ကချင်ပြည်နယ်နှင့် ပဲခူးတိုင်းဒေသကြီးတို့ရှိ မြို့နယ်အချို့၌ လိုင်စင်မဲ့မော်တော်ယာဉ်များ ဖမ်းဆီးအရေးယူ

ကချင်ပြည်နယ်နှင့် ပဲခူးတိုင်းဒေသကြီးတို့ရှိ မြို့နယ်အချို့၌ လိုင်စင်မဲ့မော်တော်ယာဉ်များ ဖမ်းဆီးအရေးယူ

     ၂၀၂၅ ခုနှစ်၊ ဇွန် ၂၃ ရက်နှင့် ၂၄ ရက်က ကချင်ပြည်နယ်နှင့် ပဲခူးတိုင်းဒေသကြီးတို့ရှိ မြို့နယ်အချို့၌ လိုင်စင်မဲ့မော်တော်ယာဉ်များ ဖမ်းဆီးအရေးယူထားကြောင်း သိရသည်။

     ဖြစ်စဉ်မှာ ဇွန် ၂၃ ရက် ည ၁၁ နာရီ ၁၅ မိနစ်အချိန်တွင် ကချင်ပြည်နယ်၊ မြစ်ကြီးနားမြို့မရဲစခန်းမှ တပ်ဖွဲ့ဝင်များပါဝင်သော ပူးပေါင်းအဖွဲ့သည် ကချင်ပြည်နယ်၊ မြစ်ကြီးနားမြို့၊ အေးစေတီရပ်ကွက်၊ BOC လမ်းဆုံ၌ ယာဉ်စစ်ဆေးခြင်းများ ဆောင်ရွက်ခဲ့ရာ မန္တလေးတိုင်းဒေသကြီး၊ ကျောက်ပန်းတောင်းမြို့နယ်၊ သီရိမင်္ဂလာရပ်ကွက်နေ ဝင်းခိုင်(၄၅)နှစ် မောင်းနှင်လာသည့် YGN/ 1K-XXXX TOYOTA TENPERLITE မော်တော်ယာဉ်နှင့် မြစ်ကြီးနားမြို့၊ မြေမြင့်ရပ်ကွက်နေ လေဝိ(၄၅)နှစ် မောင်းနှင်လာသည့် YGN/7J-XXXX TOYOTA NOAH မော်တော်ယာဉ်တို့အားလည်းကောင်း။

     အလားတူ ဇွန် ၂၄ ရက် မွန်းလွဲ ၂ နာရီတွင် ကချင်ပြည်နယ်၊ မိုးကောင်းမြို့နယ်၊ နမ္မတီးနယ်မြေရဲစခန်းမှ တပ်ဖွဲ့ဝင်များပါဝင်သော ပူးပေါင်းအဖွဲ့က နမ္မတီးမြို့၊ မြို့ဦးရပ်ကွက် “ကျားပြောင်း” ဆီဆိုင်လမ်းဆုံအနီး၌ ယာဉ်စစ်ဆေးခြင်းများ ဆောင်ရွက်နေစဉ် မြစ်ကြီးနားမြို့၊ စီတာပူရပ်ကွက်နေ ပြည့်စုံငြိမ်း(၄၃)နှစ် မောင်းနှင်လာသည့် KCN-17/1S-XXXX HEAVY DUTY မော်တော်ယာဉ်အားလည်းကောင်း။ 

     ထို့အတူ ဇွန် ၂၄ ရက် နံနက် ၁၁ နာရီ ၂၀ မိနစ်တွင် ကချင်ပြည်နယ်၊ မိုးညှင်းမြို့နယ်၊ ဟိုပင်နယ်မြေရဲစခန်းမှ တပ်ဖွဲ့ဝင်များက မန္တလေး-မြစ်ကြီးနား ပြည်ထောင်စုလမ်းမကြီး ဟိုပင်တိုးဂိတ်အနီး၌ ယာဉ်စစ်ဆေးခြင်းများ ဆောင်ရွက်နေစဉ် မိုးညှင်းမြို့ဘက်မှ မိုးကောင်းမြို့ဘက်သို့ ကချင်ပြည်နယ်၊ ဖားကန့်မြို့နယ်၊ မရှီကထောင်ရပ်ကွက်နေ ဇော်မင်းထိုက်(၄၁)နှစ် မောင်းနှင်လာသည့် YGN/1L-XXXX TOYOTA CROWN မော်တော်ယာဉ်အားလည်းကောင်း။

     ထို့အတူ ဇွန် ၂၃ ရက် ညနေ ၅ နာရီ ၅၀ မိနစ်တွင် ပဲခူးတိုင်းဒေသကြီး၊ ဝေါမြို့နယ်၊ စစ်တောင်းတံတားသစ်(မုပ္ပလင်တံတား)၌ ဝေါမြို့နယ်ရဲတပ်ဖွဲ့မှူးရုံးမှ တပ်ဖွဲ့ဝင်များပါဝင်သော ပူးပေါင်းအဖွဲ့က ယာဉ်စစ်ဆေးခြင်းများ ဆောင်ရွက်နေစဉ် ကျိုက်ထိုမြို့ဘက်မှ ပဲခူးမြို့ဘက်သို့ ပဲခူးတိုင်းဒေသကြီး၊ ပဲခူးမြို့၊ ဥဿာမြို့သစ်(၄)ရပ်ကွက်နေ ကျော်လွင်ထွန်း(ခ)စောလှပွဲ(၄၀)နှစ် မောင်းနှင်လာသည့် YGN-22/RLG-XXXX NISSAN X-TRAIL မော်တော်ယာဉ်အားလည်းကောင်း ရပ်တန့်စစ်ဆေးခဲ့ရာ မော်တော်ယာဉ်များနှင့်ပတ်သက်သည့် အထောက်အထားတစ်စုံတစ်ရာ ပြသနိုင်ခြင်းမရှိဘဲ လိုင်စင်မဲ့မော်တော်ယာဉ်များဖြစ်ကြောင်း စစ်ဆေးတွေ့ရှိရသဖြင့် ဝင်းခိုင်၊ လေဝိ၊ ပြည့်စုံငြိမ်း၊ ဇော်မင်းထိုက်နှင့် ကျော်လွင်ထွန်း(ခ)စောလှပွဲတို့ ငါးဦးအား သက်ဆိုင်ရာရဲစခန်းအသီးသီး၌ ပို့ကုန်သွင်းကုန်ဥပဒေပုဒ်မ ၈ ဖြင့် အမှုဖွင့်အရေးယူထားကြောင်း သတင်းရရှိပါသည်။