ပဲခူးတိုင်းဒေသကြီး၊ ပဲခူးမြို့နယ်၌ ယာဉ်တိုက်မှုဖြစ်ပွား၍ အမျိုးသား နှစ်ဦး သေဆုံးကာ အမျိုးသား တစ်ဦးနှင့် ကလေး တစ်ဦး ထိခိုက်ဒဏ်ရာရရှိ

ပဲခူးတိုင်းဒေသကြီး၊ ပဲခူးမြို့နယ်၌ ယာဉ်တိုက်မှုဖြစ်ပွား၍ အမျိုးသား နှစ်ဦး သေဆုံးကာ အမျိုးသား တစ်ဦးနှင့် ကလေး တစ်ဦး ထိခိုက်ဒဏ်ရာရရှိ

     ၂၀၂၆ ခုနှစ်၊ ဇန်နဝါရီ ၃၁ ရက်က ပဲခူးတိုင်းဒေသကြီး၊ ပဲခူးမြို့၌ ယာဉ်တိုက်မှုဖြစ်ပွား၍ အမျိုးသား နှစ်ဦး သေဆုံးကာ အမျိုးသား တစ်ဦးနှင့် ကလေး တစ်ဦး ထိခိုက်ဒဏ်ရာရရှိခဲ့ကြောင်း သိရသည်။

     ဖြစ်စဉ်မှာ ဇန်နဝါရီ ၃၁ ရက် နံနက် ၉ နာရီ ၄၅ မိနစ်တွင် ပဲခူးတိုင်းဒေသကြီး၊ ပဲခူးမြို့၊ ရန်ကုန်-မန္တလေးလမ်းဟောင်း၊ ပြင်စည်မီးပွိုင့်၌ ယာဉ်တိုက်မှုဖြစ်ပွားကြောင်း သတင်းအရ အမှတ်(၁၁) ယာဉ်ထိန်းရဲတပ်ဖွဲ့စုမှ တပ်ဖွဲ့ဝင်များပါဝင်သော ပူးပေါင်းအဖွဲ့က သွားရောက်စစ်ဆေးခဲ့ရာ ပဲခူး တက္ကသိုလ်ဘက်မှ ပဲခူးမြို့တွင်းဘက်သို့ ရွှေလှေကျေးရွာနေ ဇော်ထက်(၃၅)နှစ် မောင်းနှင်လာသည့် BGO-11/9B-XXXX FUSO ခြောက်ဘီး မော်တော်ယာဉ်သည် အခင်းဖြစ်နေရာအရောက်၌ ဘရိတ် ပေါက်ပြီး မီးပွိုင့်တွင် မီးနီ၍ စောင့်ဆိုင်းနေသော ဥဿာမြို့သစ်(၅)ရပ်ကွက်နေ ဦးကျော်စွာဦး (၄၅)နှစ် မောင်းနှင်သည့် ၇၁ ယ-XXXXX LUOJIA-110 မော်တော်ဆိုင်ကယ်၊ ဥဿာမြို့သစ် (၈)ရပ်ကွက်နေ ဦးသီဟစိုး(၃၅)နှစ် မောင်းနှင်သည့် 69W-XXXX HONDA WAVE မော်တော်ဆိုင်ကယ်နှင့် ဥဿာမြို့သစ်(၆)ရပ်ကွက်နေ ဦးကျော်ဝင်းဆွေ(၅၉)နှစ် မောင်းနှင်ပြီး နောက်တွင် သမီးဖြစ်သူ  မယွန်းယမုံဖူး(၁၅)နှစ် လိုက်ပါလာသည့် MDY/78W-XXXX HONDA CLICK မော်တော်ဆိုင်ကယ် တို့အား နောက်မှ ဝင်ရောက်တိုက်မိခဲ့သဖြင့် ဦးကျော်စွာဦးနှင့် ဦးသီဟစိုးတို့တွင် ထိခိုက်ဒဏ်ရာများ ရရှိကာ သေဆုံးသွားခဲ့ပြီး ဦးကျော်ဝင်းဆွေနှင့် မယွန်းယမုံဖူးတို့တွင် ထိခိုက်ဒဏ်ရာများ အသီးသီး ရရှိခဲ့သဖြင့် ဇော်ထက် အား ပဲခူးမြို့၊ အမှတ်(၃)နယ်မြေရဲစခန်း ယာဉ်(ပ)၁/၂၀၂၆၊ ရာဇသတ်ကြီး ပုဒ်မ ၃၀၄-က/ ၃၃၈ ဖြင့် အမှုဖွင့် အရေးယူထားကြောင်း သတင်းရရှိပါသည်။