ဒုတိယဝန်ကြီး ဦးဇော်အေးမောင် တိုင်းရင်းသားရေးရာနှင့် သက်မွေးပညာသင်တန်းစင်တာ(တောင်ငူ) စီမံကိန်းတည်ဆောက်မည့်မြေနေရာတွင် လုပ်ငန်းဆောင်ရွက်မှုကြည့်ရှုစစ်ဆေး

ဒုတိယဝန်ကြီး ဦးဇော်အေးမောင် တိုင်းရင်းသားရေးရာနှင့် သက်မွေးပညာသင်တန်းစင်တာ(တောင်ငူ) စီမံကိန်းတည်ဆောက်မည့်မြေနေရာတွင် လုပ်ငန်းဆောင်ရွက်မှုကြည့်ရှုစစ်ဆေး

တောင်ငူ ဇန်နဝါရီ ၂၃

တိုင်းရင်းသားလူမျိုးများရေးရာဝန်ကြီးဌာန ဒုတိယဝန်ကြီး ဦးဇော်အေးမောင်သည် ယနေ့နံနက်ပိုင်းတွင် ပဲခူးတိုင်းဒေသကြီး တိုင်းရင်းသားရေးရာဝန်ကြီး ဦးစောလင်းအောင်၊ တာဝန်ရှိသူများနှင့်အတူ နိုင်ငံတော်အကြီးအကဲ၏ လမ်းညွှန်ချက်နှင့်အညီ ဆောင်ရွက်မည့် တိုင်းရင်းသားရေးရာနှင့် သက်မွေးပညာသင်တန်း စင်တာ(တောင်ငူ) စီမံကိန်းတည်ဆောက်မည့်မြေနေရာ၌ စီမံကိန်းလုပ်ငန်း ဆောင်ရွက်မှုအခြေအနေများကို ကြည့်ရှုစစ်ဆေးသည်။

ဦးစွာ ဒုတိယဝန်ကြီးသည် တိုင်းရင်းသားရေးရာနှင့် သက်မွေးပညာသင်တန်းစင်တာ(တောင်ငူ) စီမံကိန်းမြေနေရာတွင် ဆောက်လုပ်မည့်အဆောက်အအုံ နေရာချထားမှုအခြေအနေ၊ မန္တလေးငလျင်ကြီး လှုပ်ခတ်ခဲ့ပြီးနောက် ပြင်ဆင်ထုတ်ပြန်ခဲ့သော Myanmar National Building Code(MNBC) 2025 Code Rule နှင့်အညီ အဆောက်အအုံများ ဆောက်လုပ်နိုင်ရန် Soil Test စမ်းသပ်ခြင်း လုပ်ငန်းဆောင်ရွက်နေမှု၊ မြေလွှာအခြေအနေများကို သိရှိနိုင်ရန် Geophysical Survey လုပ်ငန်းဆောင်ရွက်နေမှုများကို ကြည့်ရှုစစ်ဆေးရာ တိုင်းရင်းသားအခွင့်အရေးများ ကာကွယ်စောင့်ရှောက်ရေးဦးစီးဌာန ညွှန်ကြားရေးမှူးချုပ် ဦးမင်းအေးကိုနှင့် တာဝန်ရှိသူများ၊ Soil Test စမ်းသပ်ခြင်းလုပ်ငန်းများ တာဝန်ယူဆောင်ရွက်နေသော Myanmar Geotechnical Survey Group Co., Ltd. မှ တာဝန်ရှိသူများက စီမံကိန်းမြေနေရာနှင့် ပတ်သက်၍ ရှင်းလင်းတင်ပြပြီး ဒုတိယဝန်ကြီးက လိုအပ်သည်များ ပေါင်းစပ်ညှိနှိုင်းဆောင်ရွက်ပေးသည်။

ယင်းနောက် ဒုတိယဝန်ကြီးသည် တိုင်းရင်းသားလူမျိုးများရေးရာဝန်ကြီးဌာန ပဲခူးတိုင်းဒေသကြီး ညွှန်ကြားရေးမှူးရုံးမှ ဝန်ထမ်းများအားတွေ့ဆုံ၍ နိုင်ငံတော်အပေါ် သစ္စာစောင့်သိကြရန်၊ တိုင်းရင်းသားရေးရာကိစ္စရပ်များကို ရှေးရှုဆောင်ရွက်ကြရန်နှင့် စီမံကိန်းအား သတ်မှတ်စံချိန် စံညွှန်းများနှင့်အညီ အချိန်မီပြီးစီးနိုင်ရေး ဆောင်ရွက်ကြရန် တိုက်တွန်းမှာကြားခဲ့ကြောင်း သိရသည်။

သတင်းစဉ်