်ငန်းကော်မတီဥက္ကဋ္ဌဖြစ်သူ သိပ္ပံနှင့် နည်းပညာဝန်ကြီးဌာန ဒုတိယဝန်ကြီး ဒေါက်တာ အောင်ဇေယျသည် ယနေ့ နေ့လယ်ပိုင်း၌ Hybrid စနစ်ဖြင့် ကျင်းပသည့် လုပ်ငန်းကော်မတီ(၁/၂၀၂၆) အစည်းအဝေးသို့ တက်ရောက်သည်။

ဒုတိယဝန်ကြီးက အဖွင့်အမှာစကားပြောကြားရာတွင်-နိုင်ငံတော်တွင် “နိုင်ငံတော်သာယာဖို့ သဘာဝပတ်ဝန်းကျင် ထိန်းကြစို့” ဟူသော အမျိုးသားရေးဆောင်ပုဒ်နှင့်အညီ ဖန်လုံအိမ်ဓာတ်ငွေ့(မီးခိုးများ) ထုတ်လွှတ်သည့် ယာဥ်များသုံးစွဲမှုအစား EV သုံးစွဲမှုမှတစ်ဆင့် လေထုနှင့် အသံညစ်ညမ်းမှုများလျှော့ချနိုင်ကာ ကျန်းမာရေး ကောင်းမွန်မှု အပါအဝင် အခြားအကျိုးကျေးဇူးများကို  ပြည်သူတို့ ရရှိခံစားစေရေး၊ ကမ္ဘာနှင့် ရင်ပေါင် တန်းကာ Smart City များ ပေါ်ထွန်းလာစေရန်နှင့် Sustainable Society ကို တည်ထောင်နိုင်ရေးတို့အတွက် အမျိုးသားအဆင့် လျှပ်စစ်သုံးယာဉ်နှင့် ဆက်စပ်လုပ်ငန်းများ ဖွံ့ဖြိုးတိုးတက်ရေး ဦးဆောင်ကော်မတီက EV ကဏ္ဍ ဖွံ့ဖြိုးရေးအတွက် ၂၀၅၀ ပြည့်နှစ်အထိ လမ်းပြမြေပုံနှင့် မူဝါဒ ချမှတ်ကာ ဆက်စပ်ဌာနများက ညွှန်ကြားချက် များအတိုင်း တက်ညီလက်ညီဖြင့် ပူးပေါင်းဆောင်ရွက်လျက် ရှိပါကြောင်း။

သို့ဖြစ်ရာ  မိမိတို့လုပ်ငန်းကော်မတီ၏ လုပ်ငန်းတာဝန်များကို သတ်မှတ်ကာလများအတွင်း ကျေပွန်အောင် ဆက်လက်ဆောင်ရွက်သွားရန်၊ ဌာနဆိုင်ရာ တာဝန်ရှိသူများ၊ ပြင်ပ EV လုပ်ငန်းရှင်များနှင့် EV သုံးစွဲသည့် ပြည်သူလူထု၏ EV နည်းပညာလိုအပ်ချက်များကို အမှန်တကယ် ဖြည့်ဆည်းပေးနိုင်မည့် နည်းပညာဖြန့်ဝေရေး လုပ်ငန်းစဉ်များကို ချမှတ်ထားသည့် အစီအမံများအတိုင်း ထိရောက်ပီပြင်အောင် ကျယ်ကျယ်ပြန့်ပြန့် ဆောင်ရွက်သွားရန်၊ EV ဆိုင်ရာ မြန်မာစံချိန်စံညွှန်းများကို ထပ်မံ သတ်မှတ်ချမှတ်နိုင်ရေး ဆောင်ရွက်သွားရန်၊ ကမ္ဘာတစ်ဝန်း အပြိုင်အဆိုင်ဖြင့် မြန်ဆန်စွာ ဖွံ့ဖြိုးလျက်ရှိသော EV နည်းပညာအရွေ့များအတိုင်း အမီလိုက်ပါနိုင်ရေး သုတေသနများကို အရှိန်အဟုန်မြှင့်တင် ပူးပေါင်းဆောင်ရွက်သွားရန်၊ အိမ်စီး EV များအပြင် လယ်ယာစိုက်ပျိုးရေးသုံး EV များ၊ ဆိုလာသုံး EV အားသွင်း စနစ်များ၊ EV Metrology နှင့် EV ဘက်ထရီ သုတေသနများကို ပိုမို ထိရောက်ပီပြင်စွာ ဆောင်ရွက်ရန်၊ တဖန် သုတေသနရလဒ်များမှ ဉာဏပစ္စည်းမူပိုင်ခွင့်များ ရရှိသည်အထိ ကြိုးပမ်းဆောင်ရွက်သွားရန်နှင့် လက်တွေ့ကျသော သင်တန်းသစ်များကို ထပ်မံတိုးချဲ့ ပူးပေါင်းဖွင့် လှစ်သွားရန် တိုက်တွန်းမှာကြားပါသည်။

ထို့နောက် အစည်းအဝေးသို့ လူကိုယ်တိုင်နှင့် Onlin တို့မှတက်ရောက်လာကြသည့် ညွှန်ကြားရေးမှူးချုပ်များ နှင့် တာဝန်ရှိသူများ၊ ပြင်ပ EV အဖွဲ့အစည်းများမှ ဥက္ကဋ္ဌများနှင့် ကိုယ်စားလှယ်များက ယခင်လုပ်ငန်းကော်မတီ အစည်းအဝေးဆုံးဖြတ်ချက်များ အပေါ် ဆက်လက်ဆောင်ရွက်မည့် လုပ်ငန်းစဉ်များ၊ အခမ်းအနားများတွင် ခင်းကျင်းပြသမည့် EV သုတေသနများ၊ အဋ္ဌမအကြိမ် မူကြမ်းအထိ ပြင်ဆင်ဆွေးနွေးခဲ့ပြီးဖြစ်သည့် EV Battery Waste Management Policy ထုတ်ပြန်နိုင်ရေးနှင့် ယခုနှစ်အတွင်း လုပ်ငန်းတာဝန်များကို  ပိုမိုထိရောက်အောင် အရှိန်အဟုန်မြှင့်တင် ပူးပေါင်းဆောင်ရွက်နိုင်ရေးတို့အတွက် ရင်းနှီးပွင့်လင်းစွာ ဆွေးနွေးညှိနှိုင်းကြရာ ဒုတိယဝန်ကြီးက လိုအပ်သည့် အချက်များကို ဖြည့်စွက်ဆွေးနွေးကာ ဌာနများနှင့် အဖွဲ့အစည်းများအကြား ပေါင်းစပ်ညှိနှိုင်းပေး၍ နိဂုံးချုပ် အမှာစကားပြောကြားခဲ့ကြောင်း သိရသည်။