ပဲခူးတိုင်းဒေသကြီး၊ ပဲခူးမြို့နယ်၌ စက်သုံးဆီများ တရားမဝင်သယ်ဆောင်လာသူ အမျိုးသား သုံးဦးအား ဖမ်းဆီးအရေးယူထား

ပဲခူးတိုင်းဒေသကြီး၊ ပဲခူးမြို့နယ်၌ စက်သုံးဆီများ တရားမဝင်သယ်ဆောင်လာသူ အမျိုးသား သုံးဦးအား ဖမ်းဆီးအရေးယူထား

     ပဲခူးတိုင်းဒေသကြီး၊ ပဲခူးမြို့နယ်၌ ၂၀၂၅ ခုနှစ်၊ မတ် ၁၃ ရက်က စက်သုံးဆီများ တရားမဝင် သယ်ဆောင်လာသူ အမျိုးသား သုံးဦးအား ဖမ်းဆီးအရေးယူထားကြောင်း သိရသည်။

     ဖြစ်စဉ်မှာ ၂၀၂၅ ခုနှစ်၊ မတ် ၁၃ ရက် မွန်းလွဲ ၃ နာရီ ၃၀ မိနစ်တွင် ထန်းတောကြီးနယ်မြေရဲစခန်းမှ တပ်ဖွဲ့ဝင်များသည် ပဲခူးမြို့နယ်၊ ထန်းတောကြီးကျေးရွာလမ်းဆုံ၌ ယာဉ်စစ်ဆေးခြင်းများ ဆောင်ရွက်နေစဉ် ဘုရားကြီးမြို့မှ ဇောင်းတူကျေးရွာသို့ တိုက်ကြီးကျေးရွာနေသူများဖြစ်ကြသည့် ဇော်မင်း(၄၅)နှစ်မောင်းနှင်ပြီး နေလင်းစိုး(၃၂)နှစ်နှင့် ကျော်စိုး(ခ)ကျော်ကြီး(၄၅)နှစ် လိုက်ပါလာသည့် BGO-11 6B/XXXX NISSAN DIESEL UD မော်တော်ယာဉ်အား ရပ်တန့်စစ်ဆေးရာ ယာဉ်ပေါ်တွင် ပလတ်စတစ်ပုံးများဖြင့်ထည့်ထားသည့် ဓာတ်ဆီ ၂၆၀ ဂါလံ၊ တစ်ဂါလံလျှင် ၁၄,၀၀၀ ကျပ်နှုန်းဖြင့် စုစုပေါင်းတန်ဖိုး ငွေ ၃,၆၄၀,၀၀၀ ကျပ်အား စစ်ဆေးတွေ့ရှိရသဖြင့် မေးမြန်းရာ အဆိုပါစက်သုံးဆီများမှာ ကျော်စိုး(ခ)ကျော်ကြီး၏ ဓာတ်ဆီများဖြစ်ကြောင်း သိရှိရသဖြင့် ကျော်စိုး(ခ)ကျော်ကြီးပါ သုံးဦးအား ထန်းတောကြီးနယ်မြေရဲစခန်း (ပ)၁၂/၂၀၂၅၊ ရေနံနှင့်ရေနံထွက်ပစ္စည်းဆိုင်ရာဥပဒေ ပုဒ်မ ၃၇ ဖြင့် အမှုဖွင့်အရေးယူထားကြောင်း သတင်းရရှိသည်။